ഡിജെ പാർട്ടികൾക്ക് പൊതുവായ വിലക്ക് ഏർപ്പെടുത്താനാകില്ല; ഹോട്ടലുകൾക്ക് നൽകിയ പൊലീസ് നോട്ടീസ് റദ്ദാക്കി ഹൈക്കോടതി | Kerala High Court DJ party ruling

കൊച്ചി: ഡിജെ പാർട്ടികൾ നിയന്ത്രിക്കണമെന്നാവശ്യപ്പെട്ട് ഹോട്ടലുകൾക്ക് പൊലീസ് നൽകിയ നോട്ടീസ് ഹൈക്കോടതി റദ്ദാക്കി (Kerala High Court DJ party ruling). കുറ്റകൃത്യങ്ങൾ നടക്കാൻ സാധ്യതയുണ്ടെന്ന പൊതുവായ ആശങ്ക ചൂണ്ടിക്കാട്ടി ഡിജെ പാർട്ടികൾക്ക് നിയന്ത്രണം ഏർപ്പെടുത്താൻ പൊലീസിന് അധികാരമില്ലെന്ന് കോടതി വ്യക്തമാക്കി.

എഫ്.എൽ-3 ലൈസൻസുള്ള ബാറുകൾക്കും ഹോട്ടലുകൾക്കും പുലർച്ചെ മൂന്ന് മണിവരെ പ്രവർത്തിക്കാൻ അനുമതിയുണ്ട്. ലൈസൻസ് അനുവദിക്കുന്ന സമയപരിധിക്കുള്ളിൽ സ്ഥാപനങ്ങൾ പ്രവർത്തിപ്പിക്കാൻ ഹോട്ടൽ ഉടമകൾക്ക് അവകാശമുണ്ടെന്നും കോടതി നിരീക്ഷിച്ചു.

കുറ്റകൃത്യങ്ങൾ വർധിക്കുന്നുണ്ടെങ്കിൽ അതിനെതിരെ നിയമാനുസൃത നടപടികളാണ് സ്വീകരിക്കേണ്ടത്. അതിന്റെ പേരിൽ സ്ഥാപനങ്ങളുടെ പ്രവർത്തനം തടയാനാകില്ലെന്നും കോടതി വ്യക്തമാക്കി. പൊലീസിന്റെ നോട്ടീസിനെ ചോദ്യം ചെയ്ത് ഹോട്ടൽ ഉടമകൾ സമർപ്പിച്ച ഹർജി അംഗീകരിച്ചാണ് നടപടി റദ്ദാക്കിയത്.

ലഹരി ഉപയോഗവും കൈമാറ്റവും സംബന്ധിച്ച് പൊലീസിന്റെ വാദം

കൊച്ചിയിൽ ഡിജെ പാർട്ടികളുടെ മറവിൽ വ്യാപകമായി ലഹരി ഉപയോഗവും കൈമാറ്റവും നടക്കുന്നുണ്ടെന്നായിരുന്നു പൊലീസിന്റെ വാദം. ഇത്തരം പ്രവർത്തനങ്ങൾ ക്രമസമാധാന പ്രശ്നങ്ങൾക്കും മറ്റ് കുറ്റകൃത്യങ്ങൾക്കും വഴിവയ്ക്കുന്നുണ്ടെന്നും പുലർച്ചെവരെ നീളുന്ന പാർട്ടികൾ നിയന്ത്രിക്കണമെന്നും പൊലീസ് കോടതിയിൽ ആവശ്യപ്പെട്ടു.

എന്നാൽ, ലൈസൻസ് വ്യവസ്ഥകൾ പാലിച്ച് പ്രവർത്തിക്കുന്ന സ്ഥാപനങ്ങളിലെ പാർട്ടികൾക്ക് ഇത്തരം പൊതുവായ കാരണങ്ങൾ ചൂണ്ടിക്കാട്ടി വിലക്ക് ഏർപ്പെടുത്താനാകില്ലെന്നാണ് കോടതിയുടെ നിലപാട്.

സമയക്രമം മാറ്റണമെങ്കിൽ പുതിയ ചട്ടം വേണം

ഹോട്ടലുകളുടെയും ബാറുകളുടെയും പ്രവർത്തന സമയക്രമത്തിൽ മാറ്റം വരുത്തണമെങ്കിൽ സർക്കാർ പുതിയ നിയമമോ ചട്ടമോ കൊണ്ടുവരണം. അത്തരമൊരു നിയമമോ ചട്ടമോ നിലവിൽ വന്നാൽ മാത്രമേ അതിന്റെ അടിസ്ഥാനത്തിൽ പൊലീസിന് ഇടപെടാൻ കഴിയൂ എന്നും ഹൈക്കോടതി വ്യക്തമാക്കി.

Story Summary: The Kerala High Court has quashed police notices issued to hotels seeking to restrict DJ parties. The court observed that police cannot impose restrictions merely on the possibility of crimes occurring at such events when establishments operate within the permitted hours under their FL-3 licences. It also stated that any change to operating hours must be introduced through appropriate government laws or regulations.