പഴനിയിലെ 100 കോടിയുടെ ക്ഷേത്രഭൂമി തട്ടിപ്പ്: കേസിൽ രണ്ട് പേർ കൂടി അറസ്റ്റിൽ; ഒക്ടോബർ 21 വരെ ജുഡീഷ്യൽ കസ്റ്റഡിയിൽ റിമാൻഡ് ചെയ്തു | Palani 100 crore land scam case arrests
ദിണ്ഡിക്കൽ/പഴനി: പഴനി ദണ്ഡായുധപാണി സ്വാമി ക്ഷേത്ര മഠത്തിന് (Palani 100 crore land scam case arrests) അവകാശപ്പെട്ട 100 കോടി രൂപയിലധികം വിലമതിക്കുന്ന 1.4 ഏക്കർ ഭൂമി വ്യാജ രേഖകളുണ്ടാക്കി തട്ടിയെടുത്ത കേസിൽ രണ്ട് പേർ കൂടി അറസ്റ്റിൽ. സസ്പെൻഷനിലുള്ള സബ് രജിസ്ട്രാർ ഓഫീസ് ജൂനിയർ അസിസ്റ്റന്റ് ശിവശങ്കരി, അഭിഭാഷകനായ ശിവകുമാർ എന്നിവരെയാണ് സി.ബി-സി.ഐ.ഡി (CB-CID) സംഘം അറസ്റ്റ് ചെയ്തത്.
കേസിൽ അറസ്റ്റിലായ ഇരുവരെയും ദിണ്ഡിക്കൽ കോടതിയിൽ ഹാജരാക്കി ഒക്ടോബർ 21 വരെ ജുഡീഷ്യൽ കസ്റ്റഡിയിൽ റിമാൻഡ് ചെയ്തു. തുടർന്ന് പ്രതികളെ മധുര സെൻട്രൽ ജയിലിലേക്ക് മാറ്റി. ഇതോടെ ഈ ഭൂമി തട്ടിപ്പ് കേസിൽ അറസ്റ്റിലായവരുടെ എണ്ണം എട്ടായി ഉയർന്നു. കേസിൽ നേരത്തെ സസ്പെൻഷനിലായ സബ് രജിസ്ട്രാർ ജസ്റ്റിൻ മണികണ്ഠൻ സുബ്രഹ്മണ്യൻ, ആധാരം എഴുത്തുകാരൻ ജയപ്രകാശ് ഉൾപ്പെടെയുള്ളവർ അറസ്റ്റിലായിരുന്നു.
ക്ഷേത്ര ഭൂമി നിയമവിരുദ്ധമായി സ്വകാര്യ വ്യക്തികളുടെ പേരിലേക്ക് ആധാരം ചെയ്തു നൽകിയതിലാണ് സി.ബി-സി.ഐ.ഡി ശക്തമായ അന്വേഷണം നടത്തുന്നത്. വ്യാജ രേഖകൾ ചമച്ചതിലും കോടികളുടെ ഭൂമി തട്ടിയെടുത്തതിലും പങ്കുള്ള കൂടുതൽ പ്രമുഖരെ കണ്ടെത്തുന്നതിനായി അന്വേഷണം പുരോഗമിക്കുകയാണെന്ന് പൊലീസ് അറിയിച്ചു.




