2035-ഓടെ ക്രിസ്തു മതത്തെ മറികടന്ന് ഇസ്ലാം ലോകത്തിലെ ഏറ്റവും വലിയ മതവിഭാഗമാകും: കാരണങ്ങൾ അറിയാം.. | Muslims Largest Religious Group

വാഷിംഗ്ടൺ: 2035-ഓടെ നിലവിൽ ലോകത്തിലെ ഏറ്റവും വലിയ മതവിഭാഗമായ ക്രിസ്ത്യാനികളെ മറികടന്ന് മുസ്ലിം ജനസംഖ്യ ഒന്നാമതെത്തുമെന്ന് പ്രമുഖ ഗവേഷണ സ്ഥാപനമായ ‘പ്യൂ റിസർച്ച് സെന്ററിന്റെ’ സമഗ്ര പഠന റിപ്പോർട്ട്. നിലവിലെ പ്രവണതകൾ തുടരുകയാണെങ്കിൽ, തുടർന്നുള്ള ദശകങ്ങളിൽ ഇരുവിഭാഗങ്ങളും തമ്മിലുള്ള ജനസംഖ്യാ അന്തരം വർധിച്ചുവരും. 2070-ഓടെ ആഗോളതലത്തിൽ മുസ്ലിം ജനസംഖ്യ 364 കോടിയാകുമ്പോൾ ക്രിസ്ത്യൻ ജനസംഖ്യ 296 കോടിയായിരിക്കുമെന്നും പഠനം പ്രവചിക്കുന്നു.(Muslims Largest Religious Group, Projected to Surpass Christians)
ജനനനിരക്ക്, കുടിയേറ്റം, മരണനിരക്ക്, പ്രായം, മതപരിവർത്തനം എന്നിവയുമായി ബന്ധപ്പെട്ട സെൻസസ്, സർവേ വിവരങ്ങൾ വിശകലനം ചെയ്താണ് പ്യൂ റിസർച്ച് ഈ നിഗമനത്തിലെത്തിയത്. 2020-ലെ കണക്കനുസരിച്ച് ലോകജനസംഖ്യയുടെ 29 ശതമാനം ക്രിസ്ത്യാനികളും 26 ശതമാനം മുസ്ലിങ്ങളുമായിരുന്നു. എന്നാൽ 2020-നും 2070-നും ഇടയിൽ ലോകത്തിലെ മുസ്ലിം ജനസംഖ്യയിൽ 80 ശതമാനം വർധനവുണ്ടാകുമ്പോൾ, ക്രിസ്ത്യൻ ജനസംഖ്യയിൽ 30 ശതമാനം വളർച്ച മാത്രമാണ് പ്രതീക്ഷിക്കുന്നത്. ഇതോടെ ലോകജനസംഖ്യയുടെ 36 ശതമാനമായി മുസ്ലിം വിഭാഗം മാറും.
അതേസമയം, ക്രിസ്ത്യൻ ജനസംഖ്യ കുറയുന്നതിലൂടെയല്ല മുസ്ലിം ജനസംഖ്യ വളരുന്നതെന്ന് പ്യൂ റിസർച്ച് സീനിയർ ഡെമോഗ്രാഫർ കോൺറാഡ് ഹാക്കറ്റ് വ്യക്തമാക്കുന്നു. ഇരുവിഭാഗങ്ങളുടെയും ജനസംഖ്യ ഗണ്യമായി വർധിക്കുന്നുണ്ടെന്നും, എന്നാൽ ക്രിസ്ത്യാനികളേക്കാൾ വേഗത്തിൽ മുസ്ലിം ജനസംഖ്യ വളരുന്നു എന്നതാണ് യാഥാർത്ഥ്യമെന്നും അദ്ദേഹം ചൂണ്ടിക്കാട്ടി.
