യുഎസ് പൗരന്മാരെ ലക്ഷ്യമിട്ട് വ്യാജ ആപ്പിൾ കോൾ സെന്റർ; ഡൽഹിയിൽ ഏഴ് പേർ അറസ്റ്റിൽ | Fake Apple Call Centre Delhi

ന്യൂഡൽഹി: യുഎസ് പൗരന്മാരെ ലക്ഷ്യമിട്ട് സാങ്കേതിക സഹായത്തിന്റെ പേരിൽ തട്ടിപ്പ് നടത്തിയിരുന്ന വ്യാജ ആപ്പിൾ കോൾ സെന്റർ ഡൽഹി പൊലീസ് കണ്ടെത്തി പൂട്ടിച്ചു (Fake Apple Call Centre Delhi). നരൈന ഇൻഡസ്ട്രിയൽ ഏരിയയിൽ പ്രവർത്തിച്ചിരുന്ന കേന്ദ്രവുമായി ബന്ധപ്പെട്ട് ഉടമയും പങ്കാളിയും ഉൾപ്പെടെ ഏഴ് പേരെയാണ് പൊലീസ് അറസ്റ്റ് ചെയ്തത്.

അരുൺ, സലിം, നിഖിൽ, മോണ്ടു സിങ്, കരൺ, വിശാൽ എന്നിവരും 26 വയസുള്ള മറ്റൊരാളുമാണ് അറസ്റ്റിലായത്. റെയ്ഡിൽ ലാപ്ടോപ്പുകൾ, മൊബൈൽ ഫോണുകൾ, ക്രെഡിറ്റ്-ഡെബിറ്റ് കാർഡുകൾ, ചെക്ക് ബുക്കുകൾ, ഒരു ഓഡി കാർ എന്നിവയും പൊലീസ് പിടിച്ചെടുത്തു.

യുഎസ് പൗരന്മാരുമായി ആശയവിനിമയം നടത്തുന്നതിനായി വിദേശ പേരുകൾ ഉപയോഗിച്ചിരുന്ന സംഘം ആപ്പിൾ, ഐഒഎസ് ടെക്നിക്കൽ സപ്പോർട്ട് എക്സിക്യൂട്ടീവുകളായി ആൾമാറാട്ടം നടത്തിയെന്നാണ് പ്രാഥമിക അന്വേഷണത്തിലെ കണ്ടെത്തൽ. ടോൾ-ഫ്രീ നമ്പറുകളിലൂടെയായിരുന്നു പ്രധാനമായും ഇവർ ആളുകളെ ബന്ധപ്പെട്ടിരുന്നത്.

ഉപഭോക്താക്കളുടെ ഉപകരണങ്ങളിലോ സിസ്റ്റങ്ങളിലോ വൈറസോ മാൽവെയറോ അശ്ലീല ഉള്ളടക്കമോ കണ്ടെത്തിയതായി തെറ്റിദ്ധരിപ്പിച്ചായിരുന്നു തട്ടിപ്പ്. പ്രശ്നം പരിഹരിക്കാനെന്ന പേരിൽ ഗിഫ്റ്റ് കാർഡുകൾ വാങ്ങാൻ ആവശ്യപ്പെടുകയും പിന്നീട് കാർഡിന്റെ വിവരങ്ങളും കോഡുകളും കൈക്കലാക്കി മറ്റുള്ളവർക്ക് കൈമാറുകയും ചെയ്തിരുന്നതായി പൊലീസ് പറഞ്ഞു.

‘വെപ്ട്ര’ എന്ന പേരിലാണ് സംഘം തട്ടിപ്പ് പ്രവർത്തനം നടത്തിയിരുന്നതെന്നാണ് പൊലീസ് കണ്ടെത്തൽ. രഹസ്യവിവരത്തിന്റെ അടിസ്ഥാനത്തിൽ നടത്തിയ പരിശോധനയിലാണ് കോൾ സെന്ററിന്റെ പ്രവർത്തനം കണ്ടെത്തിയത്.

ടോൾ-ഫ്രീ നമ്പറുകളുടെ ഉറവിടം, ഗിഫ്റ്റ് കാർഡ് ഇടപാടുകൾ, പണമിടപാട് വിവരങ്ങൾ, തട്ടിപ്പിന് പിന്നിലെ വിപുലമായ ശൃംഖല എന്നിവ സംബന്ധിച്ച് പൊലീസ് വിശദമായ അന്വേഷണം തുടരുകയാണ്.

Story Summary:
Delhi Police busted a fake Apple call centre in Naraina Industrial Area that allegedly targeted US citizens through technical-support scams and gift-card fraud. Seven people were arrested, and electronic devices, financial documents and other items were seized during the raid.