ചെന്നൈയിൽ 23 കോടിയുടെ ലഹരിവേട്ട; ആറ് മലയാളികൾ പിടിയിൽ

തായ്‌ലൻഡിൽ നിന്ന് കടത്താൻ ശ്രമിച്ച 23 കോടി രൂപ വിലമതിക്കുന്ന ഹൈഡ്രോപോണിക് കഞ്ചാവുമായി ആറ് മലയാളികൾ ചെന്നൈ വിമാനത്താവളത്തിൽ കസ്റ്റംസ് പിടിയിലായി. ബാങ്കോക്കിൽ നിന്നുള്ള രണ്ട് വ്യത്യസ്ത വിമാനങ്ങളിലായി എത്തിയ ഇവരിൽ നിന്ന് ആകെ 23 കിലോ കഞ്ചാവാണ് പിടികൂടിയത്. ഭക്ഷണപ്പൊതികളിലും ചോക്ലേറ്റ് പാക്കറ്റുകളിലും അതീവ രഹസ്യമായി ഒളിപ്പിച്ച നിലയിലായിരുന്നു മയക്കുമരുന്ന്. കാസർകോട്, കൊച്ചി സ്വദേശികളായ ഇവർ ഐടി മേഖലയിൽ പ്രവർത്തിക്കുന്നവരാണെന്ന് ഉദ്യോഗസ്ഥർ സ്ഥിരീകരിച്ചു.

ടൂറിസ്റ്റ് വിസയിൽ തായ്‌ലൻഡിലേക്ക് പോയ പ്രതികൾ അവിടെ എത്തി അടുത്ത ദിവസം തന്നെ മടങ്ങിയത് ഉദ്യോഗസ്ഥരിൽ സംശയമുണ്ടാക്കി. തുടർന്ന് നടത്തിയ വിശദമായ പരിശോധനയിലാണ് അന്താരാഷ്ട്ര വിപണിയിൽ വൻ വിലയുള്ള ഹൈഡ്രോപോണിക് കഞ്ചാവ് കണ്ടെത്തിയത്. ആദ്യ സംഘത്തിൽ നിന്ന് 15 കോടിയുടെയും രണ്ടാമത്തെ സംഘത്തിൽ നിന്ന് 8 കോടിയുടെയും കഞ്ചാവ് പിടിച്ചെടുത്തു. വിദേശത്ത് മയക്കുമരുന്ന് റാക്കറ്റുകൾ പ്രവർത്തിക്കുന്ന രീതിയെക്കുറിച്ച് അന്വേഷണം ആരംഭിച്ചിട്ടുണ്ട്.

Also Read: തിരുവല്ല പീഡനം! ‘കഴുത്തിൽ കത്തി വെച്ച് ബലാത്സംഗം ചെയ്തു’; കൂടുതൽ വെളിപ്പെടുത്തലുകളുമായി അതിജീവിത

പിടിയിലായവർ ബിരുദധാരികളും വിദഗ്ധരായ സോഫ്റ്റ്‌വെയർ എൻജിനീയർമാരുമാണ്. വിദ്യാഭ്യാസത്തിന് അനുയോജ്യമായ ജോലി ലഭിക്കാത്തതും നിലവിലെ ജോലിയിലെ തുച്ഛമായ വരുമാനവുമാണ് തങ്ങളെ ഇത്തരമൊരു പ്രവർത്തിയിലേക്ക് നയിച്ചതെന്ന് പ്രതികൾ ചോദ്യം ചെയ്യലിൽ മൊഴി നൽകി. ആഡംബര ജീവിതം നയിക്കാൻ പെട്ടെന്ന് പണം സമ്പാദിക്കാനുള്ള എളുപ്പവഴിയായാണ് തങ്ങൾ മയക്കുമരുന്ന് കടത്ത് തിരഞ്ഞെടുത്തതെന്നും ഇവർ സമ്മതിച്ചു.

The post ചെന്നൈയിൽ 23 കോടിയുടെ ലഹരിവേട്ട; ആറ് മലയാളികൾ പിടിയിൽ appeared first on Express Kerala.