ബ്രിട്ടനിലെ യുഎസ് സൈനിക താവളത്തിന് സമീപം ഭീകരാക്രമണ ഗൂഢാലോചനയെന്ന് സംശയം; അറസ്റ്റിലായ അഞ്ച് പേരെ ജാമ്യത്തിൽ വിട്ടു | RAF Fairford base incident

ബ്രിട്ടനിലെ യുഎസ് സൈന്യം ഉപയോഗിക്കുന്ന വ്യോമതാവളത്തിന് സമീപം ഭീകരാക്രമണത്തിന് പദ്ധതിയിട്ടെന്ന സംശയത്തിൽ അറസ്റ്റിലായ അഞ്ച് പേരെ ജാമ്യത്തിൽ വിട്ടു. പടിഞ്ഞാറൻ ഇംഗ്ലണ്ടിലെ ആർഎഎഫ് ഫെയർഫോർഡ് വ്യോമതാവളത്തിന് സമീപം സംശയാസ്പദമായ സാഹചര്യത്തിൽ മൂന്ന് വാനുകൾ കണ്ടെത്തിയതിനെ തുടർന്നാണ് യുവാക്കളെ അറസ്റ്റ് ചെയ്തത്. ഇരുപതുകളുടെ തുടക്കത്തിലുള്ള ബ്രിട്ടീഷ് പൗരന്മാരായ ഇവർ ലണ്ടൻ സ്വദേശികളാണ്. (RAF Fairford base incident)

തിങ്കളാഴ്ചയാണ് അഞ്ചുപേരെയും ജാമ്യത്തിൽ വിട്ടയച്ചത്. എന്നാൽ അന്വേഷണം അവസാനിച്ചിട്ടില്ലെന്ന് ബ്രിട്ടനിലെ ഭീകരവിരുദ്ധ പൊലീസ് മേധാവി ലോറൻസ് ടെയ്‌ലർ വ്യക്തമാക്കി. സ്ഫോടകവസ്തു നിയമപ്രകാരവും ഭീകരാക്രമണത്തിന് തയ്യാറെടുപ്പ് നടത്തിയെന്ന സംശയത്തിലുമാണ് അന്വേഷണം തുടരുന്നത്. സംഭവത്തിന് പിന്നിൽ വിദേശരാജ്യത്തിനോ മറ്റേതെങ്കിലും സംഘടനയ്ക്കോ പങ്കുണ്ടോയെന്ന് പൊലീസ് പരിശോധിച്ചുവരികയാണ്. അന്വേഷണത്തിൽ ഇറാൻ, റഷ്യ, മറ്റ് സായുധ സംഘങ്ങൾ എന്നിവയുമായുള്ള സാധ്യതയുള്ള ബന്ധങ്ങളും പരിശോധിക്കുന്നുണ്ടെങ്കിലും അറസ്റ്റിലായവരെ ഇറാനുമായി ബന്ധിപ്പിക്കുന്ന തെളിവുകൾ പൊലീസ് പരസ്യപ്പെടുത്തിയിട്ടില്ല. അതേസമയം, സംഭവത്തിൽ ഇറാന് പങ്കുണ്ടെന്ന തരത്തിലുള്ള പ്രചാരണങ്ങളെ ലണ്ടനിലെ ഇറാൻ എംബസി തള്ളി. അടിസ്ഥാനരഹിതവും ദുരുദ്ദേശ്യപരവുമായ ആരോപണങ്ങൾ ഇറാൻ വിരുദ്ധ പ്രചാരണങ്ങൾക്ക് വഴിയൊരുക്കുമെന്നാണ് എംബസിയുടെ പ്രതികരണം.

സംഭവം ഇറാനുമായി ബന്ധപ്പെട്ടതാകാമെന്ന് യുഎസ് പ്രസിഡന്റ് ഡൊണാൾഡ് ട്രംപ് പ്രതികരിച്ചിരുന്നു. എന്നാൽ പ്രതികളെ ജാമ്യത്തിൽ വിട്ടയച്ച നടപടിയോട് അദ്ദേഹം വിയോജിപ്പ് പ്രകടിപ്പിച്ചു. ബ്രിട്ടനിലെ കർഷകയാണ് ആദ്യം സംശയാസ്പദമായ വാഹനങ്ങളെക്കുറിച്ച് പൊലീസിനെ അറിയിച്ചതെന്നാണ് റിപ്പോർട്ട്. മുഖംമൂടിയും ഹുഡും ധരിച്ച ചിലർ വാഹനങ്ങളിൽനിന്ന് ഇറങ്ങി സമീപത്തെ വയലുകളിലേക്ക് ഓടിപ്പോകുന്നത് കണ്ടതായും അവർ മാധ്യമങ്ങളോട് പറഞ്ഞു. ഇറാനെതിരായ യുദ്ധത്തിൽ അമേരിക്ക ഉപയോഗിക്കുന്ന വ്യോമതാവളമാണ് ആർഎഎഫ് ഫെയർഫോർഡ്. ഇറാന്റെ മിസൈൽ കേന്ദ്രങ്ങൾക്കെതിരായ ആക്രമണങ്ങൾക്ക് ഈ താവളത്തിൽനിന്ന് ബോംബറുകൾ ഉപയോഗിക്കാൻ ബ്രിട്ടൻ അനുമതി നൽകിയിരുന്നു. ഹോർമുസ് കടലിടുക്കിലെ കപ്പലുകൾക്ക് നേരെയുണ്ടായ ആക്രമണങ്ങളുമായി ബന്ധപ്പെട്ടായിരുന്നു നടപടിയെന്ന് ബ്രിട്ടീഷ് സർക്കാർ വ്യക്തമാക്കിയിട്ടുണ്ട്. ഫെയർഫോർഡ് താവളം നിയമാനുസൃത ലക്ഷ്യമാണെന്ന് ഇറാന്റെ ഇസ്‌ലാമിക് റെവല്യൂഷണറി ഗാർഡ് കോർപ്സ് ജൂലൈയിൽ പറഞ്ഞതായും റിപ്പോർട്ടുണ്ട്.

സംഭവത്തെ തുടർന്ന് ബ്രിട്ടീഷ് സർക്കാർ സുരക്ഷാ സാഹചര്യം വിലയിരുത്തുന്നതിനായി അടിയന്തര യോഗം ചേർന്നു. വിദേശരാജ്യങ്ങളുടെ പിന്തുണയോടെയാണോ ഗൂഢാലോചന നടന്നതെന്ന് ഉൾപ്പെടെ വിവിധ സാധ്യതകൾ പരിശോധിക്കുകയാണെന്ന് അധികൃതർ അറിയിച്ചു. അന്വേഷണം തുടരുന്നതിനാൽ സംഭവത്തിന്റെ യഥാർഥ ലക്ഷ്യവും പിന്നിലുള്ളവരുടെ പങ്കും ഇതുവരെ സ്ഥിരീകരിച്ചിട്ടില്ല.

Summary: Five British men arrested on suspicion of terrorism and explosives offences near RAF Fairford in western England have been released on bail. Police are investigating possible links to foreign states or armed groups, while Iran has denied involvement and condemned the allegations as unfounded.