ബോളിവുഡ് താരം ടൈഗര്‍ ഷ്രോഫിന് നേരെയുള്ള വധശ്രമം; കാറിന് നേരെ വെടിവെപ്പ് നടന്നത് ഫുട്‌ബോള്‍ കളിക്കിടെ ആക്രമണം നടന്ന് ഒരാഴ്ചയ്ക്ക് ശേഷം

മുംബൈ: ഒക്ടോബര്‍ 11-ലെ ഞായറാഴ്ച പതിവ് ഫുട്‌ബോള്‍ മത്സരത്തിന് നടന്‍ ടൈഗര്‍ ഷ്രോഫ് എത്താതിരുന്നതാണ് ആദ്യത്തെ ആക്രമണ നീക്കത്തില്‍ നിന്ന് അക്രമികളെ പിന്തിരിപ്പിച്ചതെന്ന് മുംബൈ പോലീസ് സംശയിക്കുന്നു. 

എന്നാല്‍ തൊട്ടടുത്ത ആഴ്ച, ഒക്ടോബര്‍ 18-ന് അതേ മൈതാനത്തേക്ക് തിരിച്ചെത്തിയ മൂന്നംഗ സംഘം കളി കഴിഞ്ഞ് മടങ്ങുകയായിരുന്ന നടന്റെ ബി.എം.ഡബ്ല്യു കാറിന് നേരെ വെടിയുതിര്‍ക്കുകയായിരുന്നു.

കേസിലെ പ്രതികളായ റെഹാന്‍, ഫൂല്‍ സിംഗ്, ഋതിക് കുമാര്‍ എന്നിവര്‍ ഒക്ടോബര്‍ 11-ന് ജൂഹുവിലെ പുഷ്പ നര്‍സീ പാര്‍ക്കിലെത്തി ആക്രമണം നടത്താന്‍ പദ്ധതിയിട്ടിരുന്നതായി അന്വേഷണ സംഘം കണ്ടെത്തി.

എന്നാല്‍ അന്ന് ടൈഗര്‍ ഷ്രോഫ് എത്താതിരുന്നതിനെ തുടര്‍ന്ന് ഇവര്‍ പദ്ധതി ഉപേക്ഷിക്കുകയായിരുന്നു. 

തുടര്‍ന്ന് ഒക്ടോബര്‍ 18-ന് വൈകുന്നേരം 4.30 മുതല്‍ പ്രതികള്‍ ഫുട്‌ബോള്‍ ഗ്രൗണ്ടിന്റെ കവാടത്തിന് ചുറ്റും സംശയാസ്പദമായ രീതിയില്‍ കറങ്ങിനടക്കുന്നതിന്റെ സി.സി.ടി.വി ദൃശ്യങ്ങളും പോലീസിന് ലഭിച്ചിട്ടുണ്ട്. 

പതിവുപോലെ വൈകുന്നേരം 5 മണിക്കും 7 മണിക്കും ഇടയിലുള്ള സമയത്ത് ഫുട്‌ബോള്‍ കളി കഴിഞ്ഞ് വൈകുന്നേരം 7 മണിയോടെ കാറില്‍ മടങ്ങുകയായിരുന്ന നടന് നേരെ പ്രതികളില്‍ രണ്ടുപേര്‍ കാറിന്റെ മുന്നില്‍ നിന്നും ഇടത് വശത്ത് നിന്നും വെടിയുതിര്‍ക്കുകയായിരുന്നു.