റൈറ്റ്- ഓഫ്‌ ചെയ്ത കാറുകളുടെ ചരിത്രം മറച്ചുവെച്ച് വിൽപ്പന; ഡബ്ലിനിൽ കാർ ഡീലർക്ക് പിഴ, സെയിൽസ്മാന് തടവ്

അപകടത്തിൽപ്പെട്ട് ‘റൈറ്റ്-ഓഫ്‌ ആയി രേഖപ്പെടുത്തിയ കാറുകളുടെ ചരിത്രം മറച്ചുവെച്ച് ഉപഭോക്താക്കൾക്ക് വിൽപ്പന നടത്തിയ കേസിൽ ഡബ്ലിനിലെ കാർ ഡീലർക്കും സെയിൽസ്മാനും കോടതി ശിക്ഷ വിധിച്ചു. ലൂക്കനിലെ ലുക്കൻ ഓട്ടോ സെയിൽസിന്റെ ഡീലർ ആയ ബ്രിയൻ ഹെലിയും സെയിൽസ്മാനായ ആൻഡ്രിയസ് മിലിയസ്‌കാശ്യുമാണ് കേസിൽ കുറ്റക്കാരായത്.

അപകടചരിത്രവും വാഹനങ്ങളുടെ ‘റൈറ്റ്- ഓഫ്‌’ നിലയും സംബന്ധിച്ച നിർണായക വിവരങ്ങൾ ഉപഭോക്താക്കളിൽ നിന്ന് മറച്ചുവെച്ചാണ് വാഹനങ്ങൾ വിൽപ്പന നടത്തിയതെന്ന് കോടതിയിൽ വ്യക്തമായി. ഉപഭോക്താക്കൾക്ക് വാഹനത്തിന്റെ യഥാർത്ഥ ചരിത്രം അറിയാനുള്ള അവകാശം നിഷേധിക്കുന്ന തരത്തിലുള്ള വിൽപ്പന രീതിയെയാണ് കോമ്പറ്റിഷൻ ആൻഡ് കോൺസുമർ പ്രൊട്ടക്ഷൻ കമ്മീഷൻ (സിസിപിസി) അന്വേഷണത്തിൽ കണ്ടെത്തിയത്.

കേസിൽ ഉൾപ്പെട്ട പ്രധാന വാഹനങ്ങളിലൊന്ന് 2016 രജിസ്ട്രേഷനുള്ള ഫോർഡ്ഫോക്കസ് ആയിരുന്നു. 2023 മാർച്ചിലുണ്ടായ അപകടത്തെ തുടർന്ന് വാഹനം ‘റൈറ്റ്- ഓഫ്‌’ ആയി രേഖപ്പെടുത്തിയിരുന്നു. പിന്നീട് വാഹനം അറ്റകുറ്റപ്പണികൾ നടത്തി ഏകദേശം €11,500-ന് വിൽപ്പന നടത്തി. എന്നാൽ വാഹനത്തിന്റെ അപകടചരിത്രം വാങ്ങുന്നയാളോട് വെളിപ്പെടുത്തിയില്ലെന്നാണ് കേസ്.മറ്റൊരു വാഹനമായ 2014 രജിസ്ട്രേഷനുള്ള ഓഡി എ5 2017-ൽ യുകെയിൽ അപകടത്തിൽപ്പെട്ട് ‘റൈറ്റ്-ഓഫ്‌’ ആയി രേഖപ്പെടുത്തിയിരുന്നു.

ഈ ചരിത്രവും മറച്ചുവെച്ച് വാഹനം ഏകദേശം €14,000-ന് വിൽപ്പന നടത്തി. പിന്നീട് വാഹനത്തിന്റെ മുൻകാല അപകടചരിത്രം ഉപഭോക്താവ് കണ്ടെത്തുകയും വാഹനം തിരികെ നൽകുകയും ചെയ്തു.വാഹനം തിരികെ ലഭിച്ചതിന് ശേഷവും അതിന്റെ അപകടചരിത്രം വ്യക്തമാക്കാതെ വീണ്ടും വിൽപ്പനയ്ക്ക് പരസ്യം നൽകിയതായും അന്വേഷണത്തിൽ കണ്ടെത്തി.

കേസിൽ ആൻഡ്രിയസ് മിലിയസ്‌കാശ്ആറ് കുറ്റങ്ങൾ സമ്മതിച്ചതിനെ തുടർന്ന് കോടതി നാല് മാസം തടവിന് ശിക്ഷിച്ചു. വിധിക്കെതിരെ അപ്പീൽ നൽകിയതിനെ തുടർന്ന് €5,000 ജാമ്യത്തിൽ വിട്ടയച്ചു.ബ്രിയൻ ഹെലി നാല് കുറ്റങ്ങൾ സമ്മതിച്ചു. അദ്ദേഹത്തിന് €1,500 പിഴ ചുമത്തിയ കോടതി, സിസിപിസിയുടെ നിയമനടപടി ചെലവായി €3,567 നൽകാനും ഒരു ഉപഭോക്താവിന് €1,994 നഷ്ടപരിഹാരം നൽകാനും ഉത്തരവിട്ടു.ഉപഭോക്താക്കൾക്ക് വാഹനത്തിന്റെ യഥാർത്ഥ അവസ്ഥയും മുൻകാല ചരിത്രവും സംബന്ധിച്ച കൃത്യമായ വിവരങ്ങൾ നൽകേണ്ടത് കാർ വ്യാപാരികളുടെ നിയമപരമായ ബാധ്യതയാണ്.