കലാപഭൂമിയായി ഫ്രാൻസ് ; തെരുവുകളില്‍ അക്രമം, 2,000ത്തിലേറെ അറസ്റ്റ്
Current: മലയാളം
പാരിസ്: ജീവിതച്ചെലവിലെ കുതിപ്പും പൊതുസേവനങ്ങളുടെ തകര്‍ച്ചയും ഉയര്‍ത്തിയ ജനരോഷത്തില്‍ ഫ്രാന്‍സിലെ തെരുവുകള്‍ പ്രക്ഷുബ്ധം. വിദ്യാര്‍ഥികള്‍ ആരംഭിച്ച സമരത്തിനൊപ്പം തൊഴിലാളികളും വിലക്കയറ്റത്തിനെതിരെ പ്രതിഷേധിക്കുന്നവരും അണിനിരന്നതോടെ രാജ്യവ്യാപക പ്രക്ഷോഭം പലയിടത്തും അക്രമത്തിലേക്കു വഴിമാറി. രണ്ടായിരത്തിലേറെ പേരെ അറസ്റ്റ് ചെയ്തു. പൊലീസുകാരും അഗ്‌നിരക്ഷാസേനാംഗങ്ങളും ഉള്‍പ്പെടെ അറുനൂറിലേറെപ്പേര്‍ക്കു പരുക്കേറ്റതായി ആഭ്യന്തരമന്ത്രി ലോറന്‍ ന്യൂനസ് അറിയിച്ചു.
തുടക്കം ക്ലാസ് മുറികളില്‍നിന്ന്
അധ്യാപകരുടെ കുറവും മോശം പഠനസൗകര്യങ്ങളും പരിഹരിക്കണമെന്നാവശ്യപ്പെട്ട് കഴിഞ്ഞ മാസം ആരംഭിച്ച വിദ്യാര്‍ഥിപ്രക്ഷോഭമാണ് ഇപ്പോഴത്തെ സമരത്തിന്റെ തുടക്കം. തൊഴിലാളികള്‍ കൂടുതലായി താമസിക്കുന്ന പ്രദേശങ്ങളിലെ സ്‌കൂളുകളുടെ ദുരവസ്ഥയ്‌ക്കെതിരായ പ്രതിഷേധം പിന്നീട് ജീവിതച്ചെലവ്, അസമത്വം, പൊതുചെലവിലെ വെട്ടിക്കുറയ്ക്കല്‍ എന്നിവയ്‌ക്കെതിരായ വിശാല മുന്നേറ്റമായി മാറി.
മെച്ചപ്പെട്ട വിദ്യാഭ്യാസത്തിനും പൊതുസേവനങ്ങള്‍ക്കും വേണ്ടിയുള്ള ആവശ്യത്തിനൊപ്പം വേതനവും പെന്‍ഷനും വര്‍ധിപ്പിക്കണമെന്ന ആവശ്യവും ഉയര്‍ന്നു. വിദ്യാര്‍ഥിസംഘടനകള്‍ക്കും തൊഴിലാളി യൂണിയനുകള്‍ക്കുമൊപ്പം ‘മഞ്ഞക്കുപ്പായ’ പ്രസ്ഥാനത്തിന്റെ പ്രവര്‍ത്തകരും തെരുവിലിറങ്ങി. ശനിയാഴ്ച രാജ്യത്തെ വിവിധ നഗരങ്ങളിലായി അഞ്ചുലക്ഷത്തിലേറെപ്പേര്‍ പ്രകടനങ്ങളില്‍ പങ്കെടുത്തു.
ഭൂരിഭാഗം പേരും സമാധാനപരമായാണ് പ്രതിഷേധിച്ചത്. എന്നാല്‍ ചില നഗരങ്ങളില്‍ അക്രമിസംഘങ്ങള്‍ പ്രകടനങ്ങള്‍ക്കിടെ കടകളും പൊതുകെട്ടിടങ്ങളും ആക്രമിച്ചതോടെ സ്ഥിതി വഷളായി.
