എൽഡിഎഫ് കൺവീനർ മാറ്റം; പത്രവാർത്തകൾ കണ്ട് പ്രതികരിക്കേണ്ടതില്ലെന്ന് ബിനോയ് വിശ്വം, യഥാസമയം സിപിഎം കാര്യങ്ങൾ അറിയിക്കും; മാറ്റത്തെ സിപിഐ സ്വാഗതം ചെയ്യുന്നു, തെറ്റുകൾ സംഭവിച്ചാൽ അംഗീകരിച്ച് തിരുത്തണമെന്നും പ്രതികരണം

തിരുവനന്തപുരം: എൽഡിഎഫ് കൺവീനർ മാറ്റത്തെക്കുറിച്ച് പ്രതികരണവുമായി ബിനോയ് വിശ്വം. പത്രവാർത്തകൾ കണ്ട് പ്രതികരിക്കേണ്ടതില്ലെന്നും യഥാസമയം സിപിഎം എല്ലാ കാര്യങ്ങളും അറിയിക്കുമെന്നും ബിനോയ് വിശ്വം പറഞ്ഞു. ഇതുവരെയും മാറ്റത്തെക്കുറിച്ച് അറിയിച്ചിട്ടില്ല. 

യാഥാർത്ഥ്യബോധത്തെ അംഗീകരിച്ചുകൊണ്ടുള്ള ഈ മാറ്റത്തെ സിപിഐ സ്വാഗതം ചെയ്യുന്നു. സിപിഎം യാഥാർത്ഥ്യബോധമുള്ള പാർട്ടിയാണെന്ന് തെളിയിച്ചിരിക്കുകയാണ്. ഈ പാഠങ്ങളെല്ലാം സിപിഎമ്മിന് മാത്രമല്ല സിപിഐക്കും ബാധകമാണെന്നും ബിനോയ് വിശ്വം വ്യക്തമാക്കി.

തെറ്റുകൾ സംഭവിച്ചാൽ തെറ്റുകൾ അംഗീകരിക്കണം, തെറ്റുകൾ തിരുത്തണം. സിപിഐ ആ വഴിക്കാണ് നീങ്ങാൻ ആഗ്രഹിക്കുന്നത്. ഉപപ്രതിപക്ഷ നേതാവ് പദവിയിൽ മാറ്റത്തിന്റെ കാര്യമില്ല. 

റിയാസിനെതിരായ ഹവാല ആരോപണത്തിൽ ഇഡിയുടെ കത്ത് മാത്രം അടിസ്ഥാനമാക്കി ഒന്നും പറയാൻ പറ്റില്ലെന്നും ബിനോയ് വിശ്വം അഭിപ്രായപ്പെട്ടു. 

കമ്മ്യൂണിസ്റ്റുകാർക്ക് കമ്മ്യൂണിസ്റ്റ് മൂല്യബോധം വലുതാണ്. കമ്മ്യൂണിസ്റ്റ് മൂല്യങ്ങൾ മുറുകെപ്പിടിക്കാൻ സിപിഐക്കും സിപിഎമ്മിനും കടമയുണ്ടെന്നും ബിനോയ് വിശ്വം പറഞ്ഞു.