ചെന്താമര കൊലപ്പെടുത്തിയ നെന്മാറ സുധാകരന്റെ മകൾക്ക് ജോലി; അടിയന്തര ഇടപെടൽ ഉറപ്പുനൽകി രമേശ് ചെന്നിത്തല | Nenmara Sudhakaran case
Current: മലയാളം
പാലക്കാട്: നെന്മാറ പോത്തുണ്ടിയിൽ കൊല്ലപ്പെട്ട സുധാകരന്റെ (Nenmara Sudhakaran case) കുടുംബത്തിന് ആശ്വാസമായി മകൾക്ക് ജോലി ലഭ്യമാക്കുന്നതിനുള്ള നടപടികൾ വേഗത്തിലാക്കുമെന്ന് രമേശ് ചെന്നിത്തല ഉറപ്പുനൽകിയതായി കുടുംബാംഗങ്ങൾ. വിഷയത്തിൽ അടിയന്തരമായി ഇടപെടുമെന്നും മുഖ്യമന്ത്രിയുമായി സംസാരിച്ച് തുടർനടപടികൾ വേഗത്തിലാക്കുമെന്നും അദ്ദേഹം അറിയിച്ചതായി കുടുംബം വ്യക്തമാക്കി.
കേസിൽ വിധി പ്രസ്താവിച്ചപ്പോൾ സുധാകരന്റെ മക്കൾക്ക് ജോലി നൽകുന്ന കാര്യം സർക്കാർ പരിഗണിക്കണമെന്ന് കോടതി നിർദേശിച്ചിരുന്നു. ഇതിന്റെ അടിസ്ഥാനത്തിൽ വിഷയത്തിൽ സർക്കാർ തലത്തിലുള്ള ഇടപെടൽ ആവശ്യപ്പെട്ട് കുടുംബം രംഗത്തെത്തിയിരുന്നു.
വിധിക്ക് പിന്നാലെ പ്രതീക്ഷയോടെ കുടുംബം
മുമ്പ് പല ഘട്ടങ്ങളിലും ജോലി ലഭ്യമാക്കുമെന്ന് വാഗ്ദാനങ്ങൾ ലഭിച്ചിരുന്നെങ്കിലും കേസിന്റെ വിധി വരുന്നതിനും ആവശ്യമായ രേഖകൾ തയ്യാറാകുന്നതിനുമുണ്ടായ കാലതാമസമാണ് നടപടികൾ വൈകാൻ കാരണമായതെന്ന് കുടുംബം പറയുന്നു. കേസുമായി ബന്ധപ്പെട്ട നടപടികൾ അവസാനിച്ചതോടെ ഇപ്പോൾ അനുകൂല തീരുമാനമുണ്ടാകുമെന്ന പ്രതീക്ഷയിലാണ് ബന്ധുക്കൾ.
സുധാകരന്റെ ഇളയ മകൾക്കാണ് ജോലി നൽകാൻ സർക്കാർ തീരുമാനിച്ചിരിക്കുന്നതെന്നാണ് റിപ്പോർട്ട്. പ്രായമായ അപ്പൂപ്പന്റെയും അമ്മൂമ്മയുടെയും കൂടെ കഴിയുന്ന മകൾക്ക് അവരുടെ സംരക്ഷണച്ചുമതലയും ഉള്ളതിനാൽ ജോലി ലഭിക്കേണ്ടത് അത്യാവശ്യമാണെന്ന് കുടുംബാംഗങ്ങൾ ചൂണ്ടിക്കാട്ടി.
കലക്ടറേറ്റിൽ നിന്ന് പ്രൊപ്പോസൽ നൽകാൻ നിർദേശം
ജോലി ലഭ്യമാക്കുന്നതിനുള്ള നടപടികൾ വേഗത്തിലാക്കാൻ പാലക്കാട് കലക്ടറേറ്റിൽ നിന്ന് ഉടൻ പ്രൊപ്പോസൽ നൽകാൻ നിർദേശം നൽകിയിട്ടുണ്ട്. ആവശ്യമായ റിപ്പോർട്ടുകളും അനുബന്ധ രേഖകളും കുടുംബം ഇതിനകം അധികൃതർക്ക് കൈമാറിയിട്ടുണ്ട്.
സർക്കാർ വിഷയത്തിൽ വേഗത്തിൽ നടപടികൾ സ്വീകരിക്കുമെന്ന പ്രതീക്ഷയിലാണ് സുധാകരന്റെ മക്കളും ബന്ധുക്കളും.
Story Summary :
Ramesh Chennithala has reportedly assured the family of Sudhakaran, who was killed in Pothundi, Nenmara, that steps to secure a job for his younger daughter will be expedited. Family members said he would speak to the Chief Minister to speed up the process. The Palakkad Collectorate has been asked to submit a proposal, and the family has already provided the required documents.
