ജോലിസ്ഥലത്ത് ജെൻ സി സഹപ്രവർത്തകന്റെ സ്ലാങ് പ്രയോഗം അതിരുകടക്കുന്നു; റെഡ്ഡിറ്റ് പോസ്റ്റ് ചർച്ചയാകുന്നു | Gen Z coworker slang at workplace

ജോലിസ്ഥലത്ത് ജെൻ സി തലമുറയിൽപ്പെട്ട സഹപ്രവർത്തകന്റെ പെരുമാറ്റത്തിൽ അതൃപ്തി പ്രകടിപ്പിച്ച് ജീവനക്കാരൻ റെഡ്ഡിറ്റിൽ പങ്കുവെച്ച കുറിപ്പ് ചർച്ചയാകുന്നു. സംസാരത്തിനിടെ അമിതമായി സ്ലാങ് വാക്കുകൾ ഉപയോഗിക്കുന്നതും ജോലിയിൽ വേണ്ടത്ര ശ്രദ്ധ കാണിക്കാത്തതും സ്വന്തം ചുമതലയിൽപ്പെടാത്ത കാര്യങ്ങളിൽ ഇടപെടുന്നതുമാണ് സഹപ്രവർത്തകനെക്കുറിച്ചുള്ള പ്രധാന പരാതികൾ. പോസ്റ്റിന് പിന്നാലെ യുവതലമുറയിലെ ജീവനക്കാരുമായുള്ള തങ്ങളുടെ അനുഭവങ്ങളും നിരവധി പേർ പങ്കുവെച്ചു. (Gen Z coworker slang at workplace)

കോളജ് പഠനം കഴിഞ്ഞ് ജോലിയിൽ പ്രവേശിച്ച സഹപ്രവർത്തകനുമായുള്ള അനുഭവങ്ങളാണ് ‘എന്റെ ‘ജെൻ-സി’ സഹപ്രവർത്തകനെക്കുറിച്ചുള്ള രോഷപ്രകടനം’ എന്ന തലക്കെട്ടിൽ ഉപയോക്താവ് പങ്കുവെച്ചത്. താൻ സഹപ്രവർത്തകന്റെ മെന്ററല്ലെന്നും എന്നാൽ അമിതമായി സൗഹൃദം പുലർത്തിയത് തെറ്റായി വ്യാഖ്യാനിക്കപ്പെട്ടിരിക്കാമെന്നും പോസ്റ്റിൽ പറയുന്നു. രാവിലെ മറ്റുള്ളവരെ അഭിവാദ്യം ചെയ്യുമ്പോൾ ‘ബ്രോ’ പോലുള്ള അനൗപചാരിക വാക്കുകൾ ആവർത്തിച്ച് ഉപയോഗിക്കുന്നതും മറുപടികളിൽ വലിയ താൽപ്പര്യം കാണിക്കാത്തതും ആദ്യം പ്രശ്നമായി തോന്നിയിരുന്നില്ലെന്നും പിന്നീട് ഇത് അലോസരപ്പെടുത്തിയെന്നും ഉപയോക്താവ് വ്യക്തമാക്കി.

rant against my genz coworker
by
u/parkas-subodh-pankaj in
IndianWorkplace

മാനേജരിൽനിന്നും മെന്ററിൽനിന്നും നിരവധി തവണ നിർദേശങ്ങളും അഭിപ്രായങ്ങളും ലഭിച്ചിട്ടും സഹപ്രവർത്തകൻ കാര്യമായി ജോലി ചെയ്യുന്നില്ലെന്നാണ് മറ്റൊരു ആരോപണം. ഓഫിസിൽ സ്വന്തം വീടുപോലെ പെരുമാറുന്നുവെന്നും ഉപയോക്താവ് വിമർശിച്ചു. മാനേജർക്കൊപ്പം ഒരു സാങ്കേതിക പ്രശ്നം പരിഹരിക്കുന്നതിനിടെ സഹപ്രവർത്തകൻ ഇടപെട്ട് ലോഗുകൾ പരിശോധിച്ചോയെന്നും മാൽവെയർ പ്രശ്നത്തിന് കാരണമാണോയെന്നും ചോദിച്ച സംഭവവും പോസ്റ്റിൽ വിവരിക്കുന്നുണ്ട്. ആ സമയത്ത് ഇത്തരമൊരു ഇടപെടൽ എന്തിനാണെന്നായിരുന്നു ഉപയോക്താവിന്റെ ചോദ്യം. സഹപ്രവർത്തകന്റെ സംസാരരീതിയെക്കുറിച്ചും പോസ്റ്റിൽ പരാമർശമുണ്ട്. ശബ്ദം കൃത്രിമമായി ഗൗരവമുള്ളതാക്കാൻ ശ്രമിക്കുന്നതുപോലെ തോന്നുന്നുവെന്നും അതിനാൽ സംസാരിക്കുന്നത് മനസ്സിലാക്കാൻ ബുദ്ധിമുട്ടുണ്ടെന്നും ഉപയോക്താവ് ആരോപിച്ചു. എന്നാൽ ഇതെല്ലാം പോസ്റ്റ് പങ്കുവെച്ച വ്യക്തിയുടെ അനുഭവങ്ങളും അഭിപ്രായങ്ങളുമാണ്.

പോസ്റ്റിന് താഴെ വന്ന പ്രതികരണങ്ങളിൽ ജെൻ സി ജീവനക്കാരെക്കുറിച്ച് വ്യത്യസ്ത അഭിപ്രായങ്ങളാണ് ഉയർന്നത്. ചില യുവ ജീവനക്കാർ കഴിവുള്ളവരും പുതിയ കാര്യങ്ങൾ പഠിക്കാൻ താൽപ്പര്യമുള്ളവരുമാണെന്ന് ഒരാൾ അഭിപ്രായപ്പെട്ടു. എന്നാൽ മറ്റു ചിലർ ജോലിയോടുള്ള ഉത്തരവാദിത്തം കാണിക്കാത്തവരാണെന്നും വിമർശനമുയർന്നു. ജെൻ സി ജീവനക്കാരെ കഴിവുള്ളവരെന്ന് വിശേഷിപ്പിച്ചവരുമുണ്ട്. തലമുറയുടെ പേരിൽ എല്ലാവരെയും ഒരേ രീതിയിൽ വിലയിരുത്താനാകില്ലെന്ന ചർച്ചയ്ക്കും ഈ പോസ്റ്റ് വഴിയൊരുക്കി.

Summary: A Reddit user’s complaints about a Gen Z coworker’s frequent slang, alleged lack of focus and workplace behaviour have sparked an online debate. Several commenters shared contrasting experiences, with some praising young employees’ talent and willingness to learn while others criticised unprofessional conduct.