പഞ്ചാബ് കോൺഗ്രസിൽ വൻ നേതൃമാറ്റത്തിന് വഴിതുറന്ന് സച്ചിൻ പൈലറ്റിന്റെ നിർണായക റിപ്പോർട്ട്: പി.സി.സി അധ്യക്ഷൻ രാജ വാറിംഗിനോട് രാജിവെക്കാൻ ഹൈക്കമാൻഡ് നിർദ്ദേശം നൽകി; മുതിർന്ന നേതാക്കളുടെയും എം.പിമാരുടെയും കടുത്ത എതിർപ്പിന് പിന്നാലെ അധ്യക്ഷ കസേര തെറിക്കുന്നു; വിജയ് ഇന്ദർ സിംഗ്ല പുതിയ അധ്യക്ഷനായേക്കും
Current: മലയാളം
ചണ്ഡീഗഡ്: വരാനിരിക്കുന്ന നിയമസഭാ തിരഞ്ഞെടുപ്പ് മുന്നില്‍ക്കണ്ട് പഞ്ചാബ് കോണ്‍ഗ്രസില്‍ വന്‍ നേതൃമാറ്റത്തിന് വഴിതുറക്കുന്നു. പഞ്ചാബിന്റെ ചുമതലയുള്ള എ.ഐ.സി.സി ജനറല്‍ സെക്രട്ടറിയായി സച്ചിന്‍ പൈലറ്റ് ചുമതലയേറ്റതിന് പിന്നാലെ നല്‍കിയ നിര്‍ണായക റിപ്പോര്‍ട്ടിന്റെ അടിസ്ഥാനത്തില്‍ സംസ്ഥാന അധ്യക്ഷന് അമരീന്ദര്‍ സിംഗ് രാജ വാറിംഗിനോട് രാജിവെക്കാന്‍ ഹൈക്കമാന്‍ഡ് നിര്‍ദ്ദേശിച്ചു.
സെപ്റ്റംബര്‍ 5-ന് ഭൂപേഷ് ബാഗേലിന് പകരക്കാരനായി ചുമതലയേറ്റ പൈലറ്റ്, മൂന്ന് ആഴ്ചയായി നടത്തിയ സമഗ്രമായ കൂടിയാലോചനകള്‍ക്ക് ശേഷമാണ് പാര്‍ട്ടി നേതൃത്വത്തിന് റിപ്പോര്‍ട്ട് നല്‍കിയത്.
സംസ്ഥാനത്തെ ഭൂരിപക്ഷം ലോക്‌സഭാ എം.പിമാരും മുതിര്‍ന്ന നേതാക്കളും നേതൃമാറ്റം ആവശ്യപ്പെട്ടതോടെയാണ് ഈ നീക്കം. മുന്‍ മുഖ്യമന്ത്രി ചരണ്‍ജിത് സിംഗ് ചന്നിയുമായി സഹകരിച്ച് പ്രവര്‍ത്തിക്കാനും പ്രാദേശിക-സാമുദായിക സമവാക്യങ്ങള്‍ പാലിക്കാനും പുതിയ അധ്യക്ഷന് സാധിക്കുമെന്നാണ് വിലയിരുത്തല്‍.
നേരത്തെ ചുമതലയിലുണ്ടായിരുന്ന ഭൂപേഷ് ബാഗേല്‍ രാജ വാറിംഗിനെ പിന്തുണയ്ക്കുകയും നേതൃമാറ്റം തള്ളിക്കളയുകയും ചെയ്തിരുന്ന സ്ഥാനത്താണ് സച്ചിന്‍ പൈലറ്റിന്റെ ഇടപെടല്‍ വഴിത്തിരിവായത്.
‘രാഷ്ട്രീയത്തില്‍ തിരുത്തലുകള്‍ വരുത്താന്‍ ഒരിക്കലും വൈകിയിട്ടില്ല’ എന്ന് പൈലറ്റ് വ്യക്തമാക്കി. പുതിയ പി.സി.സി അധ്യക്ഷനായി മുന്‍ കേന്ദ്രമന്ത്രി വിജയ് ഇന്ദര്‍ സിംഗ്ലയുടെ പേരിനാണ് മുന്‍തൂക്കം.
ഒരു ഹിന്ദു മുഖത്തെ അധ്യക്ഷനാക്കുന്നതിലൂടെ പാര്‍ട്ടിയിലെ ആഭ്യന്തര തര്‍ക്കങ്ങള്‍ പരിഹരിക്കാനും സാമുദായിക സന്തുലിതാവസ്ഥ ഉറപ്പാക്കാനും സാധിക്കുമെന്നാണ് കണക്കുകൂട്ടല്‍. കൂടാതെ, പ്രതിപക്ഷ നേതാവ് പ്രതാപ് സിംഗ് ബജ്വ, സുഖ്ജീന്ദര്‍ സിംഗ് രണ്‍ധാവ എന്നിവര്‍ക്ക് കൂടുതല്‍ ചുമതലകള്‍ നല്‍കി ജാട്ട് സിഖ് വിഭാഗത്തിന്റെ പ്രാതിനിധ്യവും ഉറപ്പാക്കാന്‍ കോണ്‍ഗ്രസ് പദ്ധതിയിടുന്നു.
