ശിവകാർത്തികേയൻ നായകനായ ഏറ്റവും പുതിയ ചിത്രം ‘പരാശക്തി’ തമിഴ്നാട് ബോക്സ് ഓഫീസിൽ മികച്ച നേട്ടം കൊയ്യുന്നു. വിജയ്യുടെ ‘ജനനായകൻ’ റിലീസ് മാറ്റിവെച്ചത് ചിത്രത്തിന് അനുകൂലമായെങ്കിലും വലിയൊരു കുതിപ്പ് നടത്താൻ സിനിമയ്ക്ക് സാധിച്ചില്ലെന്നാണ് കളക്ഷൻ റിപ്പോർട്ടുകൾ സൂചിപ്പിക്കുന്നത്. എങ്കിലും തമിഴ്നാട്ടിൽ നിന്ന് മാത്രം ചിത്രം ഇതിനോടകം 58.55 കോടി രൂപ ഗ്രോസ് കളക്ഷൻ നേടി ഒരു മാന്ത്രിക സംഖ്യ കടന്നിരിക്കുകയാണ്. ആദ്യ ദിനം തമിഴ്നാട്ടിൽ നിന്ന് 12.5 കോടി രൂപയാണ് ചിത്രം നേടിയത്.
ആഗോള ബോക്സ് ഓഫീസിലും ‘പരാശക്തി’ കരുത്തുകാട്ടുന്നുണ്ട്. ഇതുവരെയായി ഏകദേശം 81 കോടി രൂപയാണ് ചിത്രം ആഗോളതലത്തിൽ നേടിയതെന്ന് പ്രമുഖ ട്രേഡിംഗ് അനലിസ്റ്റുകളായ സാക്നിൽക്ക് റിപ്പോർട്ട് ചെയ്യുന്നു. സുധ കൊങ്കര സംവിധാനം ചെയ്ത ഈ പീരിയഡ് ഡ്രാമയിൽ ശിവകാർത്തികേയനൊപ്പം രവി മോഹനും പ്രധാന വേഷത്തിൽ എത്തുന്നുണ്ട്. അഥർവയും ശിവകാർത്തികേയനും സഹോദരന്മാരായി വേഷമിടുന്ന ചിത്രത്തിൽ തെലുങ്ക് താരം ശ്രീലീലയാണ് നായിക.
കേരളത്തിലും വലിയ ആവേശത്തോടെയാണ് ചിത്രം പ്രദർശനം തുടരുന്നത്. ശ്രീ ഗോകുലം ഗോപാലന്റെ നേതൃത്വത്തിലുള്ള ശ്രീ ഗോകുലം മൂവീസാണ് ചിത്രത്തിന്റെ കേരളാ വിതരണാവകാശം സ്വന്തമാക്കിയിരിക്കുന്നത്. ഡ്രീം ബിഗ് ഫിലിംസ് വഴിയാണ് ചിത്രം കേരളത്തിലെ തിയേറ്ററുകളിൽ എത്തിയിരിക്കുന്നത്.
The post ബോക്സ് ഓഫീസിൽ കുതിച്ച് ശിവകാർത്തികേയന്റെ ‘പരാശക്തി’; തമിഴ്നാട്ടിൽ നിന്ന് ആ മാന്ത്രിക സംഖ്യ കടന്നു appeared first on Express Kerala.