‘സൽമാൻ ഖാനുമായി ബന്ധം പുലർത്തുന്നവരെ ലക്ഷ്യം വയ്ക്കും’: ടൈഗർ ഷ്രോഫിന് നേരെയുള്ള വധശ്രമത്തിൽ ലോറൻസ് ബിഷ്ണോയ് സംഘത്തിലെ അനിൽ പണ്ഡിറ്റും ഹർമാൻ സന്ധുവും | Tiger Shroff

മുംബൈ: ബോളിവുഡ് താരം ടൈഗർ ഷ്രോഫിന്റെ കാറിന് നേരെ അജ്ഞാതർ വെടിയുതിർത്ത സംഭവത്തിൽ ലോറൻസ് ബിഷ്ണോയ് ഗ്യാങ് പങ്കാളിയെന്ന് സ്ഥിരീകരണം. സംഭവത്തിന്റെ ഉത്തരവാദിത്തം ഏറ്റെടുത്ത് കുപ്രസിദ്ധ ഗ്യാങ്സ്റ്റർ ലോറൻസ് ബിഷ്ണോയിയുടെ കൂട്ടാളികളായ അനിൽ പണ്ഡിറ്റും ഹർമാൻ സന്ധുവും രംഗത്തെത്തി. സൽമാൻ ഖാനുമായി ബന്ധം പുലർത്തുന്നവരും ഒപ്പം പ്രവർത്തിക്കുന്നവരും ലക്ഷ്യത്തിൽപ്പെടുമെന്നാണ് ഇവരുടെ ഭീഷണി.(Tiger Shroff Firing Incident Lawrence Bishnoi Gang Attack Mumbai)

ഞായറാഴ്ച വൈകുന്നേരം മുംബൈയിലെ ജുഹു മേഖലയിലായിരുന്നു സംഭവം. ക്ലബ്ബിൽ ഫുട്ബോൾ കളി കഴിഞ്ഞ് മടങ്ങുകയായിരുന്ന ടൈഗർ ഷ്രോഫ് തന്റെ ബി.എം.ഡബ്ല്യു കാറിലേക്ക് കയറുന്നതിനിടയിലാണ് മോട്ടോർ സൈക്കിളിലെത്തിയ മൂന്നംഗ സംഘം വെടിയുതിർത്തത്. അഞ്ച് റൗണ്ടോളം വെടിയുണ്ടകളാണ് കാറിനു നേരെ ഉതിർത്തത്. സംഭവത്തിൽ ടൈഗർ ഷ്രോഫ് അത്ഭുതകരമായി രക്ഷപ്പെട്ടെങ്കിലും, അദ്ദേഹത്തിന്റെ ഡ്രൈവർ ഫിർദോസിനും ഒരു ഓട്ടോ ഡ്രൈവർക്കും മറ്റൊരാൾക്കും പരിക്കേറ്റു. പരിക്കേറ്റവരെ ഉടൻ തന്നെ നാനാവതി ആശുപത്രിയിൽ പ്രവേശിപ്പിച്ചു. ഡ്രൈവർ ഫിർദോസിന്റെ കൈയ്ക്കാണ് വെടിയേറ്റത്.

സാമൂഹിക മാധ്യമങ്ങളിലൂടെയാണ് അനിൽ പണ്ഡിറ്റും ഹർമാൻ സന്ധുവും ആക്രമണത്തിന്റെ ഉത്തരവാദിത്തം ഏറ്റെടുത്തത്. മുന്നറിയിപ്പുകൾ അവഗണിച്ചതിനെ തുടർന്നാണ് ടൈഗർ ഷ്രോഫിനെതിരെ നടപടിയെടുത്തതെന്നും പോസ്റ്റിൽ പറയുന്നു. സൽമാൻ ഖാനൊപ്പം പ്രവർത്തിക്കുന്നത് തുടരുന്നവർക്ക് കടുത്ത പ്രത്യാഘാതങ്ങൾ നേരിടേണ്ടി വരുമെന്നും ഭീഷണിയുണ്ട്.

ഡൽഹിയിലും പഞ്ചാബിലും സമാനമായ പല ആക്രമണങ്ങളിലും ഇവർ പ്രതികളാണെന്ന് പോലീസിന് വിവരം ലഭിച്ചിട്ടുണ്ട്. ലോറൻസ് ബിഷ്ണോയ് ഗ്യാങ്ങിനുള്ളിൽ തങ്ങളുടെ സ്വാധീനവും റാങ്കും വർദ്ധിപ്പിക്കുന്നതിന്റെ ഭാഗമായാണ് ഇവർ ഇത്തരം ആക്രമണങ്ങൾ ആസൂത്രണം ചെയ്യുന്നതെന്നാണ് പോലീസിന്റെ നിഗമനം. നിലവിൽ മുംബൈ പോലീസും സൈബർ സെല്ലും സോഷ്യൽ മീഡിയ പോസ്റ്റുകളുടെ ആധികാരികത പരിശോധിക്കുകയും പ്രതികൾക്കായി അന്വേഷണം ഊർജിതമാക്കുകയും ചെയ്തിട്ടുണ്ട്.

Story Summary

Bollywood actor Tiger Shroff escaped unhurt after motorcycle-borne assailants opened fire at his car in Mumbai’s Juhu area, injuring three people including his driver. The Lawrence Bishnoi gang, through associates Anil Pandit and Harman Sandhu, claimed responsibility for the attack, issuing a stern warning to anyone associated with actor Salman Khan.