തമിഴ്നാട്ടിൽ ട്രെയിൻ കോച്ചിനുള്ളിൽ യുവതിയെ ബലാത്സംഗം ചെയ്ത് കൊലപ്പെടുത്തി: പ്രതി പിടിയിൽ | Woman Raped and Murdered

മധുര: നാഗർകോവിൽ ജംഗ്ഷൻ റെയിൽവേ സ്റ്റേഷനിൽ നിർത്തിയിട്ടിരുന്ന ട്രെയിൻ കോച്ചിനുള്ളിൽ യുവതിയെ ബലാത്സംഗം ചെയ്ത് കൊലപ്പെടുത്തിയ സംഭവത്തിൽ 31-കാരനെ റെയിൽവേ പൊലീസ് അറസ്റ്റ് ചെയ്തു. കന്യാകുമാരി ജില്ലയിലെ ചെമ്പകരാമൻപുത്തൂർ സ്വദേശി അയ്യപ്പനെയാണ് പൊലീസ് പിടികൂടിയത്. നാല് ദിവസത്തോളം പുറത്തറിയാതെ നിലനിന്ന കൊലപാതകമാണ് ഒടുവിൽ വെളിച്ചത്തുവന്നത്.(Woman Raped and Murdered Inside Stationary Train Coach in Tamil Nadu One Arrested)
നവംബർ 18-ന് രാവിലെ എട്ട് മണിയോടെ 13-ാം നമ്പർ യാർഡിൽ നിർത്തിയിട്ടിരുന്ന 16366-ാം നമ്പർ ട്രെയിനിന്റെ, ഭിന്നശേഷിക്കാർക്കായി സംവരണം ചെയ്ത പിൻഭാഗത്തെ കോച്ചിലെ സീറ്റിനടിയിൽ നിന്നാണ് അജ്ഞാതയായ യുവതിയുടെ അഴുകിയ നിലയിലുള്ള മൃതദേഹം കണ്ടെത്തിയത്. ഏകദേശം 50 വയസ്സ് പ്രായം തോന്നിക്കുന്ന യുവതിയുടെ മൃതദേഹം കണ്ടതിനെ തുടർന്ന് നാഗർകോവിൽ ഈസ്റ്റ് വില്ലേജ് അഡ്മിനിസ്ട്രേറ്റീവ് ഓഫീസറുടെ പരാതിയിൽ റെയിൽവേ പൊലീസ് അസ്വാഭാവിക മരണത്തിന് കേസെടുത്തിരുന്നു. തുടർന്ന് നടത്തിയ പോസ്റ്റ്മോർട്ടത്തിലാണ് കൊലപാതകമാണെന്ന് സ്ഥിരീകരിച്ചത്.
റെയിൽവേ പൊലീസ് ഇൻസ്പെക്ടറുടെ നേതൃത്വത്തിലുള്ള പ്രത്യേക സംഘം റെയിൽവേ സ്റ്റേഷനിലെ സിസിടിവി ദൃശ്യങ്ങൾ പരിശോധിച്ചതാണ് കേസിൽ നിർണ്ണായകമായത്. നവംബർ 14-ന് രാവിലെ എട്ട് മണിയോടെ, പ്ലാറ്റ്ഫോം 4-നും 5-നും സമീപം നിർത്തിയിട്ടിരുന്ന കോച്ചിൽ നിന്ന് വെള്ള ഷർട്ടും മുണ്ടും ധരിച്ച ഒരാൾ ഇറങ്ങിപ്പോകുന്ന ദൃശ്യങ്ങൾ പൊലീസിന് ലഭിച്ചു. അതേദിവസം പുലർച്ചെ 12.30-ഓടെയാണ് സംഭവം നടന്നതെന്ന് പൊലീസ് അന്വേഷണത്തിൽ കണ്ടെത്തി. സംശയിക്കപ്പെടുന്നയാൾ കോച്ചിൽ നിന്നിറങ്ങുന്നതിന് ഏഴര മണിക്കൂർ മുൻപായിരുന്നു ഇത്. പുലർച്ചെ 12.30-ന് പ്ലാറ്റ്ഫോം 5-ന് സമീപത്തുകൂടി നടന്നുപോവുകയായിരുന്ന യുവതിയെ പ്രതി പിടികൂടി, ആളൊഴിഞ്ഞ കോച്ചിലേക്ക് ബലമായി വലിച്ചിഴച്ചുകൊണ്ടുപോയി ബലാത്സംഗം ചെയ്യുകയായിരുന്നുവെന്ന് ഔദ്യോഗിക പ്രസ്താവനയിൽ പറയുന്നു. തുടർന്ന് യുവതിയെ ക്രൂരമായി മർദിക്കുകയും ചവിട്ടുകയും ചെയ്തു. ഗുരുതരമായ പരിക്കുകളേറ്റാണ് യുവതി മരിച്ചതെന്ന് പൊലീസ് വ്യക്തമാക്കി.
കഴിഞ്ഞ നാല് മാസമായി പ്രതി പ്രദേശത്ത് അലഞ്ഞുതിരിഞ്ഞു നടക്കുകയായിരുന്നുവെന്ന് പൊലീസ് അറിയിച്ചു. അറസ്റ്റിനും ചോദ്യം ചെയ്യലിനും ശേഷം പ്രതിയെ കോടതിയിൽ ഹാജരാക്കി റിമാൻഡ് ചെയ്തു. കൊല്ലപ്പെട്ട യുവതിയെ തിരിച്ചറിയാനും കുടുംബത്തെ കണ്ടെത്താനുമുള്ള ശ്രമങ്ങൾ പൊലീസ് തുടരുകയാണ്. റെയിൽവേ സ്റ്റേഷനിലെ സുരക്ഷാ വീഴ്ചകളിലേക്കും, നാല് ദിവസത്തോളം മൃതദേഹം കണ്ടെത്താതിരുന്ന സാഹചര്യത്തിലേക്കും ഈ സംഭവം ഗുരുതരമായ ചോദ്യങ്ങൾ ഉയർത്തുന്നുണ്ട്.
Story Summary
Railway police have arrested 31-year-old Ayyappan from Kanyakumari in connection with the rape and murder of an unidentified woman, aged around 50, inside a stationary coach at Nagercoil Junction railway station. Her decomposed body was found beneath a seat in a coach reserved for persons with disabilities at Yard No. 13 on November 18, four days after the crime occurred on November 14. CCTV footage helped trace the suspect exiting the coach hours after the attack, and the accused has been remanded to judicial custody while police work to identify the victim.




