ഫ്രാൻസിൽ കലാപവും കൊള്ളയും; സുരക്ഷാ വീഴ്ചയിൽ സർക്കാരിനെതിരെ മേയർമാർ, ആഭ്യന്തരമന്ത്രിയുടെ രാജി തള്ളി മാക്രോൺ | France Unrest
Current: മലയാളം
ഫ്രാൻസിൽ വാരാന്ത്യത്തിലുണ്ടായ വ്യാപക അക്രമങ്ങളിലും കൊള്ളയിലും സുരക്ഷാ സംവിധാനങ്ങളുടെ വീഴ്ച ചൂണ്ടിക്കാട്ടി സർക്കാരിനെതിരെ വിമർശനം ശക്തമാകുന്നു. പാരിസ്, മാർസെയിൽ, ലിയോൺ നഗരങ്ങളിലെ മേയർമാർ സുരക്ഷാ മുന്നൊരുക്കങ്ങളിലെ പോരായ്മകൾക്ക് സർക്കാരിനോട് വിശദീകരണം ആവശ്യപ്പെട്ടു. അതേസമയം, ആഭ്യന്തരമന്ത്രി ലോറന്റ് നുനെസിന്റെ രാജി വാഗ്ദാനം പ്രസിഡന്റ് ഇമ്മാനുവൽ മാക്രോൺ നിരസിച്ചു. (France Unrest)
ജീവിതച്ചെലവിലെ വർധനയും പൊതുസേവനങ്ങളുടെ തകർച്ചയുമടക്കമുള്ള വിഷയങ്ങളിൽ ആഴ്ചകളായി വിദ്യാർഥി പ്രതിഷേധങ്ങൾ നടന്നുവരികയായിരുന്നു. ഇതിനിടെയാണ് ശനിയാഴ്ച രാജ്യത്തിന്റെ വിവിധ ഭാഗങ്ങളിൽ പ്രതിഷേധങ്ങൾ അക്രമാസക്തമായത്. പലയിടങ്ങളിലും സമാധാനപരമായി തുടങ്ങിയ പ്രകടനങ്ങൾ പിന്നീട് അക്രമികൾ ഏറ്റെടുത്തതോടെ കടകൾ കൊള്ളയടിക്കുകയും കെട്ടിടങ്ങൾ തകർക്കുകയും ചെയ്തു. അടുത്ത വർഷം നടക്കാനിരിക്കുന്ന പ്രസിഡന്റ് തിരഞ്ഞെടുപ്പിന് ആറുമാസം മാത്രം ശേഷിക്കെ ഉണ്ടായ സംഭവങ്ങൾ സർക്കാരിന് കൂടുതൽ സമ്മർദമുണ്ടാക്കുകയാണ്.
പാരിസ്, മാർസെയിൽ, ലിയോൺ നഗരങ്ങളിലെ മേയർമാർ ഫ്രഞ്ച് പത്രമായ ലിബറേഷനിൽ പ്രസിദ്ധീകരിച്ച സംയുക്ത ലേഖനത്തിലാണ് സുരക്ഷാ വീഴ്ചയെ വിമർശിച്ചത്. സാധാരണയായി പ്രതിഷേധങ്ങൾ കൈകാര്യം ചെയ്യുന്നതിൽ പരിചയമുള്ളവരാണെങ്കിലും ഇത്തവണ നഗരങ്ങളുടെ പല ഭാഗങ്ങളും സംരക്ഷണമില്ലാതെ ഉപേക്ഷിക്കപ്പെട്ടതുപോലെയാണ് തോന്നിയതെന്ന് അവർ പറഞ്ഞു. അക്രമത്തിൽ തകർന്ന നഗരങ്ങളെ പുനഃസ്ഥാപിക്കുന്നതിനൊപ്പം ജനങ്ങളുടെ രോഷവും നേരിടേണ്ടിവരുന്നുവെന്നും മേയർമാർ ചൂണ്ടിക്കാട്ടി.
