“നവംബർ 10-ന് ശേഷം നിർണ്ണായക ചർച്ചകൾ, ശരദ് പവാറിനെ ആശുപത്രിയിലെത്തി സന്ദർശിച്ച് പ്രഫുൽ പട്ടേൽ”: എൻസിപി ലയന ഊഹാപോഹങ്ങൾ സജീവമാക്കി മുംബൈ കൂടിക്കാഴ്ച | NCP merger talks

മുംബൈ: നാഷണലിസ്റ്റ് കോൺഗ്രസ് പാർട്ടിയുടെ (NCP merger talks) ഇരുവിഭാഗങ്ങളും തമ്മിലുള്ള ലയന ചർച്ചകൾ വീണ്ടും സജീവമാകുന്നു. മുതിർന്ന എൻസിപി നേതാവ് പ്രഫുൽ പട്ടേൽ, എൻസിപി (എസ്പി) അധ്യക്ഷൻ ശരദ് പവാറിനെ ആശുപത്രിയിലെത്തി സന്ദർശിച്ചതോടെയാണ് മഹാരാഷ്ട്ര രാഷ്ട്രീയത്തിൽ ലയനസാധ്യത സംബന്ധിച്ച ചർച്ചകൾക്ക് വീണ്ടും ചൂടുപിടിച്ചത്. ശ്വാസകോശ അണുബാധയെ തുടർന്ന് മുംബൈയിലെ ബ്രീച്ച് കാൻഡി ആശുപത്രിയിൽ ചികിത്സയിലാണ് ശരദ് പവാർ.

വ്യാഴാഴ്ച രാത്രിയായിരുന്നു പ്രഫുൽ പട്ടേലിന്റെ സന്ദർശനം. നവംബർ 10ന് ശേഷം വീണ്ടും കൂടിക്കാഴ്ച നടത്തുന്നതിനെക്കുറിച്ച് ഇരുവരും സംസാരിക്കുന്നതിന്റെ ദൃശ്യങ്ങളും പുറത്തുവന്നു. നവംബർ 10ന് ശേഷം താൻ മുംബൈയിലുണ്ടാകുമെന്നും അന്ന് ഒരുമിച്ചിരുന്ന് കാര്യങ്ങൾ ചർച്ച ചെയ്യാമെന്നും പ്രഫുൽ പട്ടേൽ ശരദ് പവാറിനോട് പറയുന്നതും അദ്ദേഹം സമ്മതം അറിയിക്കുന്നതും വീഡിയോയിൽ കാണാം.

ലയന ചർച്ചകളെക്കുറിച്ച് അഭ്യൂഹങ്ങൾ
എന്നാൽ ആശുപത്രി സന്ദർശനത്തിനിടെ ദേശീയ, സംസ്ഥാന രാഷ്ട്രീയ വിഷയങ്ങളാണ് ചർച്ച ചെയ്തതെന്നും എൻസിപിയുടെ ആഭ്യന്തര കാര്യങ്ങൾ സംസാരിച്ചിട്ടില്ലെന്നും പ്രഫുൽ പട്ടേൽ വ്യക്തമാക്കി. ഇതിന് പിന്നാലെയാണ് നവംബർ 10ന് ശേഷം നടക്കാനിരിക്കുന്ന കൂടിക്കാഴ്ച ലയന ചർച്ചകൾക്കുള്ള വേദിയാകുമെന്ന അഭ്യൂഹങ്ങൾ ശക്തമായത്.

എൻസിപി മഹാരാഷ്ട്ര അധ്യക്ഷൻ സുനിൽ തത്കറെയുടെ പ്രതികരണവും ലയന ചർച്ചകൾക്ക് കൂടുതൽ പ്രാധാന്യം നൽകി. അജിത് പവാർ ജീവിച്ചിരുന്നെങ്കിൽ ഇരുവിഭാഗങ്ങളുടെയും ലയനം ഈ വർഷം ഫെബ്രുവരിയിൽ തന്നെ നടക്കുമായിരുന്നുവെന്നാണ് അദ്ദേഹം പ്രതികരിച്ചത്.

രണ്ട് വിഭാഗങ്ങൾ, രണ്ട് നേതൃത്വം
നിലവിൽ ഭരണപക്ഷത്തുള്ള എൻസിപിയെ മഹാരാഷ്ട്ര ഉപമുഖ്യമന്ത്രി സുനേത്ര പവാറാണ് നയിക്കുന്നത്. മഹാവികാസ് അഘാഡി (എംവിഎ) സഖ്യത്തിന്റെ ഭാഗമായ എൻസിപി (എസ്പി) ശരദ് പവാറിന്റെ നേതൃത്വത്തിലാണ് പ്രവർത്തിക്കുന്നത്.

ഇരുവിഭാഗങ്ങളും തമ്മിലുള്ള ലയനസാധ്യത സംബന്ധിച്ച് നേരത്തെയും ചർച്ചകൾ ഉയർന്നിരുന്നു. പ്രഫുൽ പട്ടേലിന്റെ ആശുപത്രി സന്ദർശനവും നവംബർ 10ന് ശേഷമുള്ള കൂടിക്കാഴ്ചയെക്കുറിച്ചുള്ള പരാമർശവും ഈ ചർച്ചകൾക്ക് വീണ്ടും രാഷ്ട്രീയ ശ്രദ്ധ നേടിക്കൊടുത്തിരിക്കുകയാണ്.

Story Summary: Talks about a possible merger between the two factions of the Nationalist Congress Party (NCP) have gained fresh attention after senior leader Praful Patel visited NCP (SP) chief Sharad Pawar at a Mumbai hospital. A video shows Patel proposing another meeting after November 10, which Pawar appears to accept. Patel said the hospital meeting focused on national and state political issues, not internal party matters.