നെതന്യാഹുവിനെതിരെ ടെൽ അവീവിൽ ആയിരങ്ങൾ തെരുവിൽ; തിരഞ്ഞെടുപ്പിന് ഇനി മൂന്ന് ദിവസം മാത്രം | Tel Aviv anti-Netanyahu protest

ഇസ്രയേലിൽ പൊതുതിരഞ്ഞെടുപ്പിന് മൂന്ന് ദിവസം മാത്രം ശേഷിക്കെ പ്രധാനമന്ത്രി ബെഞ്ചമിൻ നെതന്യാഹുവിനെതിരെ ടെൽ അവീവിൽ വൻ പ്രതിഷേധം. ശനിയാഴ്ച നടന്ന റാലിയിൽ ആയിരക്കണക്കിന് ആളുകൾ പങ്കെടുത്തു. 2023 ഒക്ടോബർ ഏഴിന് ഹമാസ് നടത്തിയ ആക്രമണം തടയുന്നതിൽ ഉണ്ടായ സുരക്ഷാവീഴ്ചയ്ക്ക് ഉത്തരവാദികളിൽ നിന്ന് കണക്ക് ചോദിക്കണമെന്നും സ്വതന്ത്ര അന്വേഷണ കമ്മിഷൻ രൂപീകരിക്കണമെന്നും ആവശ്യപ്പെട്ടാണ് പ്രതിഷേധം. ആക്രമണത്തിൽ കൊല്ലപ്പെട്ടവരുടെയും ബന്ദികളാക്കപ്പെട്ടവരുടെയും കുടുംബങ്ങൾ ചേർന്ന് രൂപീകരിച്ച ഒക്ടോബർ കൗൺസിലാണ് റാലി സംഘടിപ്പിച്ചത്. (Tel Aviv anti-Netanyahu protest)

പ്രതിപക്ഷത്തെ നാല് പ്രധാന പാർട്ടികളുടെ നേതാക്കളും റാലിയിൽ പങ്കെടുത്തതായി ഇസ്രയേൽ മാധ്യമങ്ങൾ റിപ്പോർട്ട് ചെയ്തു. മുൻ സൈനിക മേധാവി ഗാദി ഐസൻകോട്ട് ജനക്കൂട്ടത്തിൽനിന്ന് വലിയ സ്വീകരണം ഏറ്റുവാങ്ങി. നെതന്യാഹുവിന്റെ ഭരണകാലത്തെ സുരക്ഷാവീഴ്ചകളെക്കുറിച്ച് സ്വതന്ത്ര അന്വേഷണം വേണമെന്ന ആവശ്യം വർഷങ്ങളായി പ്രതിപക്ഷവും സിവിൽ സമൂഹ സംഘടനകളും ഉന്നയിക്കുന്നുണ്ട്. എന്നാൽ, സ്വതന്ത്ര കമ്മിഷനു പകരം ഭരണപക്ഷത്തിനും പ്രതിപക്ഷത്തിനും അംഗങ്ങളെ നിയമിക്കാവുന്ന രാഷ്ട്രീയ കമ്മിഷനാണ് സർക്കാർ നിർദേശിച്ചത്. രാഷ്ട്രീയക്കാർ നിയമിക്കുന്ന കമ്മിഷവുമായി സഹകരിക്കില്ലെന്ന് പ്രതിപക്ഷ നേതാക്കൾ വ്യക്തമാക്കിയിട്ടുണ്ട്.

