ലോകത്തെ ഏറ്റവും പ്രശസ്തമായ ആർട്ടിഫിഷ്യൽ ഇന്റലിജൻസ് സേവനമായ ചാറ്റ്ജിപിടി ബുധനാഴ്ച മണിക്കൂറുകളോളം പ്രവർത്തനരഹിതമായി. ചാറ്റുകൾ ലോഡ് ചെയ്യാൻ കഴിയാത്തതും നൽകുന്ന പ്രോംപ്റ്റുകൾക്ക് മറുപടി ലഭിക്കാത്തതും കാരണം ലോകമെമ്പാടുമുള്ള ലക്ഷക്കണക്കിന് ഉപയോക്താക്കളാണ് ബുദ്ധിമുട്ടിലായത്. പുതിയ സംഭാഷണങ്ങൾ തുടങ്ങാൻ ശ്രമിക്കുമ്പോൾ “എന്തോ കുഴപ്പം സംഭവിച്ചതായി തോന്നുന്നു” എന്ന പിശക് സന്ദേശമാണ് സ്ക്രീനിൽ തെളിഞ്ഞത്. പ്രശ്നം വ്യാപകമായതോടെ റിപ്പോർട്ട് ചെയ്യുന്ന വെബ്സൈറ്റായ ഡൗൺഡിറ്റക്ടറിൽ പരാതികളുടെ പ്രവാഹമായിരുന്നു.
പ്രശ്നം രൂക്ഷമായതോടെ ഓപ്പൺഎഐ തങ്ങളുടെ ഔദ്യോഗിക സ്റ്റാറ്റസ് പേജിലൂടെ തകരാർ സ്ഥിരീകരിച്ചു. ഇമേജ് ജനറേഷൻ, സെർച്ച്, കോഡെക്സ് തുടങ്ങിയ മിക്ക സേവനങ്ങളെയും തടസ്സം ബാധിച്ചതായി കമ്പനി അറിയിച്ചു. തകരാർ തിരിച്ചറിഞ്ഞതായും പരിഹരിക്കാനുള്ള നടപടികൾ സ്വീകരിച്ചുവരികയാണെന്നും പിന്നീട് കമ്പനി വ്യക്തമാക്കി. മാക്കിനായുള്ള പുതിയ കോഡെക്സ് ആപ്പ് പുറത്തിറങ്ങി തൊട്ടടുത്ത ദിവസം തന്നെയുണ്ടായ ഈ സാങ്കേതിക തടസ്സം കമ്പനിക്ക് വലിയ തിരിച്ചടിയായി. ആദ്യ ദിവസം തന്നെ രണ്ട് ലക്ഷത്തിലധികം ഡൗൺലോഡുകൾ നേടിയ ആപ്പിന് വലിയ ഡിമാൻഡാണ് വിപണിയിലുള്ളത്.
ചാറ്റ്ജിപിടി പണിമുടക്കിയതോടെ സോഷ്യൽ മീഡിയ പ്ലാറ്റ്ഫോമായ X-ൽ തമാശകളും മീമുകളും നിറഞ്ഞു. പെട്ടെന്നൊരു നിമിഷം സ്വന്തം ബുദ്ധി ഉപയോഗിച്ച് ജോലി ചെയ്യേണ്ടി വന്നതിനെക്കുറിച്ചും മറ്റ് എഐ ടൂളുകളെ ആശ്രയിക്കേണ്ടി വന്നതിനെക്കുറിച്ചും ഉപയോക്താക്കൾ രസകരമായ പോസ്റ്റുകൾ പങ്കുവെച്ചു. എങ്കിലും പ്രൊഫഷണൽ ആവശ്യങ്ങൾക്കും കോഡിംഗിനും ചാറ്റ്ജിപിടിയെ ആശ്രയിക്കുന്ന വലിയൊരു വിഭാഗം ഉപയോക്താക്കൾക്ക് ഈ തടസ്സം കനത്ത പ്രത്യാഘാതമുണ്ടാക്കി. നിലവിൽ തകരാറുകൾ പരിഹരിച്ച് സേവനങ്ങൾ സാധാരണ നിലയിലാക്കാനുള്ള നിരീക്ഷണത്തിലാണ് ഓപ്പൺഎഐ അധികൃതർ.
The post ചാറ്റ്ജിപിടി പണിമുടക്കി! ലോകമെമ്പാടും സേവനങ്ങൾ തടസ്സപ്പെട്ടു; പ്രതിസന്ധിയിലായി ലക്ഷക്കണക്കിന് ഉപയോക്താക്കൾ, റിപ്പോർട്ട് appeared first on Express Kerala.
