“പാകിസ്ഥാനിൽ വച്ച് നഷ്ടപ്പെട്ട പാസ്‌പോർട്ട്, 11 മാസമായി ഇറാനിൽ ദുരിത ജീവിതം”: നാട്ടിലേക്ക് മടങ്ങാനാവാതെ കൊല്ലം സ്വദേശിയായ കപ്പൽ ജീവനക്കാരൻ അക്ഷയ് | Malayali stranded in Iran

കൊല്ലം: പാസ്‌പോർട്ടും മറ്റ് യാത്രാരേഖകളും തിരികെ ലഭിക്കാത്തതിനെ തുടർന്ന് ഇറാനിൽ കുടുങ്ങി മലയാളി യുവാവ് (Malayali stranded in Iran). കൊല്ലം പ്രാക്കുളം സ്വദേശി അക്ഷയ് ഹരീഷാണ് നാട്ടിലേക്ക് മടങ്ങാനാകാതെ ഇറാനിൽ കഴിയുന്നത്. കപ്പൽ ജീവനക്കാരനായ അക്ഷയ് രേഖകൾ നഷ്ടമായതിനെ തുടർന്ന് സഹായം തേടിയിരിക്കുകയാണ്.

അലി ഷിപ്പിംഗ് കമ്പനിയുടെ ‘പാം മറൈൻ’ കപ്പലിൽ വാച്ച് കീപ്പറായാണ് അക്ഷയ് ജോലി ചെയ്യുന്നത്. പാക് തുറമുഖത്ത് കപ്പൽ എത്തിയപ്പോൾ പരിശോധനയ്ക്കായി പാസ്‌പോർട്ട് അധികൃതർക്ക് കൈമാറിയിരുന്നു. പരിശോധന പൂർത്തിയായിട്ടും രേഖ തിരികെ ലഭിച്ചില്ലെന്നാണ് അക്ഷയ് പറയുന്നത്. പാസ്‌പോർട്ടും മറ്റ് യാത്രാരേഖകളും കപ്പൽ ക്യാപ്റ്റനെ ഏൽപ്പിച്ചിട്ടുണ്ടാകുമെന്നാണ് കരുതിയിരുന്നത്.

എന്നാൽ കപ്പൽ ഇറാനിലെത്തിയശേഷം നാട്ടിലേക്ക് മടങ്ങാനുള്ള തയ്യാറെടുപ്പിനിടെയാണ് രേഖകൾ ക്യാപ്റ്റന്റെ കൈവശമില്ലെന്ന് അറിയുന്നത്. പാസ്‌പോർട്ട് ഉൾപ്പെടെയുള്ള രേഖകൾ നഷ്ടമായതോടെ മടക്കയാത്രയും അനിശ്ചിതത്വത്തിലായി.

ആറ് മ്യാൻമർ പൗരന്മാർക്ക് രേഖകൾ ലഭിച്ചു

അക്ഷയ്‌ക്കൊപ്പം യാത്രാരേഖകൾ തിരികെ ലഭിക്കാതിരുന്ന ആറ് മ്യാൻമർ പൗരന്മാരെ അവരുടെ എംബസിയുടെ ഇടപെടലിനെ തുടർന്ന് സ്വദേശത്തേക്ക് തിരിച്ചയച്ചതായി അക്ഷയ് പറയുന്നു. എന്നാൽ തനിക്ക് ഇതുവരെ നാട്ടിലേക്ക് മടങ്ങാനുള്ള സാഹചര്യമുണ്ടായിട്ടില്ല.

ഏകദേശം 11 മാസമായി ഇറാനിൽ കഴിയുകയാണെന്നാണ് അക്ഷയ് അറിയിക്കുന്നത്. ദുബായിലാണ് ജോലി എന്നുപറഞ്ഞാണ് ഏജന്റ് തന്നെ കൊണ്ടുപോയതെന്നും എന്നാൽ കപ്പലിന്റെ യാത്രകൾ കൂടുതലും ഇറാനിലേക്കായിരുന്നുവെന്നും യുവാവ് പറയുന്നു.

യുദ്ധത്തെ തുടർന്ന് കുറച്ചുകാലം നിലച്ചിരുന്ന കപ്പൽ സർവീസുകൾ വീണ്ടും ആരംഭിച്ചിട്ട് മാസങ്ങളായെന്നും അക്ഷയ് വ്യക്തമാക്കി. പാകിസ്ഥാനിൽനിന്ന് അരി കൊണ്ടുവരുന്നതിനായി നടത്തിയ രണ്ടാമത്തെ യാത്രയ്ക്കിടെയാണ് പാസ്‌പോർട്ട് തിരികെ ലഭിക്കാതായതെന്നാണ് അദ്ദേഹത്തിന്റെ വിശദീകരണം.

പാസ്‌പോർട്ടിനെക്കുറിച്ച് ക്യാപ്റ്റനോട് അന്വേഷിച്ചപ്പോൾ പാകിസ്ഥാനിൽ രേഖയുണ്ടോയെന്ന് കമ്പനി പരിശോധിച്ചെന്നും അവിടെ ഇല്ലെന്ന മറുപടിയാണ് ലഭിച്ചതെന്നും അക്ഷയ് പറയുന്നു.

സഹായം തേടി മന്ത്രി ബിന്ദു കൃഷ്ണ

കൊല്ലം എം.എൽ.എയും മന്ത്രിയുമായ ബിന്ദു കൃഷ്ണ അക്ഷയുമായി ഫോണിൽ സംസാരിച്ചു. യുവാവിനെ നാട്ടിലെത്തിക്കുന്നതിനാവശ്യമായ ഇടപെടൽ നടത്തണമെന്ന് ആവശ്യപ്പെട്ട് മുഖ്യമന്ത്രി, കേന്ദ്ര വിദേശകാര്യ മന്ത്രി, ഡൽഹിയിലെ കേരളത്തിന്റെ പ്രത്യേക പ്രതിനിധി, ഇറാനിലെ ഇന്ത്യൻ എംബസി എന്നിവർക്ക് മന്ത്രി കത്ത് നൽകി.

പാസ്‌പോർട്ടും യാത്രാരേഖകളും വീണ്ടെടുത്ത് അക്ഷയ്‌ക്ക് നാട്ടിലേക്ക് മടങ്ങാനുള്ള സാഹചര്യമൊരുക്കണമെന്നാണ് ആവശ്യം. രേഖകൾ നഷ്ടമായതുമായി ബന്ധപ്പെട്ട് ബന്ധപ്പെട്ട അധികൃതരിൽനിന്നുള്ള തുടർനടപടികൾക്കായി കാത്തിരിക്കുകയാണ് യുവാവും കുടുംബവും.

Story Summary: Akshay Harish, a native of Prakkulam in Kollam, has been stranded in Iran for around 11 months after his passport and other travel documents went missing while he was working aboard the Palm Marine vessel operated by Ali Shipping Company. He says his passport was handed over for verification at a Pakistani port but was never returned. Minister and Kollam MLA Bindu Krishna has contacted him and written to the Chief Minister, Union External Affairs Minister and Indian authorities seeking assistance to bring him home.