പ്രിയദർശിനി ബസിൽ പെൺകുട്ടിയെ അധിക്ഷേപിച്ചിട്ടില്ലെന്ന് സസ്‌പെൻഷനിലായ കെഎസ്ആർടിസി കണ്ടക്ടർ. മുടിവെട്ടിയതിനാൽ പെൺകുട്ടിയാണെന്ന് മനസിലായില്ലെന്നും തിരിച്ചറിഞ്ഞ ഉടൻ ടിക്കറ്റ് തിരികെ വാങ്ങി സീറോ ടിക്കറ്റ് നൽകിയെന്നും വിശദീകരണം

കൊച്ചി: പ്രിയദർശിനി ബസിൽ പെൺകുട്ടിയെ അധിക്ഷേപിച്ചിട്ടില്ലെന്ന് സസ്പെൻഷനിലായ കെഎസ്ആർടിസി കണ്ടക്ടർ മഹേഷ്. മുടിവെട്ടിയതിനാൽ പെൺകുട്ടിയാണെന്ന് മനസിലായില്ലെന്നും തിരിച്ചറിഞ്ഞ ഉടൻ ടിക്കറ്റ് തിരികെ വാങ്ങി സീറോ ടിക്കറ്റ് നൽകിയെന്നും മഹേഷ് മീഡിയവണിനോട് പറഞ്ഞു.

പെൺകുട്ടികൾ മറ്റ് യാത്രക്കാരുമായാണ് പ്രശ്നമുണ്ടാക്കിയതെന്നും തന്നോട് തർക്കമുണ്ടായിട്ടില്ലെന്നും മഹേഷ് വ്യക്തമാക്കി. സംഭവത്തിൽ തന്റെ ഭാഗത്തുനിന്ന് മോശമായ പെരുമാറ്റമുണ്ടായിട്ടില്ലെന്നും അദ്ദേഹം പറഞ്ഞു.

കഴിഞ്ഞ ദിവസമാണ് എറണാകുളം പറവൂരിൽ പ്രിയദർശിനി ബസിൽ പെൺകുട്ടിയെ അപമാനിച്ചെന്ന പരാതിയിൽ കണ്ടക്ടർക്കെതിരെ പൊലീസ് കേസെടുത്തത്. സംഭവത്തെ തുടർന്ന് കണ്ടക്ടറെ കെഎസ്ആർടിസി സസ്പെൻഡ് ചെയ്തിരുന്നു. പരാതിയുമായി ബന്ധപ്പെട്ട് പൊലീസ് അന്വേഷണം തുടരുകയാണ്.