ശബരിമല തീർത്ഥാടനം: എറണാകുളത്ത് വിപുലമായ സുരക്ഷാ-ഗതാഗത ക്രമീകരണങ്ങളുമായി പോലീസ് | Sabarimala Pilgrimage

കൊച്ചി: ശബരിമല മണ്ഡല-മകരവിളക്ക് തീർത്ഥാടനത്തോടനുബന്ധിച്ച് അയ്യപ്പഭക്തരുടെ സുരക്ഷയും സുഗമമായ യാത്രാസൗകര്യവും ഉറപ്പാക്കുന്നതിനായി കൊച്ചി സിറ്റി പൊലീസ് വിപുലമായ ക്രമീകരണങ്ങൾ ഏർപ്പെടുത്തി. ഇതിന്റെ ഭാഗമായി എറണാകുളം സൗത്ത് റെയിൽവേ സ്റ്റേഷനിൽ പ്രത്യേക ഫെസിലിറ്റേഷൻ സെന്റർ പ്രവർത്തനം ആരംഭിച്ചു.(Sabarimala Pilgrimage, Kochi City Police Roll Out Special Traffic And Security Arrangements)
തീർത്ഥാടകരുടെ തിരക്ക് നിയന്ത്രിക്കുന്നതിനായി സൗത്ത്, നോർത്ത് റെയിൽവേ സ്റ്റേഷനുകൾ കേന്ദ്രീകരിച്ച് പ്രത്യേക ഗതാഗത ക്രമീകരണങ്ങളാണ് നടപ്പാക്കിയിരിക്കുന്നത്. ശബരിമലയിലേക്ക് പോകുന്നവർ സൗത്ത് റെയിൽവേ സ്റ്റേഷന്റെ പടിഞ്ഞാറ് കവാടത്തിലൂടെ പുറത്തിറങ്ങി പ്രത്യേക കെഎസ്ആർടിസി, ടാക്സി സർവീസുകൾ ഉപയോഗിക്കണം. തീർത്ഥാടനം കഴിഞ്ഞ് മടങ്ങിയെത്തുന്ന വാഹനങ്ങൾ കർഷക റോഡ് വഴി സഞ്ചരിച്ച് കിഴക്കേ കവാടത്തിന് മുന്നിലാണ് ഭക്തരെ ഇറക്കേണ്ടത്.
ഗതാഗതക്കുരുക്ക് ഒഴിവാക്കുന്നതിനായി എറണാകുളം ഗേൾസ് ഹൈസ്കൂൾ മുതൽ സൗത്ത് റെയിൽവേ സ്റ്റേഷൻ കവാടം വരെയുള്ള ഭാഗത്ത് പാർക്കിംഗ് പൂർണ്ണമായും നിരോധിച്ചു. എറണാകുളം നോർത്ത് സ്റ്റേഷനിലെ പരിമിതമായ പാർക്കിംഗ് സൗകര്യം കണക്കിലെടുത്ത് ഓട്ടോറിക്ഷ പാത ആവശ്യാനുസരണം വൺവേ ആയി ക്രമീകരിക്കുമെന്നും പൊലീസ് അറിയിച്ചു. മോഷണവും മറ്റ് കുറ്റകൃത്യങ്ങളും തടയുന്നതിനായി 25-ലധികം പൊലീസ് ഉദ്യോഗസ്ഥരെ നിയോഗിച്ചിട്ടുണ്ട്. പ്രധാന ജംഗ്ഷനുകളിലും പ്ലാറ്റ്ഫോമുകളിലും 24 മണിക്കൂറും സിസിടിവി നിരീക്ഷണം ശക്തമാക്കും.
Story Summary
Kochi City Police have rolled out special security and traffic arrangements at Ernakulam South and North railway stations for the Sabarimala Mandalakalam-Makaravilakku pilgrimage, including a facilitation center at South station, separate entry and return vehicle routes, a parking ban near South station, 24-hour CCTV monitoring, and medical and fire assistance desks.




