കർണാടക പി.എസ്.സിയിലും വൻ തട്ടിപ്പും അഴിമതിയും. പി.എസ്.സി പൂർണ്ണമായും പിരിച്ചുവിടാൻ നിയമോപദേശം തേടുന്നുവെന്ന് കർണാടക മുഖ്യമന്ത്രി ഡി.കെ. ശിവകുമാർ. കോടതി നേരിട്ട് എസ്.ഐ.ടിയെ വെച്ച നടപടിയെ ചോദ്യം ചെയ്ത് സർക്കാർ. ഉദ്യോഗാർത്ഥികളുടെ താല്പര്യം സംരക്ഷിക്കാൻ കടുത്ത തീരുമാനം. അന്വേഷിക്കാൻ കർണാടക പോലീസിന് പ്രാപ്തിയുണ്ടെന്നും ഉദ്യോഗസ്ഥരെ തീരുമാനിക്കേണ്ടത് സർക്കാരെന്നും നിലപാട്
Current: മലയാളം
ബെംഗളൂരു: റിക്രൂട്ട്‌മെന്റ് തട്ടിപ്പുകളും അഴിമതിയും തുടർക്കഥയായ പശ്ചാത്തലത്തിൽ കർണാടക പബ്ലിക് സർവീസ് കമ്മീഷൻ (കെ.പി.എസ്.സി) പൂർണ്ണമായും അടച്ചുപൂട്ടുന്നതിനെക്കുറിച്ച് സർക്കാർ നിയമോപദേശം തേടുകയാണെന്ന് കർണാടക മുഖ്യമന്ത്രി ഡി.കെ. ശിവകുമാർ വ്യക്തമാക്കി.
അതേസമയം, കെ.പി.എസ്.സിയിലെ ക്രമക്കേടുകൾ അന്വേഷിക്കുന്നതിനായി സംസ്ഥാന സർക്കാരിന്റെ അനുമതിയില്ലാതെ ഉദ്യോഗസ്ഥരെ നേരിട്ട് നിശ്ചയിച്ച് പ്രത്യേക അന്വേഷണ സംഘത്തെ (എസ്.ഐ.ടി) രൂപീകരിച്ച കർണാടക ഹൈക്കോടതിയുടെ അസാധാരണ നടപടിയെ മുഖ്യമന്ത്രി രൂക്ഷമായി വിമർശിച്ചു.
ബെംഗളൂരുവിൽ കർണാടക സ്റ്റേറ്റ് ഇലക്ട്രോണിക്സ് ഡെവലപ്‌മെന്റ് കോർപ്പറേഷൻ ലിമിറ്റഡിന്റെ (കിയോണിക്സ്) സുവർണ്ണ ജൂബിലി ആഘോഷങ്ങളിൽ സംസാരിക്കവെയായിരുന്നു അദ്ദേഹത്തിന്റെ തുറന്നുപറച്ചിൽ.
ഉദ്യോഗാർത്ഥികളുടെയും വിദ്യാർത്ഥികളുടെയും ഭാവിയും വിശ്വാസ്യതയും സംരക്ഷിക്കാൻ കമ്മീഷൻ പൂർണ്ണമായി പിരിച്ചുവിടേണ്ടതുണ്ടെന്നും, ഭരണഘടനാപരമായ ചട്ടക്കൂടിനുള്ളിൽ നിന്നുകൊണ്ട് ഇതിൽ എന്തുചെയ്യാൻ സാധിക്കുമെന്നാണ് നിയമവിദഗ്ദ്ധരുമായി കൂടിയാലോചിക്കുന്നതെന്നും അദ്ദേഹം പറഞ്ഞു.
വെറ്ററിനറി ഓഫീസർമാരുടെ റിക്രൂട്ട്‌മെന്റ് പരീക്ഷാ ചോദ്യപേപ്പർ ചോർച്ച ഉൾപ്പെടെയുള്ള വൻ അഴിമതി പുറത്തുവന്നതിന് പിന്നാലെയാണ് സർക്കാർ കടുത്ത നിലപാടിലേക്ക് കടന്നത്.
