ആന്ധ്രാപ്രദേശിൽ അത്യാധുനികമായ ഓട്ടോമേറ്റഡ് ഡ്രൈവിംഗ് ടെസ്റ്റ് ട്രാക്കുകൾ സ്ഥാപിക്കുന്നതിനായി മാരുതി സുസുക്കിയും സംസ്ഥാന സർക്കാരും തമ്മിൽ ധാരണാപത്രത്തിൽ ഒപ്പുവച്ചു. എലൂരു, ഓംഗോൾ, വിജയനഗരം, അനകാപ്പള്ളി എന്നീ നാല് ആർടിഒ കേന്ദ്രങ്ങളിലാണ് പുതിയ സംവിധാനം നിലവിൽ വരുന്നത്. മാരുതി സുസുക്കിയുടെ കോർപ്പറേറ്റ് സോഷ്യൽ റെസ്പോൺസിബിലിറ്റി (CSR) പദ്ധതിയുടെ ഭാഗമായാണ് ഈ സംരംഭം നടപ്പിലാക്കുന്നത്. ഇതോടെ രാജ്യത്തുടനീളമുള്ള മാരുതിയുടെ ഓട്ടോമേറ്റഡ് ട്രാക്കുകളുടെ എണ്ണം 81 ആയി ഉയരും.
തികച്ചും സുതാര്യവും കാര്യക്ഷമവുമായ ഡ്രൈവിംഗ് ടെസ്റ്റുകൾ ഉറപ്പാക്കാൻ ലക്ഷ്യമിട്ടുള്ളതാണ് ഈ പുതിയ ഓട്ടോമേറ്റഡ് ട്രാക്കുകൾ. ഡ്രൈവിംഗ് ടെസ്റ്റുകളിൽ മാനുവൽ ഇടപെടലുകൾ പൂർണ്ണമായും ഒഴിവാക്കി, ഹൈ-ഡെഫിനിഷൻ ക്യാമറകൾ, RFID സെൻസറുകൾ, റിയൽ-ടൈം ഡാറ്റ അനലിറ്റിക്സ് എന്നിവയുടെ സഹായത്തോടെയാകും ഉദ്യോഗാർത്ഥികളുടെ പ്രകടനം വിലയിരുത്തുക. കേന്ദ്ര മോട്ടോർ വാഹന ചട്ടങ്ങൾ അനുസരിച്ച് സിസ്റ്റം തന്നെ സ്വയം ഫലം തയ്യാറാക്കുന്നതിനാൽ പക്ഷപാതരഹിതമായ പരീക്ഷാ രീതി ഉറപ്പാക്കാൻ സാധിക്കും.
Also Read; റോഡിലെ കൊട്ടാരം! അത്യാധുനിക ഫീച്ചറുകളുമായി പുതിയ മെഴ്സിഡസ്-ബെൻസ് വി-ക്ലാസ് വരുന്നു
ട്രാക്കുകൾ പ്രവർത്തനക്ഷമമായാൽ ആദ്യ മൂന്ന് വർഷത്തേക്ക് അവയുടെ പരിപാലന ചുമതല മാരുതി സുസുക്കി തന്നെയായിരിക്കും വഹിക്കുക. ഡ്രൈവർ പരിശീലനത്തിലും റോഡ് സുരക്ഷയിലും കൂടുതൽ കൃത്യത കൊണ്ടുവരുന്നതിലൂടെ അപകടങ്ങൾ കുറയ്ക്കുകയാണ് ഈ പദ്ധതിയിലൂടെ ലക്ഷ്യമിടുന്നത്. ഡ്രൈവിംഗ് ലൈസൻസ് അനുവദിക്കുന്ന പ്രക്രിയയിൽ കൂടുതൽ ഗുണമേന്മയും വേഗതയും കൈവരിക്കാൻ ആന്ധ്രാപ്രദേശിലെ ഈ പുതിയ ആർടിഒ സംവിധാനങ്ങൾ സഹായിക്കും.
The post ലൈസൻസ് ഇനി കിറുകൃത്യം! ഓട്ടോമേറ്റഡ് ഡ്രൈവിംഗ് ട്രാക്കുകളുമായി മാരുതി സുസുക്കിയും സർക്കാരും appeared first on Express Kerala.