ജനസംഖ്യാ മാറ്റത്തിന് പിന്നിലെ പ്രധാന കാരണങ്ങൾ:
1. ഉയർന്ന ജനനനിരക്ക് (Fertility Rates): മുസ്ലിം ജനസംഖ്യ അതിവേഗം വളരാനുള്ള ഏറ്റവും പ്രധാന കാരണം ഉയർന്ന ജനനനിരക്കാണ്. കഴിഞ്ഞ അഞ്ച് വർഷത്തെ കണക്കുകൾ പ്രകാരം, ഒരു മുസ്ലിം സ്ത്രീക്ക് ശരാശരി 3.1 കുട്ടികൾ എന്നതാണ് നിരക്ക്. ലോകത്തിലെ മതവിഭാഗങ്ങളിൽ ഏറ്റവും ഉയർന്ന നിരക്കാണിത്. രണ്ടാം സ്ഥാനത്തുള്ള ക്രിസ്ത്യൻ വിഭാഗത്തിൽ ഇത് 2.5 ആണ്. 2070-ഓടെ ലോകജനസംഖ്യയുടെ നാലിലൊന്ന് പേരും താമസിക്കാൻ സാധ്യതയുള്ള സബ്-സഹാറൻ ആഫ്രിക്കൻ മേഖലയാണ് ഈ വളർച്ചയിൽ നിർണ്ണായകമാകുന്നത്. സബ്-സഹാറൻ ആഫ്രിക്കയിൽ മുസ്ലിം സ്ത്രീകളുടെ ജനനനിരക്ക് 5.1 ഉം അമുസ്ലിം സ്ത്രീകളുടേത് 4 ഉം ആണ്.
2. മതപരിവർത്തനവും വിശ്വാസത്തിൽ തുടരുന്നവരുടെ എണ്ണവും: ചെറുപ്പത്തിൽ വളർന്നുവന്ന മതത്തിൽ തന്നെ തുടരുന്നവരുടെ കാര്യത്തിൽ വലിയ വ്യത്യാസമുണ്ട്. 2008-നും 2024-നും ഇടയിൽ നടന്ന സർവേകൾ പ്രകാരം, മുസ്ലിംകളായി വളർന്നവരിൽ 99 ശതമാനവും ഇപ്പോഴും അതേ വിശ്വാസത്തിൽ തുടരുന്നു. എന്നാൽ ക്രിസ്ത്യാനികളിൽ ഇത് 85 ശതമാനമാണ്. 2070-ഓടെ ഏകദേശം 19.9 കോടി ക്രിസ്ത്യാനികൾ മതം ഉപേക്ഷിക്കുമ്പോൾ 9.4 കോടി പേർ പുതുതായി ക്രിസ്തുമതത്തിലേക്ക് എത്തും. മുസ്ലിം വിഭാഗത്തിൽ 2.3 കോടി പേർ പുറത്തുപോകുമ്പോൾ 1.6 കോടി പേർ പുതുതായി എത്തും.
3. കുടിയേറ്റത്തിന്റെ സ്വാധീനം: ആഗോളതലത്തിലുള്ള ആകെ ജനസംഖ്യാ കണക്കുകളെ കുടിയേറ്റം കാര്യമായി ബാധിക്കില്ലെങ്കിലും, ഓരോ രാജ്യത്തെയും മതപരമായ ഘടനയിൽ മാറ്റങ്ങൾ വരുത്തും. ഉദാഹരണത്തിന്, കുടിയേറ്റം കണക്കിലെടുക്കുമ്പോൾ 2070-ഓടെ യൂറോപ്പിലെ ജനസംഖ്യയിൽ മുസ്ലിംകളുടെ വിഹിതം 13 ശതമാനമായി ഉയരും. കുടിയേറ്റം ഇല്ലായിരുന്നെങ്കിൽ ഇത് 6 ശതമാനം മാത്രമേ വളരുമായിരുന്നുള്ളൂ.
Story Summary
According to a comprehensive Pew Research Center study, Muslims are projected to surpass Christians to become the world’s largest religious group by 2035, reaching 3.64 billion compared to 2.96 billion Christians by 2070. Driven primarily by higher fertility rates (3.1 children per Muslim woman versus 2.5 for Christian women), rapid population growth in sub-Saharan Africa, and higher religious retention rates (99% vs. 85%), the global Muslim share is expected to rise to 36%.




