റിപ്പോർട്ടർ ചാനൽ ഓഫീസിലെ എസ്ഐടി പരിശോധന; ഡോളറും വിദേശ ബാങ്ക് എടിഎം കാർഡുകളും കണ്ടെത്തിയതായി റിപ്പോർട്ട് | Reporter Channel SIT Raid
Current: മലയാളം
കൊച്ചി: മെസ്സിയെ കേരളത്തിലെത്തിക്കാമെന്ന് വാഗ്ദാനം ചെയ്ത് തട്ടിപ്പ് നടത്തിയെന്ന കേസിൽ അന്വേഷണം നേരിടുന്ന ആന്റോ അഗസ്റ്റിന്റെ സ്ഥാപനങ്ങളിലും വീടുകളിലും എസ്ഐടി പരിശോധന (Reporter Channel SIT Raid). റിപ്പോർട്ടർ ചാനലിന്റെ ഓഫീസിൽ നടത്തിയ പരിശോധനയിൽ ഡോളർ കണ്ടെത്തിയതായി റിപ്പോർട്ട്. വിദേശ ബാങ്കുകളുടെ എടിഎം കാർഡുകളും കണ്ടെത്തിയതായി റിപ്പോർട്ടുകളുണ്ട്. പരിശോധനയിൽ ലഭിച്ച വസ്തുക്കളും രേഖകളും സംബന്ധിച്ച് കൂടുതൽ അന്വേഷണം തുടരുകയാണെന്ന് പൊലീസ് അറിയിച്ചു.
ആന്റോ അഗസ്റ്റിന്റെ വയനാട്ടിലെ വീട്ടിൽ ഏകദേശം 13 മണിക്കൂറാണ് എസ്ഐടി പരിശോധന നടത്തിയത്. മൊബൈൽ ഫോൺ, ലാപ്ടോപ്, പെൻഡ്രൈവ്, സിഡി എന്നിവ അന്വേഷണ സംഘം കസ്റ്റഡിയിലെടുത്തു.
പരിശോധനയ്ക്കിടെ 67 ലിറ്റർ മദ്യവും വീട്ടിൽ നിന്ന് കണ്ടെത്തിയതായി റിപ്പോർട്ടുണ്ട്. ഇതിൽ 43 ലിറ്റർ വിദേശനിർമിത മദ്യവും വൈനും ഉൾപ്പെടുന്നു. പിടിച്ചെടുത്ത മദ്യം എക്സൈസ് വിഭാഗത്തിന് കൈമാറിയതായാണ് വിവരം.
കണ്ടെടുത്ത ഡോളറിന്റെ പരിശോധന തുടരുകയാണ്. സാമ്പത്തിക ഇടപാടുകൾ ഉൾപ്പെടെയുള്ള കാര്യങ്ങൾ കേന്ദ്രീകരിച്ചാണ് പരിശോധന നടത്തിയതെന്നാണ് പൊലീസ് വ്യക്തമാക്കുന്നത്. വിദേശ ബാങ്കുകളുടെ എടിഎം കാർഡുകളും അന്വേഷണ സംഘം പരിശോധിക്കുന്നുണ്ട്.
വയനാട്ടിലെ ആന്റോ അഗസ്റ്റിന്റെ വീടുൾപ്പെടെ അഞ്ച് സ്ഥലങ്ങളിലാണ് ഒരേസമയം എസ്ഐടി പരിശോധന നടത്തിയത്. പുലർച്ചെയാണ് വിവിധ കേന്ദ്രങ്ങളിൽ പരിശോധന ആരംഭിച്ചത്.
മെസ്സി കേരളത്തിലെത്തുമെന്ന് വാഗ്ദാനം ചെയ്ത് പണം തട്ടിയെന്ന പരാതിയിലാണ് ആന്റോ അഗസ്റ്റിനെതിരെ അന്വേഷണം നടക്കുന്നത്. പരിശോധനയിൽ കണ്ടെത്തിയ ഡോളറിന്റെയും മറ്റ് വസ്തുക്കളുടെയും ഉറവിടവും ഉപയോഗവും സംബന്ധിച്ച് അന്വേഷണ സംഘം പരിശോധിച്ചുവരികയാണ്.
Story Summary:
The SIT conducted searches at five locations linked to Anto Augustine in connection with an alleged fraud case involving a promise to bring Lionel Messi to Kerala. Reports said US dollars and foreign bank ATM cards were found during the searches, while electronic devices and liquor were also seized from his Wayanad residence.
