അന്താരാഷ്ട്ര യാത്രാവിലക്കിനെത്തുടര്‍ന്ന് വിയന്നയില്‍ നടക്കുന്ന ഐഎഇഎ അന്താരാഷ്ട്ര ആണവ വാര്‍ഷിക പൊതുസമ്മേളനത്തില്‍ പങ്കെടുക്കുന്നതില്‍ നിന്ന് ഇറാന്റെ ആണവ മേധാവി മുഹമ്മദ് എസ്ലാമിക്ക് തടസ്സം: ഓസ്ട്രിയയുടെ ഇളവ് അപേക്ഷ യുഎന്‍ ഉപരോധ സമിതി തള്ളി; ഉപരോധങ്ങള്‍ നിലനില്‍ക്കെ വിയന്നയിലേക്ക് തിരിച്ചതായി ഇറാന്‍ മാധ്യമങ്ങള്‍; വന്‍ശക്തികളും ഇറാനും തമ്മിലുള്ള നയതന്ത്ര പോരാട്ടം രൂക്ഷമാകുന്നു
Current: മലയാളം
വിയന്ന: വിയന്നയില്‍ നടക്കുന്ന അന്താരാഷ്ട്ര ആണവോര്‍ജ്ജ ഏജന്‍സിയുടെ വാര്‍ഷിക പൊതുസമ്മേളനത്തില്‍ പങ്കെടുക്കുന്നതില്‍ നിന്ന് ഇറാന്‍ അറ്റോമിക് എനര്‍ജി ഓര്‍ഗനൈസേഷന്‍ മേധാവി മുഹമ്മദ് എസ്ലാമിക്ക് വിലക്ക്.
അന്താരാഷ്ട്ര യാത്രാവിലക്കുള്ളതിനാലാണ് വര്‍ഷങ്ങള്‍ക്ക് ശേഷം ആദ്യമായി ഇറാന്റെ ആണവ മേധാവി ഐഎഇഎ സമ്മേളനത്തില്‍ നിന്ന് വിട്ടുനില്‍ക്കുന്നത്.
ഇസ്ലാമിക്കുള്ള യാത്രാവിലക്കില്‍ ഇളവ് നല്‍കണമെന്ന് ആതിഥേയ രാജ്യമായ ഓസ്ട്രിയ ഐക്യരാഷ്ട്രസഭയുടെ ഉപരോധ സമിതിയോട് അഭ്യര്‍ത്ഥിച്ചിരുന്നെങ്കിലും അനുമതി ലഭിച്ചില്ലെന്ന് വിശ്വസനീയ കേന്ദ്രങ്ങള്‍ വ്യക്തമാക്കി.
കഴിഞ്ഞ വര്‍ഷം ബ്രിട്ടന്‍, ഫ്രാന്‍സ്, ജര്‍മ്മനി എന്നീ രാജ്യങ്ങള്‍ സ്‌നാപ്ബാക്ക് സംവിധാനം വഴി ഇറാനെതിരെ യുഎന്‍ ഉപരോധങ്ങള്‍ വീണ്ടും പ്രാബല്യത്തില്‍ വരുത്തിയിരുന്നു. ഇതില്‍ യാത്രാവിലക്കും ആയുധ ഉപരോധവും ഉള്‍പ്പെടുന്നു. 2025 ജൂണിലെ ആക്രമണങ്ങള്‍ക്ക് ശേഷം തങ്ങളുടെ ആണവനിലയങ്ങളില്‍ പരിശോധന നടത്താന്‍ ഐഎഇഎ ഉദ്യോഗസ്ഥരെ ഇറാന്‍ അനുവദിച്ചിരുന്നില്ല.
നിലവില്‍ 60 ശതമാനം വരെ ശുദ്ധീകരിച്ച 440.9 കിലോഗ്രാം യുറേനിയം ഇറാന്റെ കൈവശമുണ്ടെന്നാണ് റിപ്പോര്‍ട്ടുകള്‍. അതേസമയം, സമ്മേളനത്തില്‍ പങ്കെടുക്കാനായി എസ്ലാമി വിയന്നയിലേക്ക് തിരിച്ചതായി ഇറാന്റെ ഔദ്യോഗിക വാര്‍ത്താ ഏജന്‍സിയായ ഇര്‍ന റിപ്പോര്‍ട്ട് ചെയ്തിട്ടുണ്ട്.
