ഏഷ്യൻ പാരാ ഗെയിംസ് ബാഡ്മിന്റണിൽ ഇന്ത്യയ്ക്ക് സ്വർണ്ണത്തിളക്കം; പ്രമോദ് ഭഗതിനെ വീഴ്ത്തി നിതേഷ് കുമാറിനും അരങ്ങേറ്റത്തിൽ നവീൻ ശിവകുമാറിനും സ്വർണം, വനിതകളിൽ തുളസിമതിക്കും നിത്യക്കും വെള്ളി

നാഗോയ: ഏഷ്യന്‍ പാരാ ഗെയിംസ് ബാഡ്മിന്റണില്‍ ഇന്ത്യയ്ക്ക് ചരിത്രപരമായ വിജയദിനം. പുരുഷന്മാരുടെ സിംഗിള്‍സ് SL3 വിഭാഗത്തില്‍ നിതേഷ് കുമാറും SL4 വിഭാഗത്തില്‍ അരങ്ങേറ്റക്കാരനായ നവീന്‍ ശിവകുമാറും സ്വര്‍ണ്ണമെഡലുകള്‍ നേടി തിളങ്ങി. 

ആവേശകരമായ SL3 ഫൈനലില്‍ രണ്ട് പാരലിമ്പിക് സ്വര്‍ണ്ണമെഡല്‍ ജേതാക്കളുടെ പോരാട്ടത്തില്‍ നിലവിലെ ചാമ്പ്യനായ പ്രമോദ് ഭഗതിനെ 21-18, 21-16 എന്ന നേരിട്ടുള്ള സെറ്റുകള്‍ക്ക് പരാജയപ്പെടുത്തിയാണ് നിതേഷ് കുമാര്‍ സ്വര്‍ണം കരസ്ഥമാക്കിയത്. 

മുന്‍പത്തെ എഡിഷനില്‍ സ്വര്‍ണ്ണം നഷ്ടമായതിന്റെ നിരാശ മാറ്റി ഇത്തവണ അപൂര്‍വ്വ നേട്ടത്തോടെ ചാമ്പ്യനാകാന്‍ കഴിഞ്ഞതില്‍ വലിയ സന്തോഷമുണ്ടെന്ന് പാരീസ് പാരലിമ്പിക്‌സ് സ്വര്‍ണ്ണമെഡല്‍ വിജയിയായ നിതേഷ് പ്രതികരിച്ചു.

മറ്റൊരു ഫൈനലില്‍ ഇന്‍ഡോനേഷ്യയുടെ ഫ്രെഡി സെറ്റിയവാനെ 21-9, 21-17 എന്ന സ്‌കോറിന് അനായാസം കീഴടക്കിയാണ് നവീന്‍ ശിവകുമാര്‍ ഇന്ത്യയ്ക്കായി അടുത്ത സ്വര്‍ണം വെടിപ്പാക്കിയത്. തുടര്‍ച്ചയായി രണ്ട് തവണ ഏഷ്യന്‍ ഗെയിംസ് ചാമ്പ്യനായിരുന്ന പ്രമോദ് ഭഗതിന് ഇത്തവണ വെള്ളി മെഡല്‍ കൊണ്ട് തൃപ്തിപ്പെടേണ്ടി വന്നു. 

അതേസമയം, വനിതകളുടെ സിംഗിള്‍സ് SH6 ഫൈനലില്‍ നിത്യ ശ്രീ സുമതി ശിവനും SU5 ഫൈനലില്‍ തുളസിമതി മുരുഗേശനും പരാജയപ്പെട്ട് വെള്ളി മെഡലുകള്‍ നേടി. 

സിംഗിള്‍സില്‍ വെള്ളി കൊണ്ട് തൃപ്തിപ്പെടേണ്ടി വന്ന തുളസിമതി മിക്‌സഡ് ഡബിള്‍സിലും വനിതാ ഡബിള്‍സിലും ഫൈനലില്‍ കടന്നിട്ടുള്ളതിനാല്‍ ഇന്ത്യയ്ക്ക് ഇനിയും സ്വര്‍ണ്ണ പ്രതീക്ഷ ബാക്കിയുണ്ട്.