കത്തുന്ന വേനലിൽ ദാഹം മാറ്റാൻ നാരങ്ങാവെള്ളത്തോളം മികച്ച മറ്റൊരു പാനീയമില്ല. എന്നാൽ അതിഥികൾ ഒരുപാടുകൂടുകയും കയ്യിൽ ആകെ ഒരു നാരങ്ങ മാത്രം ഉണ്ടാവുകയും ചെയ്താലോ? വിഷമിക്കേണ്ട, വെറും ഒരു നാരങ്ങ ഉപയോഗിച്ച് ഒന്നിലധികം ആളുകൾക്ക് രുചികരമായി വിളമ്പാൻ കഴിയുന്ന ഒരു ‘മാജിക്’ ജ്യൂസ് റെസിപ്പി ഇപ്പോൾ സോഷ്യൽ മീഡിയയിൽ വൈറലാവുകയാണ്.
സാധാരണ നാരങ്ങാവെള്ളത്തിൽ നിന്ന് വ്യത്യസ്തമായി, വെള്ളം മാത്രം ചേർക്കുന്നതിന് പകരം നാരങ്ങയുടെ തനതായ രുചിയും ഗുണങ്ങളും നിലനിർത്തിക്കൊണ്ട് എങ്ങനെ അളവ് വർധിപ്പിക്കാം എന്നാണ് ഈ റെസിപ്പി കാട്ടിത്തരുന്നത്.
Also Read: വാതിൽ പൂട്ടിയോ എന്ന് വീണ്ടും വീണ്ടും നോക്കാറുണ്ടോ? അനാവശ്യ ചിന്തകളും ഒസിഡിയും തിരിച്ചറിയാം
രഹസ്യക്കൂട്ട് ഇതാ
ഈ പ്രത്യേക ജ്യൂസ് തയ്യാറാക്കാൻ നാരങ്ങയ്ക്കൊപ്പം മറ്റ് ചില ചേരുവകൾ കൂടി ആവശ്യമാണ്.
നാരങ്ങ
ചെറിയ കഷ്ണം ഇഞ്ചി
പച്ചമുളക് (ആവശ്യമെങ്കിൽ)
ഒരു പിടി ചിരകിയ തേങ്ങ
പുതിനയില (4-5 എണ്ണം)
പഞ്ചസാര, വെള്ളം, ഐസ് ക്യൂബ്സ്
തയ്യാറാക്കുന്ന വിധം
ആദ്യം ഒരു നാരങ്ങ പിഴിഞ്ഞ് നീരെടുക്കുക. ഇതിലേക്ക് ഇഞ്ചി കഷ്ണം, ചിരകിയ തേങ്ങ, പുതിനയില, മധുരത്തിന് ആവശ്യമായ പഞ്ചസാര എന്നിവ ചേർക്കുക. അല്പം വെള്ളം കൂടി ചേർത്ത് മിക്സിയിൽ നന്നായി അടിച്ചെടുക്കണം.
തേങ്ങയുടെ പാലും ഇഞ്ചിയുടെയും പുതിനയുടെയും ഫ്ലേവറും ചേരുന്നതോടെ ജ്യൂസിന്റെ അളവ് വർധിക്കുമെന്ന് മാത്രമല്ല, സാധാരണ നാരങ്ങാവെള്ളത്തേക്കാൾ ഇരട്ടി രുചിയും ഉന്മേഷവും ലഭിക്കുകയും ചെയ്യും. തയ്യാറാക്കിയ മിശ്രിതം നന്നായി അരിച്ചെടുത്ത് ഗ്ലാസുകളിലേക്ക് മാറ്റാം. ആവശ്യത്തിന് ഐസ് ക്യൂബ്സ് കൂടി ചേർത്താൽ ‘സ്പെഷ്യൽ ഐറ്റം’ റെഡി.
കുറഞ്ഞ ചിലവിൽ കൂടുതൽ പേർക്ക് വിളമ്പാം എന്നതും, തേങ്ങ ചേർക്കുന്നത് കൊണ്ട് ലഭിക്കുന്ന പ്രത്യേക ക്രീമി ടേസ്റ്റുമാണ് ഈ റെസിപ്പിയെ വ്യത്യസ്തമാക്കുന്നത്. വീട്ടിലെത്തുന്ന അതിഥികളെ അമ്പരപ്പിക്കാൻ ഇനി ഈ ഒരു നാരങ്ങ വിദ്യ പരീക്ഷിച്ചു നോക്കാവുന്നതാണ്.
The post ഒന്നല്ല, പത്തുപേർക്കും കുടിക്കാം; ഒരു നാരങ്ങ കൊണ്ട് അദ്ഭുത ജ്യൂസ്! appeared first on Express Kerala.
