ഇന്ത്യയിലേക്കുള്ള ആദ്യ സന്ദർശനം ഉഭയകക്ഷിയാകണം; ഡൽഹിയിലെ ബ്രിക്സ് ഉച്ചകോടി ഒഴിവാക്കിയതിന്റെ കാരണം വ്യക്തമാക്കി താരിഖ് റഹ്മാൻ | Tarique Rahman India visit
Current: മലയാളം
ന്യൂഡൽഹി: ഡൽഹിയിൽ നടന്ന ബ്രിക്സ് ഉച്ചകോടിയിൽ പങ്കെടുക്കാനുള്ള ഇന്ത്യയുടെ ക്ഷണം ബംഗ്ലാദേശ് പ്രധാനമന്ത്രി താരിഖ് റഹ്മാൻ സ്വീകരിക്കാതിരുന്നതിന്റെ കാരണം വ്യക്തമാക്കി വിദേശകാര്യ സഹമന്ത്രി ഹുമയൂൻ കബീർ. ഇന്ത്യയുമായുള്ള ബന്ധം പുതിയ രീതിയിൽ പുനഃക്രമീകരിക്കാനാണ് ബംഗ്ലാദേശ് ആഗ്രഹിക്കുന്നതെന്നും അതിനാൽ ആദ്യ സന്ദർശനം ബഹുരാഷ്ട്ര വേദിയിലൂടെയല്ല, ഉഭയകക്ഷി സന്ദർശനമായിരിക്കണമെന്നാണ് ധാരണയെന്നും അദ്ദേഹം പറഞ്ഞു. (Tarique Rahman India visit)
ഇന്ത്യ താരിഖ് റഹ്മാനെ രണ്ട് തവണ ക്ഷണിച്ചിട്ടുണ്ടെന്ന് വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ ചൊവ്വാഴ്ച വ്യക്തമാക്കിയിരുന്നു. ആദ്യം ഉഭയകക്ഷി സന്ദർശനത്തിനും പിന്നീട് ബിംസ്റ്റെക് അധ്യക്ഷനെന്ന നിലയിൽ ബ്രിക്സ് ഉച്ചകോടിയിൽ പങ്കെടുക്കുന്നതിനുമായിരുന്നു ക്ഷണം. എന്നാൽ ഇന്ത്യാ സന്ദർശനത്തിന്റെ സമയക്രമത്തെക്കുറിച്ച് ബംഗ്ലാദേശിൽ നിന്ന് ഇതുവരെ സ്ഥിരീകരണം ലഭിച്ചിട്ടില്ലെന്നും ജയ്‌സ്വാൾ പറഞ്ഞു. ഇന്ത്യയുമായുള്ള ബന്ധം പുനഃസ്ഥാപിക്കുന്നതിനുള്ള ആദ്യപടിയായി ഉഭയകക്ഷി കൂടിക്കാഴ്ചയാണ് ബംഗ്ലാദേശ് കാണുന്നതെന്ന് ഹുമയൂൻ കബീർ വ്യക്തമാക്കി. പുതിയൊരു ‘പ്രവർത്തന ബന്ധം’ രൂപപ്പെടുത്തുകയാണ് ലക്ഷ്യമെന്നും ഇതിനായി ആദ്യം ഉഭയകക്ഷി സന്ദർശനം നടത്തുന്നതാണ് ഉചിതമെന്നുമാണ് ബംഗ്ലാദേശിന്റെ നിലപാട്. എന്നാൽ ബഹുരാഷ്ട്ര വേദികളിൽ ഇന്ത്യയുമായി കൂടിക്കാഴ്ച നടത്തില്ലെന്നല്ല ഇതിന്റെ അർഥമെന്നും അദ്ദേഹം കൂട്ടിച്ചേർത്തു.
സെപ്റ്റംബർ 21ന് ന്യൂയോർക്കിലെത്തുന്ന താരിഖ് റഹ്മാൻ ഐക്യരാഷ്ട്ര പൊതുസഭയുടെ 81ാം സമ്മേളനത്തിൽ ബംഗ്ലാദേശിന്റെ പുതിയ കാഴ്ചപ്പാടും ഭാവി പദ്ധതികളും അവതരിപ്പിക്കും. കൂടാതെ, റോഹിങ്ക്യൻ അഭയാർഥി പ്രതിസന്ധി അന്താരാഷ്ട്ര ശ്രദ്ധയിൽ നിലനിർത്തുന്നതിനായി ഉന്നതതല സൈഡ് ഇവന്റിനും ബംഗ്ലാദേശ് നേതൃത്വം നൽകും. യുഎൻ പൊതുസഭയുടെ അധ്യക്ഷ സ്ഥാനത്ത് നിലവിൽ ബംഗ്ലാദേശ് വിദേശകാര്യ മന്ത്രി ഖലീലുർ റഹ്മാനാണ്. യുഎൻ പൊതുസഭയുടെ വാർഷിക പൊതുചർച്ചയിൽ വിവിധ രാജ്യങ്ങളുടെ രാഷ്ട്രത്തലവന്മാരും സർക്കാർ മേധാവികളും ആഗോള വിഷയങ്ങളിലുള്ള തങ്ങളുടെ നിലപാടുകളും മുൻഗണനകളും അവതരിപ്പിക്കും. 193 അംഗരാജ്യങ്ങൾക്കും തുല്യ വോട്ടവകാശമുള്ള പൊതുസഭയുടെ 81ാം സമ്മേളനത്തിന്റെ പ്രമേയം ‘Restoring trust, managing transformation: A United Nations that delivers for all’ എന്നതാണ്.
താരിഖ് റഹ്മാന്റെ ഇന്ത്യാ സന്ദർശനം എപ്പോൾ നടക്കുമെന്ന കാര്യത്തിൽ നിലവിൽ വ്യക്തതയില്ല. എന്നാൽ സമയക്രമം അനുകൂലമാകുകയും ഇരു രാജ്യങ്ങളും പരസ്പരം അംഗീകരിക്കുന്ന തീയതിയിൽ ധാരണയിലെത്തുകയും ചെയ്താൽ സന്ദർശനം നടക്കുമെന്ന് ഹുമയൂൻ കബീർ വ്യക്തമാക്കി. ന്യൂയോർക്ക് സന്ദർശനത്തിനിടെ മറ്റ് ലോകനേതാക്കളുമായി ഉഭയകക്ഷി കൂടിക്കാഴ്ചകൾക്ക് സാധ്യതയുണ്ടെന്നും അദ്ദേഹം സൂചിപ്പിച്ചു.
Summary: Bangladesh Prime Minister Tarique Rahman skipped the BRICS summit in New Delhi because Dhaka wants to reset ties with India through a bilateral visit first. Rahman is expected to travel to New York on September 21 for the 81st UN General Assembly, where he will present Bangladesh’s new outlook and highlight the Rohingya refugee crisis.