തിരഞ്ഞെടുപ്പിന് മുമ്പ് പ്രസിദ്ധീകരിച്ച അഭിപ്രായ സർവേകളിൽ ഒരു മുന്നണിക്കും പാർലമെന്റിൽ ഭൂരിപക്ഷം ലഭിക്കില്ലെന്നാണ് സൂചന. ഇസ്രയേൽ പാർലമെന്റായ നെസെറ്റിലെ 120 സീറ്റുകളിൽ ഐസൻകോട്ടിന്റെ മുന്നണിക്ക് 52 സീറ്റും നെതന്യാഹുവിന്റെ മുന്നണിക്ക് 50 സീറ്റും ലഭിക്കുമെന്നാണ് പൊതുമാധ്യമമായ കെഎഎൻ പ്രസിദ്ധീകരിച്ച സർവേ പ്രവചിച്ചത്. അറബ് പാർട്ടികൾ ഉൾപ്പെടെയുള്ള മറ്റ് കക്ഷികൾക്കായിരിക്കും ശേഷിക്കുന്ന സീറ്റുകൾ. തിരഞ്ഞെടുപ്പിന് മുന്നോടിയായി വെള്ളിയാഴ്ച രാത്രി മുതൽ അഭിപ്രായ സർവേകൾ പ്രസിദ്ധീകരിക്കുന്നതിന് നിയന്ത്രണം നിലവിൽ വന്നു. റാലിക്ക് മുന്നോടിയായി സർക്കാർ അനുകൂലികൾ പ്രകോപനമുണ്ടാക്കാൻ സാധ്യതയുണ്ടെന്ന് ഒക്ടോബർ കൗൺസിൽ മുന്നറിയിപ്പ് നൽകിയിരുന്നു. ശനിയാഴ്ച ടെൽ അവീവിൽ ഒരു പൊതുപ്രവർത്തകന്റെ സുരക്ഷാസംഘത്തെ ആക്രമിച്ചെന്ന സംശയത്തിൽ ഒരാളെ അറസ്റ്റ് ചെയ്തതായി പൊലീസ് അറിയിച്ചു. ആക്രമണത്തിന്റെ ലക്ഷ്യം മുൻ പ്രധാനമന്ത്രിയും പ്രതിപക്ഷ നേതാവുമായ നഫ്താലി ബെന്നറ്റാണെന്ന് ഇസ്രയേൽ മാധ്യമങ്ങൾ റിപ്പോർട്ട് ചെയ്തു.

ഇതിനിടെ, ഇസ്രയേലിന്റെ അന്താരാഷ്ട്ര ഒറ്റപ്പെടൽ മറികടക്കാൻ പ്രത്യേക ഡിജിറ്റൽ സമ്പദ്‌വ്യവസ്ഥ വികസിപ്പിക്കേണ്ടിവരുമെന്ന നെതന്യാഹുവിന്റെ പരാമർശത്തെയും പ്രതിപക്ഷം വിമർശിച്ചു. ആ നിർദേശത്തെ പരിഹസിച്ച് ഐസൻകോട്ട് ‘ബി.ബി.കോയിൻ’ എന്ന് വിശേഷിപ്പിച്ചു. ആഗോള സമ്പദ്‌വ്യവസ്ഥയിൽനിന്ന് ഇസ്രയേൽ അകന്നാൽ നിക്ഷേപം, സാങ്കേതികവിദ്യ, സുരക്ഷ എന്നിവയെ ബാധിക്കുമെന്ന് അദ്ദേഹം മുന്നറിയിപ്പ് നൽകി. ഗാസ, ലെബനൻ, ഇറാൻ എന്നിവിടങ്ങളിലെ യുദ്ധങ്ങളും അധിനിവേശ വെസ്റ്റ് ബാങ്കിലെ വർധിച്ചുവരുന്ന അക്രമങ്ങളും ഇസ്രയേലിന്റെ അന്താരാഷ്ട്ര പ്രതിച്ഛായയെ ബാധിച്ചിട്ടുണ്ടെന്നും പ്രതിഷേധക്കാർ ചൂണ്ടിക്കാട്ടി.

Summary: Thousands of people rallied in Tel Aviv against Prime Minister Benjamin Netanyahu three days before Israel’s general election. Protesters demanded accountability for the security failures surrounding the October 7, 2023 Hamas attack and called for an independent inquiry. Pre-election polling suggested that neither major bloc would secure a parliamentary majority.