സർക്കാർ ജീവനക്കാർക്കും ഉദ്യോഗസ്ഥർക്കും സോഷ്യൽ മീഡിയ ഉപയോഗിക്കുന്നതിൽ കർശന നിയന്ത്രണങ്ങൾ ഏർപ്പെടുത്തിക്കൊണ്ട് ബിഹാർ സർക്കാർ സർവീസ് ചട്ടങ്ങൾ ഭേദഗതി ചെയ്തു. മുഖ്യമന്ത്രി നിതീഷ് കുമാറിന്റെ അധ്യക്ഷതയിൽ ചേർന്ന മന്ത്രിസഭാ യോഗമാണ് ‘ബിഹാർ പബ്ലിക് സെർവന്റ് കണ്ടക്ട് (ഭേദഗതി) റൂൾസ് 2026’ അംഗീകരിച്ചത്. പുതിയ നിയമപ്രകാരം സർക്കാർ ജീവനക്കാർ സോഷ്യൽ മീഡിയ അക്കൗണ്ടുകൾ തുടങ്ങുന്നതിന് മുൻപ് ബന്ധപ്പെട്ട അധികാരികളിൽ നിന്ന് മുൻകൂർ അനുമതി വാങ്ങണം. വ്യാജ പേരുകളിലോ അപരനാമങ്ങളിലോ അക്കൗണ്ട് തുടങ്ങുന്നതിനും ഔദ്യോഗിക മൊബൈൽ നമ്പറോ ഇ-മെയിലോ വ്യക്തിഗത അക്കൗണ്ടുകൾക്കായി ഉപയോഗിക്കുന്നതിനും കർശന വിലക്കുണ്ട്.
സർക്കാർ നയങ്ങൾ, വികസന പദ്ധതികൾ, സുപ്രീം കോടതിയുടെയോ ഹൈക്കോടതിയുടെയോ വിധികൾ എന്നിവയെക്കുറിച്ച് വ്യക്തിപരമായ അഭിപ്രായങ്ങൾ പ്രകടിപ്പിക്കാൻ പാടില്ലെന്നാണ് പുതിയ ഉത്തരവ്. രാഷ്ട്രീയ പാർട്ടികളെയോ സംഘടനകളെയോ അനുകൂലിക്കാനോ വിമർശിക്കാനോ അനുവാദമില്ല. ജോലിസ്ഥലത്ത് നിന്നുള്ള വീഡിയോകൾ, റീലുകൾ എന്നിവ ചിത്രീകരിക്കുന്നതും ഔദ്യോഗിക ചർച്ചകൾ ലൈവ് സ്ട്രീം ചെയ്യുന്നതും പൂർണ്ണമായും നിരോധിച്ചു. കൂടാതെ, സർക്കാർ രേഖകളോ രഹസ്യസ്വഭാവമുള്ള വിവരങ്ങളോ സോഷ്യൽ മീഡിയ വഴി പങ്കുവെക്കുന്നതും സർക്കാർ നേട്ടങ്ങളെ സ്വന്തം നേട്ടങ്ങളായി അവതരിപ്പിക്കുന്നതും കുറ്റകരമാണ്.
Also Read: കശ്മീരിലും ഹിമാചലിലും കനത്ത മഞ്ഞുവീഴ്ച! ആയിരത്തിലേറെ റോഡുകൾ അടച്ചു; സഞ്ചാരികൾ ദുരിതത്തിൽ
ഡിജിറ്റൽ ഇടങ്ങളിൽ ഉദ്യോഗസ്ഥർ അച്ചടക്കത്തോടും ഉത്തരവാദിത്തത്തോടും കൂടി പെരുമാറുന്നു എന്ന് ഉറപ്പാക്കാനാണ് ഈ നീക്കമെന്ന് സംസ്ഥാന സർക്കാർ വിശദീകരിച്ചു. നിയമങ്ങൾ ലംഘിക്കുന്ന ജീവനക്കാർക്കെതിരെ വകുപ്പുതല നടപടികൾ സ്വീകരിക്കുമെന്ന് ജനറൽ അഡ്മിനിസ്ട്രേഷൻ ഡിപ്പാർട്ട്മെന്റ് അഡീഷണൽ ചീഫ് സെക്രട്ടറി ബി. രാജേന്ദർ അറിയിച്ചു. ഡിസ്പ്ലേ പിക്ചറായി (DP) രാഷ്ട്രീയ ചിഹ്നങ്ങളോ പ്രതിഷേധ സൂചകങ്ങളോ ഉപയോഗിക്കുന്നതിനും ഉദ്യോഗസ്ഥർക്ക് വിലക്കുണ്ട്.
The post ബിഹാറിൽ സർക്കാർ ജീവനക്കാർക്ക് സോഷ്യൽ മീഡിയാ നിയന്ത്രണം; അക്കൗണ്ട് തുടങ്ങാൻ മുൻകൂർ അനുമതി വേണം, റീലുകൾക്ക് നിരോധനം appeared first on Express Kerala.