ഇലയ്ക്കാട് കാക്കിനിക്കാട് ക്ഷേത്രത്തിൽ ചിലങ്കപൂജ നടന്നു

ഇലയ്ക്കാട്: കാക്കിനിക്കാട് ക്ഷേത്ര ഹാളിൽ വച്ച് നൃത്തപഠനം നടത്തുന്ന വിദ്യാർത്ഥികളുടെ ചിലങ്കപൂജ ചടങ്ങ് ഭക്തിനിർഭരമായ അന്തരീക്ഷത്തിൽ നടന്നു.

മണ്ണയ്ക്കനാട് കേന്ദ്രമായി പ്രവർത്തിക്കുന്ന ശ്രീദുർഗ്ഗ നൃത്ത കലാലയത്തിലെ അശ്വതി ടീച്ചറുടെ ശിക്ഷണത്തിൽ നൃത്തം അഭ്യസിക്കുന്ന മുപ്പത്തിയഞ്ചോളം വിദ്യാർത്ഥികളാണ് ചിലങ്കപൂജയിൽ പങ്കെടുത്തത്.

കലയെ ദൈവീകമായി കാണുന്ന പാരമ്പര്യത്തിന്റെ ഭാഗമായി, നൃത്ത പഠനത്തിന്റെയും അരങ്ങേറ്റത്തിന്റെയും തുടക്കമായി ദൈവത്തിന്റെയും ഗുരുവിന്റെയും അനുഗ്രഹം നേടുന്നതിനാണ് ചിലങ്കപൂജ നടത്തുന്നത്.

ഗുരുദക്ഷിണ സമർപ്പിച്ച് അനുഗ്രഹം വാങ്ങിയ ശിഷ്യർക്ക്, പൂജിച്ച ചിലങ്കകൾ ഗുരു നേരിട്ട് കാലുകളിൽ അണിയിച്ചു കൊടുത്തു. ചടങ്ങിൽ കുട്ടികളുടെ രക്ഷിതാക്കളും ഭക്തജനങ്ങളും പങ്കെടുത്തു.