ടിവി ചാനലുകൾക്ക് കേന്ദ്രത്തിന്റെ കർശന നിർദ്ദേശം. പ്രകോപനപരമായ ചർച്ചകൾക്കും ഭീകരവിരുദ്ധ ഓപ്പറേഷനുകളുടെ ലൈവ് കവറേജിനും വിലക്ക്. എഐ ദുരുപയോഗത്തിനെതിരെ ജാഗ്രത വേണം. ലംഘിച്ചാൽ നടപടി

ന്യൂഡൽഹി: പ്രകോപനപരമായ ടെലിവിഷൻ ചർച്ചകൾ, ഭീകരവിരുദ്ധ ഓപ്പറേഷനുകളുടെ തത്സമയ സംപ്രേക്ഷണം, നിർമ്മിത ബുദ്ധിയുടെ (AI) ദുരുപയോഗം എന്നിവയ്‌ക്കെതിരെ സ്വകാര്യ സാറ്റലൈറ്റ് ചാനലുകൾക്ക് കർശന മാർഗ്ഗനിർദ്ദേശവുമായി കേന്ദ്ര വാർത്താവിതരണ പ്രക്ഷേപണ മന്ത്രാലയം. 

കേബിൾ ടെലിവിഷൻ നെറ്റ്‌വർക്ക് ചട്ടങ്ങൾക്ക് കീഴിലുള്ള പ്രോഗ്രാം കോഡ് എല്ലാ ചാനലുകളും വിട്ടുവീഴ്ചയില്ലാതെ പാലിക്കണമെന്ന് മന്ത്രാലയം പുറത്തിറക്കിയ പുതിയ ഉത്തരവിൽ വ്യക്തമാക്കുന്നു.

സുരക്ഷാ സേനകൾ നടത്തുന്ന ഭീകരവിരുദ്ധ ഓപ്പറേഷനുകളുടെ ലൈവ് കവറേജ് പൂർണ്ണമായും ഒഴിവാക്കുക, അക്രമ ദൃശ്യങ്ങൾ സംപ്രേക്ഷണം ചെയ്യുമ്പോൾ അതീവ ജാഗ്രത പാലിക്കുക, മതസൗഹാർദ്ദം തകർക്കുന്നതോ ദേശവിരുദ്ധമോ ആയ ഉള്ളടക്കങ്ങൾ ഒഴിവാക്കുക എന്നിവയാണ് പ്രധാന നിർദ്ദേശങ്ങൾ.

 തത്സമയ പാനൽ ചർച്ചകളിൽ വർഗ്ഗീയതയോ വിദ്വേഷമോ ആളിക്കത്തിക്കുന്ന തരത്തിലുള്ള സംഭാഷണങ്ങൾ ഉണ്ടാകരുത്. വാർത്താ ചാനലുകളിൽ അസഭ്യമായ ഭാഷയോ അനുചിതമായ പെരുമാറ്റങ്ങളോ സ്വാഭാവികവൽക്കരിക്കരുതെന്നും മന്ത്രാലയം ഓർമ്മിപ്പിച്ചു.

വാർത്താ അവതരണത്തിലും ഗ്രാഫിക്സുകളിലും ജനറേറ്റീവ് എഐ (Generative AI) സാങ്കേതികവിദ്യകൾ ഉപയോഗിക്കുമ്പോൾ അതീവ ജാഗ്രത വേണം. വാർത്തയുടെ ആധികാരികതയും വിശ്വാസ്യതയും നഷ്ടപ്പെടാത്ത വിധത്തിൽ സഹായകരമായ നിലയിൽ മാത്രമേ നിർമ്മിത ബുദ്ധി ഉപയോഗിക്കാവൂ. 

ഉത്തരവുകൾ ലംഘിക്കുന്ന ചാനലുകൾക്കെതിരെ കേബിൾ ടെലിവിഷൻ നെറ്റ്‌വർക്ക് (റെഗുലേഷൻ) ആക്ട് 1995 പ്രകാരം കർശനമായ നിയമനടപടികൾ സ്വീകരിക്കുമെന്നും മന്ത്രാലയം മുന്നറിയിപ്പ് നൽകി.