അഴിമതിയുമായി ബന്ധപ്പെട്ട് കെ.പി.എസ്.സി മുൻ പരീക്ഷാ കൺട്രോളറും മുതിർന്ന ഐ.എ.എസ് ഉദ്യോഗസ്ഥനുമായ ജ്ഞാനേന്ദ്ര കുമാർ ഗാംഗ്‌വാറിനെ സി.ഐ.ഡി നേരത്തെ അറസ്റ്റ് ചെയ്തിരുന്നു.
ഇതിനിടെയാണ് കഴിഞ്ഞ തിങ്കളാഴ്ച മുതിർന്ന ഐ.പി.എസ് ഉദ്യോഗസ്ഥനായ ഡി.ജി.പി അലോക് കുമാറിന്റെ നേതൃത്വത്തിൽ അഞ്ചംഗ പ്രത്യേക അന്വേഷണ സംഘത്തെ നേരിട്ട് നിയോഗിച്ചുകൊണ്ട് ഹൈക്കോടതി നിർണ്ണായക ഉത്തരവ് പുറപ്പെടുവിച്ചത്.
എന്നാൽ ഹൈക്കോടതിയുടെ ഈ ഇടപെടലിനോട് സർക്കാർ കടുത്ത വിയോജിപ്പ് രേഖപ്പെടുത്തി. ഇത്തരം വൻ തട്ടിപ്പുകൾ ആഴത്തിൽ അന്വേഷിച്ച് കുറ്റക്കാരെ കണ്ടെത്താൻ കർണാടക പോലീസിന് പൂർണ്ണ പ്രാപ്തിയും ശേഷിയുമുണ്ടെന്ന് മുഖ്യമന്ത്രി ചൂണ്ടിക്കാട്ടി.
ഒരു കേസിൽ അന്വേഷണ ഉദ്യോഗസ്ഥരെ തീരുമാനിക്കാനുള്ള പരമാധികാരം തെരഞ്ഞെടുക്കപ്പെട്ട സംസ്ഥാന സർക്കാരിനാണെന്നും, സർക്കാരിനെ മറികടന്ന് കോടതി സ്വന്തം നിലയിൽ പ്രത്യേക സംഘത്തെ നിയോഗിക്കുന്നത് ഭരണഘടനാപരമായ അധികാരപരിധിക്ക് പുറത്തുള്ള കാര്യമാണെന്നും ഡി.കെ. ശിവകുമാർ തുറന്നടിച്ചു.
പോലീസ് നടത്തുന്ന അന്വേഷണം കാര്യക്ഷമമല്ലെങ്കിൽ മാത്രം അന്വേഷണ റിപ്പോർട്ട് പരിശോധിച്ച ശേഷം കോടതിക്ക് നിർദ്ദേശങ്ങൾ നൽകാമെന്നും, അല്ലാതെ തുടക്കത്തിലേ അന്വേഷണ ഉദ്യോഗസ്ഥരെ നേരിട്ട് നിശ്ചയിക്കാൻ കോടതിക്ക് അധികാരമില്ലെന്നും മുഖ്യമന്ത്രി കർശനമായി ഓർമ്മിപ്പിച്ചു.
തട്ടിപ്പിന്റെ വ്യാപ്തിയെക്കുറിച്ചും അനധികൃത നിയമനങ്ങളെക്കുറിച്ചും നിർണ്ണായകമായ വലിയ വിവരശേഖരം പോലീസിന്റെ പക്കലുണ്ടെന്നും സമഗ്രമായ വിവരങ്ങൾ വൈകാതെ പുറത്തുവിടുമെന്നും അദ്ദേഹം കൂട്ടിച്ചേർത്തു.