നഗരസഭാമന്ദിരത്തിന് തീയിട്ടു; കടകളില്‍ കൊള്ള
ലിമോജിലെ 143 വര്‍ഷം പഴക്കമുള്ള ചരിത്രപ്രസിദ്ധമായ നഗരസഭാമന്ദിരം തീപിടിത്തത്തില്‍ ഗുരുതരമായി തകര്‍ന്നു. മേല്‍ക്കൂര നിലംപൊത്തി. ലിയോണില്‍ വിനോദസഞ്ചാര ഓഫിസിനും തീയിട്ടു. മാര്‍സെയില്‍ നഗരസഭാമന്ദിരത്തിലേക്ക് അക്രമികള്‍ അതിക്രമിച്ചുകയറി.
പാരിസ് ഉള്‍പ്പെടെയുള്ള നഗരങ്ങളില്‍ വ്യാപാരസ്ഥാപനങ്ങളുടെ ചില്ലുകള്‍ തകര്‍ത്തു. സൂപ്പര്‍മാര്‍ക്കറ്റുകളിലും മറ്റു കടകളിലും കൊള്ള നടന്നു. വാഹനങ്ങള്‍ക്കും തീയിട്ടു. പാരിസില്‍ പ്രതിഷേധത്തിനിടെ ഹൃദയസ്തംഭനമുണ്ടായ ഒരാള്‍ മരിച്ചു. തലസ്ഥാനത്തു മാത്രം 855 പേരെ അറസ്റ്റ് ചെയ്തു.
ഞായറാഴ്ചയും സംഘര്‍ഷം
തകര്‍ന്ന കടമുഖങ്ങളും കത്തിക്കരിഞ്ഞ വാഹനങ്ങളും ചിതറിയ അവശിഷ്ടങ്ങളും നീക്കാനുള്ള പ്രവര്‍ത്തനങ്ങള്‍ക്കിടയിലും ഞായറാഴ്ച പാരിസിലും മാര്‍സെയിലും വീണ്ടും സംഘര്‍ഷമുണ്ടായി. പാരിസിലെ പ്ലാസ് ദെ ലാ റെപ്യൂബ്ലിക്കില്‍ പൊലീസ് കണ്ണീര്‍വാതകം പ്രയോഗിച്ചു. വ്യാപാരസ്ഥാപനങ്ങള്‍ക്കു നേരെയുള്ള പുതിയ ആക്രമണശ്രമങ്ങള്‍ തടയാന്‍ കലാപനിയന്ത്രണ സേന ഇടപെട്ടു.
നാശനഷ്ടങ്ങളുടെ വ്യാപ്തി കണക്കിലെടുത്ത് പാരിസ്, മാര്‍സെ, ലിയോണ്‍ നഗരങ്ങളിലെ മേയര്‍മാര്‍ പ്രധാനമന്ത്രിയുമായി അടിയന്തര കൂടിക്കാഴ്ച ആവശ്യപ്പെട്ടു.
സമാധാനത്തിന് ആഹ്വാനം ചെയ്ത് മാക്രോണ്‍
പ്രസിഡന്റ് ഇമ്മാനുവല്‍ മാക്രോണ്‍ ജനങ്ങളോട് സമാധാനം പാലിക്കാന്‍ അഭ്യര്‍ഥിച്ചു. സമാധാനപരമായി പ്രതിഷേധിക്കുന്നവരുടെ പരാതികള്‍ക്ക് ന്യായമുണ്ടെന്നും അവരെ അക്രമം നടത്തുന്നവരുമായി കൂട്ടിക്കലര്‍ത്തരുതെന്നും അദ്ദേഹം വ്യക്തമാക്കി. അതേസമയം, പൊതുസ്വത്തും വ്യാപാരസ്ഥാപനങ്ങളും നശിപ്പിച്ചവര്‍ നിയമനടപടി നേരിടേണ്ടിവരുമെന്ന് മുന്നറിയിപ്പു നല്‍കി.
അക്രമത്തിനു പിന്നില്‍ തീവ്ര ഇടതുപക്ഷസംഘങ്ങളും കൊള്ളസംഘങ്ങളുമുണ്ടെന്നാണ് സര്‍ക്കാരിന്റെ ആരോപണം. പ്രതിഷേധിക്കാനുള്ള അവകാശം അംഗീകരിക്കുമ്പോഴും അക്രമവും കൊള്ളയും അനുവദിക്കാനാവില്ലെന്ന് പ്രധാനമന്ത്രി സെബാസ്റ്റ്യന്‍ ലെകോര്‍നു വ്യക്തമാക്കി.
