ഇരിങ്ങാലക്കുട : യുനസ്കോ നാട്യശാസ്ത്രത്തെ അംഗീകരിച്ചതിൻ്റെ ആഘോഷങ്ങളുടെ ഭാഗമായി ഡോ. കെ.എൻ. പിഷാരടി സ്മാരക കഥകളി ക്ലബ്ബ് ഒരുക്കിയ പ്രഥമ രംഗകലാ കോൺഫറൻസ് സമാപിച്ചു.
ക്രൈസ്റ്റ് കോളെജ് ഇന്ത്യൻ നോളജ് സിസ്റ്റം സെല്ലുമായി ചേർന്ന് സർവ്വമംഗളയുടെ സഹകരണത്തോടെ കോളെജ് ഓഡിറ്റോറിയത്തിൽ നടന്ന ദേശീയതല സെമിനാർ ഗുരു ഡോ. സദനം കൃഷ്ണൻകുട്ടി തിരിതെളിയിച്ച് സമാരംഭിച്ചു.
“സിദ്ധാന്തത്തിന്റെയും പ്രയോഗത്തിന്റെയും ഇടയിലെ ഭ്രംശരേഖകൾ : നാട്യശാസ്ത്രവും കേരളത്തിൻ്റെ പാരമ്പര്യ അവതരണ രൂപങ്ങളും” എന്ന വിഷയത്തിൽ ഡോ. എം.വി. നാരായണൻ പ്രബന്ധം അവതരിപ്പിച്ചു.
“കഥകളിയിലെ ചതുർവിധാഭിനയം – ആംഗികം, ആഹാര്യം” എന്ന വിഷയത്തെ ആസ്പദമാക്കി കലാമണ്ഡലം നീരജും, “കഥകളിയിലെ ചതുർവിധാഭിനയം –
സാത്വികം, വാചികം” എന്ന വിഷയത്തിൽ കലാമണ്ഡലം മനോജ് കുമാറും ചൊല്ലിയാടി.
“നാട്യശാസ്ത്രത്തിലെ ആതോദ്യവിധി” എന്ന വിഷയത്തിൽ കല്ലേക്കുളങ്ങര അച്യുതൻകുട്ടി മാരാർ പ്രബന്ധാവതരണം നടത്തി.
“കഥകളിയിലെ ഭാഷയും ഘടനയും പ്രയോഗങ്ങളും നാട്യശാസ്ത്ര ദർശനങ്ങളും” എന്ന വിഷയത്തിൽ ഡോ. കലാനിലയം പാഴൂർ ദാമോദരൻ മോഡറേറ്ററായി നയിച്ച ചർച്ചയിൽ ഡോ. കലാമണ്ഡലം അരുൺ വാര്യർ, കലാമണ്ഡലം വൈശാഖ്, കലാമണ്ഡലം ആദിത്യൻ, കലാമണ്ഡലം ആഷിക് എന്നിവർ പങ്കെടുത്തു.
സമാപന സമ്മേളനം പദ്മശ്രീ മട്ടന്നൂർ ശങ്കരൻകുട്ടി മാരാർ ഉദ്ഘാടനം ചെയ്തു.
സിനിമ സംവിധായകൻ സത്യൻ അന്തിക്കാട് വിശിഷ്ടാതിഥിയായി.
നവരസ സാധനയുടെ ഉപജ്ഞാതാവ് കൂടിയാട്ട കുലപതി വേണുജിയെ കേരള സംഗീത നാടക അക്കാദമി ചെയർമാൻ മട്ടന്നൂർ ശങ്കരൻകുട്ടി ആദരിച്ചു.
ക്ലബ്ബ് ഏർപ്പെടുത്തിയ “ഡോ. കെ.എൻ. പിഷാരടി സ്മാരക കഥകളി പുരസ്കാര” ജേതാവ് കലാമണ്ഡലം രാമചന്ദ്രൻ ഉണ്ണിത്താനെയും, പ്രഥമ “ചന്ദ്രപ്രഭാ പുരസ്കാര” ജേതാവ് പള്ളം ചന്ദ്രനെയും, പി. ബാലകൃഷ്ണൻ സ്മാരക കഥകളി എൻഡോമെന്റിന് അർഹനായ കോട്ടയ്ക്കൽ ഗോവിന്ദ ഗോപകുമാറിനേയും മട്ടന്നൂർ ശങ്കരൻകുട്ടി മാരാരും, സത്യൻ അന്തിക്കാടും ചേർന്ന് പുരസ്കാരവും എൻഡോവ്മെൻ്റും അംഗവസ്ത്രവും നൽകി ആദരിച്ചു.
ക്ലബ്ബിൻ്റെ സുവർണ്ണ ജൂബിലി സ്മരണിക – ‘സുവർണ്ണരേഖ’ കേരള സാഹിത്യ അക്കാദമി ഉപാധ്യക്ഷൻ അശോകൻ ചെരുവിൽ പ്രകാശനം ചെയ്തു.
ഭാരത സാംസ്കാരിക മന്ത്രാലയത്തിൻ്റെ വിദഗ്ധ സമിതി അംഗം ശശി നാരായണൻ, ക്രൈസ്റ്റ് കോളെജ് മാനേജർ ഫാ. ജോയ് പീണിക്കപ്പറമ്പിൽ, പ്രിൻസിപ്പൽ ഡോ. ജോളി ആൻഡ്രൂസ്, ഡോ. സന്തോഷ് അകവൂർ എന്നിവർ ആശംസകൾ അർപ്പിച്ചു.
രമേശൻ നമ്പീശൻ അധ്യക്ഷത വഹിച്ച ചടങ്ങിൽ അഡ്വ. രാജേഷ് തമ്പാൻ സ്വാഗതവും പ്രദീപ് നമ്പീശൻ നന്ദിയും പറഞ്ഞു.
തുടർന്ന് “നാട്യശാസ്ത്രവും നവരസ സാധനയും ആധുനികകാലത്തെ കളരിപാഠം – ഒരവലോകനം” എന്ന വിഷയത്തിൽ ശ്രീലക്ഷ്മി ഗോവർദ്ധനൻ പ്രബന്ധം അവതരിപ്പിച്ചു.
പുറപ്പാട് മേളപ്പദത്തോടെ നടന്ന ഉത്തരാസ്വയംവരം കഥകളിയിൽ പ്രമുഖരായ കലാകാരന്മാർ പങ്കെടുത്തു.
