കട തുറക്കുന്നത് സ്നേഹത്തിനല്ല, എന്റെ ശവക്കല്ലറ കുഴിക്കാൻ; രാഹുലിന് മോദിയുടെ മറുപടി

രാജ്യസഭയിൽ രാഷ്ട്രപതിയുടെ നയപ്രഖ്യാപന പ്രസംഗത്തിനുള്ള നന്ദിപ്രമേയ ചർച്ചയ്ക്ക് മറുപടി പറയവേ, കോൺഗ്രസിനും ഗാന്ധികുടുംബത്തിനുമെതിരെ രൂക്ഷവിമർശനവുമായി പ്രധാനമന്ത്രി നരേന്ദ്ര മോദി രംഗത്തെത്തി. സ്നേഹത്തിന്റെ കട തുറക്കുമെന്ന് അവകാശപ്പെടുന്നവർ തന്റെ ശവക്കല്ലറ കുഴിക്കാൻ ശ്രമിക്കുകയാണെന്നും എന്നാൽ ജനപിന്തുണയുള്ളിടത്തോളം കാലം അത് സാധ്യമല്ലെന്നും അദ്ദേഹം പറഞ്ഞു. രാഹുൽ ഗാന്ധിയെ പരോക്ഷമായി പരിഹസിച്ച പ്രധാനമന്ത്രി, സ്വന്തം ‘കുടുംബ സ്റ്റാർട്ടപ്പ്’ പോലും കൃത്യമായി നടത്താൻ കഴിയാത്തവരാണ് രാജ്യത്തെ നയിക്കാൻ മോഹിക്കുന്നതെന്ന് കുറ്റപ്പെടുത്തി.

പ്രസംഗത്തിന്റെ തുടക്കത്തിൽ തന്നെ പ്രതിപക്ഷ നേതാവ് മല്ലികാർജുൻ ഖാർഗെയെ പരിഹസിച്ച പ്രധാനമന്ത്രിയുടെ നടപടിയിൽ പ്രതിഷേധിച്ച് പ്രതിപക്ഷം സഭയിൽ നിന്ന് ഇറങ്ങിപ്പോയി. ഖാർഗെയ്ക്ക് സംസാരിക്കാൻ മുൻഗണന നൽകാത്തതിനെ ചൊല്ലിയുള്ള തർക്കമാണ് പ്രതിഷേധത്തിൽ കലാശിച്ചത്. പ്രതിപക്ഷം സഭ വിട്ടതിനുശേഷം ഭരണകക്ഷി അംഗങ്ങളെ സാക്ഷിയാക്കി ഒന്നര മണിക്കൂറിലധികം നീണ്ട പ്രസംഗത്തിൽ, പ്രതിപക്ഷത്തിന്റെ നിലപാട് താഴെത്തട്ടിൽ നിന്ന് രാഷ്ട്രപതി പദവിയിലെത്തിയ ഒരു ഗിരിവർഗ വനിതയോടുള്ള അവഹേളനമാണെന്ന് മോദി ആരോപിച്ചു.

Also Read: സൗജന്യ പ്രഖ്യാപനങ്ങൾ അഴിമതിയോ? രാഷ്ട്രീയപ്പാർട്ടികൾക്കെതിരെയുള്ള ഹർജി മാർച്ചിൽ പരിഗണിക്കും

നെഹ്‌റുവിന്റെയും ഇന്ദിരാഗാന്ധിയുടെയും ഭരണകാലത്തെ നയങ്ങളെ കടന്നാക്രമിച്ചായിരുന്നു മോദിയുടെ പ്രസംഗം. രാജ്യത്തെ പൗരന്മാരെ പ്രശ്നങ്ങളായാണ് നെഹ്‌റു കണ്ടിരുന്നതെങ്കിൽ തനിക്ക് 140 കോടി ജനങ്ങളും പ്രശ്നപരിഹാരത്തിനുള്ള മാർഗങ്ങളാണെന്ന് അദ്ദേഹം അവകാശപ്പെട്ടു. ഇന്ദിരാഗാന്ധിയുടെ കാലത്തെ ആസൂത്രണ വീഴ്ചകളെയും അദ്ദേഹം വിമർശിച്ചു. കൂടാതെ, അനുച്ഛേദം 370 റദ്ദാക്കിയതും ഭീകരവാദത്തിനെതിരെയുള്ള കർശന നടപടികളും തന്റെ സർക്കാരിന്റെ വലിയ നേട്ടങ്ങളായി അദ്ദേഹം എടുത്തുപറഞ്ഞു.

സിഖ് സമൂഹത്തോടുള്ള കോൺഗ്രസിന്റെ സമീപനത്തെയും പ്രധാനമന്ത്രി ചോദ്യം ചെയ്തു. കേന്ദ്രമന്ത്രി രവനീത് ബിട്ടുവിനെ രാഹുൽ ഗാന്ധി ‘വഞ്ചകൻ’ എന്ന് വിളിച്ചത് സിഖുകാരെ ആകെ ആക്ഷേപിക്കുന്നതിന് തുല്യമാണെന്ന് അദ്ദേഹം പറഞ്ഞു. വിവിധ വിദേശ രാജ്യങ്ങളുമായുള്ള വ്യാപാര കരാറുകളെക്കുറിച്ച് സൂചിപ്പിച്ച അദ്ദേഹം, കേരളത്തിൽ നിന്നുള്ള അംഗം സി. സദാനന്ദന്റെ പ്രസംഗത്തെ പ്രത്യേകം പ്രശംസിക്കാനും മറന്നില്ല. പ്രതിപക്ഷത്തിന്റെ അഭാവത്തിലും സഭയിൽ വലിയ രാഷ്ട്രീയ പ്രത്യാക്രമണത്തിനാണ് പ്രധാനമന്ത്രിയുടെ പ്രസംഗം വേദിയായത്.

The post കട തുറക്കുന്നത് സ്നേഹത്തിനല്ല, എന്റെ ശവക്കല്ലറ കുഴിക്കാൻ; രാഹുലിന് മോദിയുടെ മറുപടി appeared first on Express Kerala.