റാന്നിയിൽ വാഹനാപകടം; സ്കൂട്ടറിൽ യാത്ര ചെയ്ത ഏഴാം ക്ലാസ് വിദ്യാർഥിക്ക് ദാരുണാന്ത്യം | Ranni road accident

റാന്നി: ബന്ധുവിനൊപ്പം സ്കൂട്ടറിൽ യാത്ര ചെയ്യുകയായിരുന്ന ഏഴാം ക്ലാസ് വിദ്യാർഥി വാഹനാപകടത്തിൽ മരിച്ചു (Ranni road accident). അടിച്ചിപ്പുഴ പള്ളിക്കൂടത്തിങ്കൽ ബിനുവിന്റെ മകൻ അലക്സാണ്ടർ (12) ആണ് മരിച്ചത്. റാന്നി എസ്സി യുപി സ്കൂളിലെ ഏഴാം ക്ലാസ് വിദ്യാർഥിയായിരുന്നു.

തിങ്കളാഴ്ച ഉച്ചയ്ക്ക് മൂന്നോടെ പുനലൂർ–മൂവാറ്റുപുഴ സംസ്ഥാനപാതയിൽ മന്ദമരുതിക്കും മക്കപ്പുഴയ്ക്കും ഇടയിലായിരുന്നു അപകടം.

സ്കൂട്ടറിലേക്ക് കാർ ഇടിച്ചുകയറി
മന്ദമരുതിയിൽനിന്ന് മക്കപ്പുഴയിലേക്ക് പോകുന്നതിനിടെ റോഡിന്റെ ഇടതുവശത്ത് പാർക്ക് ചെയ്തിരുന്ന ഓട്ടോറിക്ഷയുടെ ഡ്രൈവറുമായി സംസാരിക്കാൻ ബന്ധു സ്കൂട്ടർ നിർത്തിയിരുന്നു. സംഭാഷണത്തിനുശേഷം സ്കൂട്ടർ വീണ്ടും റോഡിലേക്ക് ഇറക്കുന്നതിനിടെ കാർ ഇടിച്ച് ഇരുവരും അപകടത്തിൽപ്പെടുകയായിരുന്നു.

ഇടിയുടെ ആഘാതത്തിൽ റോഡിലേക്ക് തെറിച്ചുവീണ അലക്സാണ്ടറിന്റെ ശരീരത്തിലൂടെ തൊട്ടുപിന്നാലെ വന്ന മറ്റൊരു കാർ കയറിയിറങ്ങിയതായാണ് റിപ്പോർട്ട്. ഉടൻ റാന്നി താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സ്കൂട്ടറിൽ ഒപ്പമുണ്ടായിരുന്ന ബന്ധുവിന് പരിക്കില്ല.

അലക്സാണ്ടറിന്റെ അമ്മ ലൗലിയാണ്. സഹോദരി ഏഞ്ചൽ.

Story Summary:
Alexander, a 12-year-old Class 7 student from Adichipuzha, died in a road accident on the Punalur–Muvattupuzha state highway between Mandamaruthi and Makkappuzha in Ranni. He was travelling on a scooter with a relative when a car struck them as the scooter re-entered the road. He was taken to Ranni Taluk Hospital but could not be saved.