ത്രില്ലർ സിനിമകളുടെ പതിവ് ശൈലികളിൽ നിന്നും മാറി നടക്കാനാണ് തന്റെ പുതിയ ചിത്രമായ ‘വലതുവശത്തെ കള്ളനി’ലൂടെ ശ്രമിച്ചതെന്ന് സംവിധായകൻ ജീത്തു ജോസഫ്. ട്വിസ്റ്റുകളും സസ്പെൻസുകളും മാത്രമല്ല ഒരു ത്രില്ലറിന് വേണ്ടതെന്നും, മനുഷ്യബന്ധങ്ങളിലെ തീവ്രതയ്ക്കും വികാരങ്ങൾക്കും പ്രാധാന്യം നൽകുന്ന ഒരു ക്രൈം ഡ്രാമയാണ് ഇതെന്നും അദ്ദേഹം പറഞ്ഞു. സിനിമയെ കീറിമുറിച്ച് പരിശോധിക്കാൻ ആഗ്രഹിക്കുന്നവർക്ക് അതിനുള്ള സ്വാതന്ത്ര്യമുണ്ടെന്നും, ഒരു പരീക്ഷണ ചിത്രമെന്ന നിലയിലാണ് താൻ ഇതിനെ കാണുന്നതെന്നും റിലീസിന് ശേഷമുള്ള പ്രസ് മീറ്റിൽ അദ്ദേഹം വ്യക്തമാക്കി.
ബിജു മേനോനും ജോജു ജോർജ്ജും പ്രധാന വേഷങ്ങളിലെത്തുന്ന ഈ ചിത്രം ‘ദൃശ്യം’, ‘മെമ്മറീസ്’ തുടങ്ങിയ ഹിറ്റുകളിൽ നിന്ന് തികച്ചും വ്യത്യസ്തമായ അനുഭവമാണ് പ്രേക്ഷകർക്ക് നൽകുന്നത്. സസ്പെൻസുകൾക്ക് പിന്നാലെ പായുന്നതിന് പകരം കഥാപാത്രങ്ങളുടെ ആഴത്തിലുള്ള വൈകാരിക നിമിഷങ്ങളിലൂടെയാണ് കഥ വികസിക്കുന്നത്. തിയേറ്ററുകളിൽ നിന്ന് ലഭിക്കുന്ന മികച്ച പ്രതികരണങ്ങൾ സൂചിപ്പിക്കുന്നത് പ്രേക്ഷകർ ഈ പുതിയ പരീക്ഷണത്തെ ഇരുകൈയ്യും നീട്ടി സ്വീകരിച്ചു എന്നാണ്.
Also Read: ഹൃദയം കീഴടക്കി ദുൽഖർ-മൃണാൾ കോമ്പോ; ‘ഭീഗി ഭീഗി’ മ്യൂസിക് ആൽബം തരംഗമാകുന്നു!
ലെന, നിരഞ്ജന അനൂപ് തുടങ്ങി വലിയൊരു താരനിര അണിനിരക്കുന്ന ചിത്രത്തിന്റെ സാങ്കേതിക വശങ്ങളും ഏറെ പ്രശംസനീയമാണ്. സതീഷ് കുറുപ്പിന്റെ ഛായാഗ്രഹണവും വിഷ്ണു ശ്യാമിന്റെ സംഗീതവും സിനിമയുടെ മൂഡ് നിലനിർത്തുന്നതിൽ വലിയ പങ്ക് വഹിക്കുന്നു. ഷാജി നടേശൻ നിർമ്മിച്ച ഈ ചിത്രം ത്രില്ലർ സിനിമകൾക്ക് പുതിയൊരു നിർവ്വചനം നൽകിക്കൊണ്ട് മികച്ച അഭിപ്രായങ്ങളുമായി പ്രദർശനം തുടരുകയാണ്.
The post ട്വിസ്റ്റുകളും സസ്പെൻസുകളും മാത്രമല്ല ത്രില്ലർ; ജീത്തു ജോസഫ് appeared first on Express Kerala.
