മണിപ്പൂർ, നാഗാലാൻഡ്, അരുണാചൽ പ്രദേശ് എന്നിവിടങ്ങളിലെ AFSPA കാലാവധി നീട്ടി: മണിപ്പൂരിൽ 6 മാസത്തേക്ക് നിയമ കാലാവധി നീട്ടി കേന്ദ്രം | AFSPA in Manipur
Current: മലയാളം
ഉഖ്റുൽ: വടക്കുകിഴക്കൻ സംസ്ഥാനങ്ങളായ മണിപ്പൂർ, നാഗാലാൻഡ്, അരുണാചൽ പ്രദേശ് എന്നിവയിലെ നിർദ്ദിഷ്ട മേഖലകളിൽ പ്രാബല്യത്തിലുള്ള അടിയന്തര സായുധ സേനാ അധികാര നിയമം (AFSPA) ഒക്ടോബർ 1 മുതൽ ആറു മാസത്തേക്ക് കൂടി കേന്ദ്ര ആഭ്യന്തര മന്ത്രാലയം നീട്ടി. ക്രമസമാധാന നില വിലയിരുത്തിയ ശേഷം സെപ്റ്റംബർ 24-നാണ് മന്ത്രാലയം ഇത് സംബന്ധിച്ച വിജ്ഞാപനം പുറപ്പെടുവിച്ചത്. 2027 മാർച്ച് 31 വരെയാണ് ഈ ഉത്തരവിന് പ്രാബല്യമുണ്ടാവുക.(AFSPA in Manipur, MHA has extended the AFSPA in Manipur, Nagaland, and Arunachal Pradesh)
മണിപ്പൂരിൽ കേന്ദ സർക്കാർ പ്രഖ്യാപിച്ച ‘അശാന്ത പ്രദേശം’ പദവി അതേപടി നിലനിർത്തിയിട്ടുണ്ട്. എന്നാൽ ഇംഫാൽ വെസ്റ്റ്, ഇംഫാൽ ഈസ്റ്റ്, തൗബാൽ, ബിഷ്ണുപൂർ, കാക്ചിംഗ് എന്നീ അഞ്ച് ജില്ലകളിലായി വരുന്ന 13 പോലീസ് സ്റ്റേഷൻ പരിധികളെ ഇതിൽ നിന്ന് ഒഴിവാക്കിയിട്ടുണ്ട്. മുൻപ് നിലവിലുണ്ടായിരുന്ന ഉത്തരവിലെ അതേ ഒഴിവാക്കലുകളാണ് പുതിയ ഉത്തരവിലും തുടരുന്നത്.
സംസ്ഥാനത്തെ ക്രമസമാധാന സാഹചര്യങ്ങൾ ഇപ്പോഴും ആശങ്കാജനകമായി തുടരുന്ന പശ്ചാത്തലത്തിലാണ് ആഭ്യന്തര മന്ത്രാലയത്തിന്റെ ഈ നടപടി. പ്രത്യേകിച്ച് കാങ്പോക്പി, തമെങ്ലോങ്, നോനി, ഉഖ്റുൽ, കാംജോങ് എന്നീ മലയോര മേഖലകളിൽ സമീപകാലത്തുണ്ടായ അക്രമ സംഭവങ്ങൾ സുരക്ഷാ ഭീഷണി വർധിപ്പിച്ചിട്ടുണ്ട്. കാംജോങ് അതിർത്തി ഗ്രാമമായ പിലോങ്ങിൽ അടുത്തിടെ നാല് സാധാരണക്കാർ കൊല്ലപ്പെട്ടതും, കാങ്പോക്പി മേഖലയിലെ ഗ്രാമങ്ങൾക്ക് നേരെയുണ്ടായ ആക്രമണങ്ങളും വ്യാപകമായ ജനവാസ നാശത്തിനും കുടിയൊഴിപ്പിക്കലിനും കാരണമായിരുന്നു.
മേഖലയിലെ സുരക്ഷ ശക്തമാക്കുന്നതിന്റെ ഭാഗമായി മുതിർന്ന പോലീസ് ഉദ്യോഗസ്ഥരുടെയും സൈന്യത്തിന്റെയും നേതൃത്വത്തിൽ പ്രദേശങ്ങളിൽ സുരക്ഷാ അവലോകനങ്ങൾ നടന്നുവരികയാണ്. ഏതെങ്കിലും പ്രത്യേക സംഘടനയെയോ സംഭവത്തെയോ വിജ്ഞാപനത്തിൽ എടുത്തുപറയുന്നില്ലെങ്കിലും, ക്രമസമാധാന നില തൃപ്തികരമല്ലാത്തതിനാലാണ് ‘അശാന്ത പ്രദേശം’ പദവി തുടരുന്നതെന്ന് ആഭ്യന്തര മന്ത്രാലയം വ്യക്തമാക്കി.
Story Summary
The Ministry of Home Affairs has extended the AFSPA in Manipur, Nagaland, and Arunachal Pradesh for another six months starting October 1, 2026. In Manipur, the ‘disturbed area’ tag remains applicable across the state, except for 13 police station limits in five valley districts.