ശനിയാഴ്ച 60,000 പൊലീസുകാരെയും മറ്റ് സുരക്ഷാ ഉദ്യോഗസ്ഥരെയും വിന്യസിച്ചിരുന്നതായി ആഭ്യന്തരമന്ത്രി ലോറന്റ് നുനെസ് അറിയിച്ചു. എന്നാൽ ചില നഗരങ്ങളിൽ അക്രമാസക്തരായ ജനക്കൂട്ടത്തെ നിയന്ത്രിക്കാൻ ഈ സന്നാഹം മതിയായില്ലെന്നും അദ്ദേഹം സമ്മതിച്ചു. സംഭവങ്ങളുടെ പശ്ചാത്തലത്തിൽ നുനെസ് രാജിവയ്ക്കാൻ സന്നദ്ധത അറിയിച്ചെങ്കിലും മാക്രോൺ അത് നിരസിച്ചു. അതേസമയം, ബാരിക്കേഡുകളും കൊള്ളയും അവസാനിപ്പിക്കാൻ പുതിയ നടപടികൾ സ്വീകരിക്കണമെന്നും അക്രമത്തിലേക്ക് നയിച്ച രഹസ്യാന്വേഷണ-മുന്നൊരുക്ക വീഴ്ചകളെക്കുറിച്ച് സുതാര്യമായ വിശദീകരണം നൽകണമെന്നും പ്രസിഡന്റ് ആവശ്യപ്പെട്ടു. പാരിസിൽ മാത്രം വാരാന്ത്യത്തിൽ 300 മുതൽ 400 വരെ വ്യാപാരസ്ഥാപനങ്ങൾ നശിപ്പിക്കപ്പെട്ടതായി പാരിസ് ചേംബർ ഓഫ് കൊമേഴ്‌സ് മേധാവി ഡൊമിനിക് റെസ്റ്റിനോ പറഞ്ഞു. ആഡംബര ബ്രാൻഡുകളുടെ കടകൾക്ക് നേരെയും ആക്രമണമുണ്ടായി. മാർസെയിലിൽ ഫുട്ബോൾ ക്ലബായ ഒളിമ്പിക് ഡി മാർസെയുടെ ഔദ്യോഗിക സ്റ്റോറും കൊള്ളയടിക്കപ്പെട്ടു. നഗരത്തിൽ പൊതുയോഗങ്ങൾക്കും പ്രകടനങ്ങൾക്കും നിരോധനം ഏർപ്പെടുത്തിയിട്ടുണ്ട്. അതേസമയം, നവംബർ അഞ്ചിന് രാജ്യവ്യാപക പണിമുടക്കിനും പ്രതിഷേധങ്ങൾക്കും ഫ്രഞ്ച് തൊഴിലാളി സംഘടനകൾ ആഹ്വാനം ചെയ്തു.
അക്രമത്തിന്റെ പ്രത്യാഘാതം സാമ്പത്തിക മേഖലയിലും പ്രകടമായി. തിങ്കളാഴ്ച വ്യാപാരത്തിന്റെ തുടക്കത്തിൽ ഫ്രാൻസിന്റെ CAC 40 ഓഹരി സൂചിക 1.3 ശതമാനം ഇടിഞ്ഞു. രാജ്യത്തിന്റെ പത്തുവർഷ സർക്കാർ ബോണ്ടിന്റെ ആദായം എട്ട് ബേസിസ് പോയിന്റ് ഉയർന്ന് 4.86 ശതമാനത്തിലെത്തി. ജീവിതച്ചെലവ്, ഉയർന്ന ഇന്ധനവില, പൊതുസേവനങ്ങളിലെ പ്രശ്നങ്ങൾ എന്നിവയുമായി ബന്ധപ്പെട്ട പ്രതിഷേധങ്ങൾ യൂറോപ്പിലെ മറ്റ് രാജ്യങ്ങളിലും അരങ്ങേറിയിരുന്നു. ഫ്രാൻസിലേക്ക് യാത്ര ചെയ്യുന്നവർ വലിയ ജനക്കൂട്ടങ്ങളിൽനിന്ന് വിട്ടുനിൽക്കണമെന്നും ജാഗ്രത പാലിക്കണമെന്നും ചില യൂറോപ്യൻ സർക്കാരുകൾ മുന്നറിയിപ്പ് നൽകിയിട്ടുണ്ട്.
Summary: France is facing renewed political pressure after weekend riots, looting and vandalism across major cities. President Emmanuel Macron rejected Interior Minister Laurent Nunez’s offer to resign but demanded action and transparency over alleged intelligence and security failures. French unions have called for nationwide strikes and demonstrations on November 5.
