ആലപ്പുഴയുടെ ഗുരുനാഥൻ കല്ലേലി രാഘവൻപിള്ള അന്തരിച്ചു

ആലപ്പുഴ: ആലപ്പുഴയുടെ വിദ്യാഭ്യാസ സാംസ്കാരിക മേഖലയിൽ നിറസാന്നിധ്യമായിരുന്ന അവലൂക്കുന്ന് വാർഡ് ശ്രീവിദ്യയിൽ കല്ലേലി രാഘവൻ പിള്ള (98) അന്തരിച്ചു.

‘ഗുരുനാഥന്മാരുടെ ഗുരു’ എന്ന് വിശേഷിപ്പിക്കപ്പെട്ടിരുന്ന കല്ലേലി രാഘവൻപിള്ള ദേശീയ അധ്യാപക അവാർഡ് ജേതാവ് കൂടിയാണ്. നിരവധി പുസ്തകങ്ങളുടെ രചയിതാവാണ്. എം.കെ. സാനുവുമായി ഒരുമിച്ച് പഠിച്ചു, പി. എൻ. പണിക്കർ, സുകുമാർ അഴിക്കോട്, കാവാലം നാരായണ പണിക്കർ, മാധവികുട്ടി എന്നിവരുമായി ഏറെ വ്യക്തിബന്ധം സൂക്ഷിച്ചു.

കല്ലേലി രാഘവൻ പിള്ളയുടെ നിര്യാണത്തിൽ എ. കെ. ആൻ്റണി, വി.എം സുധീരൻ, കെ.സി. വേണുഗോപാൽ, ജി. സുധാകരൻ, എ.ഡി. തോമസ് എം.എൽ.എ എന്നിവർ അനുശോചിച്ചു.

ശാരീരിക അവശതകളെ തുടർന്ന് വിശ്രമ ജീവിതം നയിക്കുകയായിരുന്നു. സംസ്‌കാരം തിങ്കളാഴ്ച വൈകിട്ട് 4 ന് ചാത്തനാട് ശ്മശാനത്തിൽ. നാളെ രാവിലെ 10 മണി മുതൽ ഒരു മണിവരെ ആലപ്പുഴ എസ്​ ഡി വി സെന്‍റിനറി ഹാളിൽ പൊതുദർശനം ഉണ്ടായിരിക്കും.