‘പാർലമെന്റിനെ ബുൾഡോസർ ചെയ്യാൻ ശ്രമിക്കരുത്’; മണ്ഡല പുനർനിർണയത്തിൽ സർവകക്ഷി യോഗം ആവശ്യപ്പെട്ട് മോദിക്ക് ഖാർഗെയുടെ നാലാമത്തെ കത്ത് | Mallikarjun Kharge letter to Narendra Modi

മണ്ഡല പുനർനിർണയ (ഡീലിമിറ്റേഷൻ) നിർദേശങ്ങൾ പാർലമെന്റിൽ അവതരിപ്പിക്കുന്നതിന് മുമ്പ് സർവകക്ഷി യോഗം വിളിക്കണമെന്ന് ആവശ്യപ്പെട്ട് പ്രധാനമന്ത്രി നരേന്ദ്ര മോദിക്ക് നാലാമത്തെ കത്തയച്ച് കോൺഗ്രസ് അധ്യക്ഷനും രാജ്യസഭയിലെ പ്രതിപക്ഷ നേതാവുമായ മല്ലികാർജുൻ ഖാർഗെ (Mallikarjun Kharge letter to Narendra Modi). ഭരണഘടനാപരമായ പ്രാധാന്യമുള്ള വിഷയത്തിൽ രാഷ്ട്രീയ പാർട്ടികളുമായി കൂടിയാലോചന നടത്താതെ സർക്കാർ ഏകപക്ഷീയമായി മുന്നോട്ടുപോകരുതെന്ന് അദ്ദേഹം കത്തിൽ ആവശ്യപ്പെട്ടു.

2026 ഓഗസ്റ്റ് 13-ന് അനിശ്ചിതകാലത്തേക്ക് പിരിഞ്ഞ പാർലമെന്റിന്റെ വർഷകാല സമ്മേളനം ഇതുവരെ ഔദ്യോഗികമായി അവസാനിപ്പിച്ചിട്ടില്ലെന്ന കാര്യവും ഖാർഗെ ചൂണ്ടിക്കാട്ടി. രാഷ്ട്രപതിയുടെ ഔദ്യോഗിക ഉത്തരവിലൂടെ സമ്മേളനം അവസാനിപ്പിക്കുന്ന നടപടിയായ പ്രൊറോഗേഷൻ നടന്നിട്ടില്ലെന്ന് അദ്ദേഹം പറഞ്ഞു. ഇത്തരമൊരു സാഹചര്യം അസാധാരണമാണെന്നും പാർലമെന്റ് പെട്ടെന്ന് വീണ്ടും ചേരുമെന്നോ സമ്മേളനം നീട്ടുമെന്നോ ഉള്ള ഊഹാപോഹങ്ങൾക്ക് ഇത് ഇടയാക്കുന്നുവെന്നും ഖാർഗെ കത്തിൽ വ്യക്തമാക്കി.

മണ്ഡല പുനർനിർണയവുമായി ബന്ധപ്പെട്ട ഭരണഘടനാ ഭേദഗതി ബിൽ സർക്കാർ നേരത്തേ മതിയായ കൂടിയാലോചനയില്ലാതെ അവതരിപ്പിക്കാൻ ശ്രമിച്ചതായും ഖാർഗെ ആരോപിച്ചു. ഏപ്രിൽ 14-ന് വൈകിട്ടാണ് ബില്ലുകൾ പുറത്തുവിട്ടതെന്നും ഏപ്രിൽ 16-ന് പ്രത്യേക സമ്മേളനം വിളിച്ചുചേർത്തതെന്നും അദ്ദേഹം ഓർമിപ്പിച്ചു. ആവശ്യമായ മൂന്നിൽ രണ്ട് ഭൂരിപക്ഷം ലഭിക്കാത്തതിനെത്തുടർന്ന് ഏപ്രിൽ 17-ന് ലോക്‌സഭയിൽ ബിൽ പരാജയപ്പെട്ടതായും കത്തിൽ ചൂണ്ടിക്കാട്ടി.

ഏപ്രിൽ 11, ജൂലൈ 16, ഓഗസ്റ്റ് 27 തീയതികളിൽ സർവകക്ഷി യോഗം ആവശ്യപ്പെട്ട് താൻ പ്രധാനമന്ത്രിക്ക് കത്തയച്ചിരുന്നുവെന്നും ഖാർഗെ പറഞ്ഞു. പുതിയ കത്ത് ഈ വിഷയത്തിൽ നടത്തുന്ന നാലാമത്തെ ഔദ്യോഗിക ശ്രമമാണെന്നും അദ്ദേഹം വ്യക്തമാക്കി. പുതിയ മണ്ഡല പുനർനിർണയ നിർദേശങ്ങൾ അന്തിമമാക്കി പാർലമെന്റിൽ അവതരിപ്പിക്കുന്നതിന് മുമ്പ് എല്ലാ രാഷ്ട്രീയ പാർട്ടികൾക്കും പ്രാദേശിക പ്രതിനിധികൾ ഉൾപ്പെടെയുള്ള ബന്ധപ്പെട്ട കക്ഷികൾക്കും വിശദമായി ചർച്ച ചെയ്യാൻ മതിയായ സമയം നൽകണമെന്ന് ഖാർഗെ ആവശ്യപ്പെട്ടു. പ്രധാനപ്പെട്ട ഭരണഘടനാ ഭേദഗതികൾ ധൃതിപിടിച്ച് നടപ്പാക്കാൻ ശ്രമിക്കരുതെന്നും പാർലമെന്റിൽ സമവായം ഉറപ്പാക്കണമെന്നും അദ്ദേഹം കത്തിൽ പറഞ്ഞു.

Summary: Congress president and Rajya Sabha Opposition Leader Mallikarjun Kharge has written his fourth letter to Prime Minister Narendra Modi, seeking an all-party meeting on proposed delimitation changes. He raised concerns over the pending formal prorogation of Parliament’s Monsoon Session and urged the government to avoid rushing major constitutional amendments without wider consultation.