ദീപാവലി മുഹൂർത്ത പിക്ക്സ് 2026 പുറത്തിറക്കി ജൈനം; നിക്ഷേപത്തിനായി അഞ്ച് ഓഹരികൾ നിർദേശിച്ച് റിപ്പോർട്ട് | Jainam Muhurat Picks 2026

കൊച്ചി: ദീപാവലി നിക്ഷേപത്തിന്റെ ഭാഗമായി 2026-ലെ മുഹൂർത്ത പിക്ക്സ് റിപ്പോർട്ട് പുറത്തിറക്കി പ്രമുഖ ധനകാര്യ സേവന സ്ഥാപനമായ ജൈനം (Jainam Muhurat Picks 2026). സംവത് 2083-ലേക്കുള്ള നിക്ഷേപ പരിഗണനയ്ക്കായി ബാങ്കിംഗ്, ഹോസ്പിറ്റാലിറ്റി, ഐടി, ടെലികോം മേഖലകളിൽ നിന്നുള്ള അഞ്ച് ഓഹരികളാണ് റിപ്പോർട്ട് നിർദേശിക്കുന്നത്.

ഇന്ത്യൻ ഹോട്ടൽസ് കമ്പനി ലിമിറ്റഡ്, എച്ച്ഡിഎഫ്സി ബാങ്ക്, കൊട്ടക് മഹീന്ദ്ര ബാങ്ക്, ടെക് മഹീന്ദ്ര, ഭാരതി ഹെക്സകോം എന്നിവയാണ് റിപ്പോർട്ടിൽ ഉൾപ്പെടുത്തിയിട്ടുള്ള ഓഹരികൾ. കമ്പനികളുടെ അടിസ്ഥാന സാമ്പത്തിക സ്ഥിതിയും (ഫണ്ടമെന്റൽ അനാലിസിസ്) ഓഹരികളുടെ സാങ്കേതിക പ്രവണതകളും (ടെക്നിക്കൽ അനാലിസിസ്) വിലയിരുത്തിയാണ് ജൈനത്തിന്റെ റിസർച്ച് ടീം ഇവ തിരഞ്ഞെടുത്തത്.

വിപണിയിൽ ഇടിവ്; ആഭ്യന്തര നിക്ഷേപം കരുത്തോടെ

ആഗോള സാമ്പത്തിക അനിശ്ചിതത്വങ്ങൾ, ഉയർന്ന ക്രൂഡ് ഓയിൽ വില, വിദേശ നിക്ഷേപകരുടെ തുടർച്ചയായ ഓഹരി വിൽപ്പന എന്നിവ സംവത് 2082-ൽ ഇന്ത്യൻ ഓഹരി വിപണിയെ ബാധിച്ചതായി റിപ്പോർട്ട് വിലയിരുത്തുന്നു. ഈ കാലയളവിൽ വിദേശ പോർട്ട്‌ഫോളിയോ നിക്ഷേപകർ മൂന്ന് ലക്ഷം കോടി രൂപയുടെ ഓഹരികൾ വിറ്റഴിച്ചു.

അതേസമയം, ഇന്ത്യയുടെ സാമ്പത്തിക വളർച്ച ശക്തമായി തുടർന്നതായും റിപ്പോർട്ട് ചൂണ്ടിക്കാട്ടുന്നു. 2026 ഏപ്രിൽ–ജൂൺ പാദത്തിൽ രാജ്യത്തിന്റെ ജിഡിപി വളർച്ച 7.8 ശതമാനമായിരുന്നു. പ്രതിമാസ എസ്‌ഐപി നിക്ഷേപം 2026 സെപ്റ്റംബറിൽ റെക്കോർഡ് തുകയായ 32,490 കോടി രൂപയിലെത്തിയതും ആഭ്യന്തര നിക്ഷേപകരുടെ സജീവ പങ്കാളിത്തത്തിന്റെ സൂചനയായി റിപ്പോർട്ട് വിലയിരുത്തുന്നു.

2025 ഒക്ടോബർ 21 മുതൽ 2026 ഒക്ടോബർ 30 വരെയുള്ള വ്യാപാര കണക്കുകൾ പ്രകാരം നിഫ്റ്റി 50 സൂചിക 10.88 ശതമാനവും സെൻസെക്സ് 11.81 ശതമാനവും ഇടിഞ്ഞു. നിഫ്റ്റി മിഡ്ക്യാപ് 150 സൂചികയിൽ 4.21 ശതമാനത്തിന്റെയും സ്മോൾക്യാപ് സൂചികയിൽ 3.02 ശതമാനത്തിന്റെയും ഇടിവ് രേഖപ്പെടുത്തി.

നിക്ഷേപ തീരുമാനങ്ങളിൽ ശ്രദ്ധിക്കേണ്ട ഘടകങ്ങൾ

കമ്പനികളുടെ ബിസിനസ് പ്രകടനം, ഓഹരികളുടെ മൂല്യനിർണയം, വളർച്ചാ സാധ്യതകൾ, വിവിധ അപകടസാധ്യതകൾ എന്നിവ വിലയിരുത്തി നിക്ഷേപകർക്ക് കൂടുതൽ വ്യക്തമായ തീരുമാനങ്ങളെടുക്കാൻ റിപ്പോർട്ട് സഹായിക്കുമെന്ന് ജൈനത്തിന്റെ റീട്ടെയിൽ ബ്രോക്കിംഗ് റിസർച്ച് മേധാവി ഹിമാൻഷു ഗുപ്ത പറഞ്ഞു.

ഇന്ത്യയുടെ സാമ്പത്തിക നയങ്ങൾ, ആഗോള പലിശനിരക്കുകളിലെ മാറ്റങ്ങൾ, ഭൗമരാഷ്ട്രീയ സംഭവവികാസങ്ങൾ എന്നിവ സംവത് 2083-ൽ വിപണിയുടെ ഗതി നിർണയിക്കുന്ന പ്രധാന ഘടകങ്ങളായിരിക്കുമെന്നും റിപ്പോർട്ട് വിലയിരുത്തുന്നു.

2003-ൽ സ്ഥാപിതമായ ജൈനം ഇന്ത്യയിലുടനീളം നാല് ലക്ഷത്തിലധികം ഉപഭോക്താക്കൾക്ക് ധനകാര്യ സേവനങ്ങൾ നൽകുന്ന സ്ഥാപനമാണ്.

Story Summary :
Jainam has released its Diwali Muhurat Picks 2026 report for Samvat 2083, recommending five stocks from the banking, hospitality, IT and telecom sectors: Indian Hotels Company, HDFC Bank, Kotak Mahindra Bank, Tech Mahindra and Bharti Hexacom. The report reviews market performance during Samvat 2082, highlighting foreign investor selling, India’s GDP growth and record SIP inflows. It also identifies domestic economic policies, global interest rates and geopolitical developments as key factors influencing the market.