അനുരാഗ് ഠാക്കൂറിന് ബിസിസിഐയുടെ (BCCI) ഭരണപരമായ പദവികൾ വഹിക്കുന്നതിന് ഏർപ്പെടുത്തിയിരുന്ന വിലക്ക് സുപ്രീംകോടതി നീക്കി. എട്ട് വർഷത്തോളമായി നിലനിന്നിരുന്ന ഈ വിലക്കാണ് ചീഫ് ജസ്റ്റിസ് സൂര്യ കാന്ത്, ജസ്റ്റിസ് ജോയ്മാല്യ ബാഗ്ചി എന്നിവരടങ്ങിയ ബെഞ്ച് അവസാനിപ്പിച്ചത്. ഇതോടെ ക്രിക്കറ്റ് ഭരണരംഗത്തേക്ക് തിരിച്ചെത്താൻ മുൻ ബിസിസിഐ പ്രസിഡന്റ് കൂടിയായ ഠാക്കൂറിന് വഴിതെളിഞ്ഞു.
ബിസിസിഐയുടെ സ്വയംഭരണവുമായി ബന്ധപ്പെട്ട വിഷയത്തിൽ ഐസിസി ചെയർമാനുമായി നടത്തിയ കത്തിടപാടുകളിൽ തെറ്റായ വിവരങ്ങൾ നൽകിയതിനെത്തുടർന്നാണ് 2017-ൽ കോടതി ഇദ്ദേഹത്തിനെതിരെ നടപടിയെടുത്തത്. കോടതിയലക്ഷ്യത്തിന് കേസെടുക്കുകയും പദവികളിൽ നിന്ന് വിലക്കുകയും ചെയ്തിരുന്നു. തുടർന്ന് അനുരാഗ് ഠാക്കൂർ നേരിട്ട് ഹാജരായി മാപ്പ് പറഞ്ഞതോടെ കോടതിയലക്ഷ്യ നടപടികൾ ഒഴിവാക്കിയെങ്കിലും ഭരണപരമായ വിലക്ക് കോടതി പിൻവലിച്ചിരുന്നില്ല. ദീർഘകാലമായി നിലനിന്നിരുന്ന ഈ വിലക്ക് നീക്കണമെന്ന് ആവശ്യപ്പെട്ട് അനുരാഗ് ഠാക്കൂർ സമർപ്പിച്ച ഹർജി പരിഗണിച്ചാണ് കോടതിയുടെ പുതിയ ഉത്തരവ്. സുപ്രീംകോടതിയുടെ ഈ തീരുമാനം ഇന്ത്യൻ ക്രിക്കറ്റ് ഭരണരംഗത്ത് നിർണ്ണായകമാകും. എട്ട് വർഷത്തെ നീണ്ട കാത്തിരിപ്പിന് ശേഷമാണ് ഠാക്കൂറിന് അനുകൂലമായ വിധി വരുന്നത്.
The post അനുരാഗ് ഠാക്കൂറിന് ആശ്വാസം; ബിസിസിഐ വിലക്ക് സുപ്രീംകോടതി നീക്കി appeared first on Express Kerala.
