“ഈ പടമൊന്ന് രക്ഷപ്പെടുത്തണം”; ‘ഭ.ഭ.ബ്ബ’യിലേക്ക് ദിലീപ് വിളിച്ചതിനെക്കുറിച്ച് മനസ്സ് തുറന്ന് ഗോപി സുന്ദർ

ദിലീപിനെ നായകനാക്കി പുറത്തിറങ്ങിയ ‘ഭ.ഭ.ബ്ബ’ എന്ന ചിത്രത്തിന്റെ പശ്ചാത്തല സംഗീതം ഒരുക്കാൻ താൻ എത്തിയത് തീർത്തും അപ്രതീക്ഷിതമായാണെന്ന് വെളിപ്പെടുത്തിയിരിക്കുകയാണ് സംഗീതസംവിധായകൻ ഗോപി സുന്ദർ. റിലീസിന് തൊട്ടടുത്ത നിമിഷം ദിലീപ് നേരിട്ട് വിളിച്ച് ഒരു സിനിമയുണ്ടെന്നും അത് എങ്ങനെയെങ്കിലും രക്ഷപ്പെടുത്തണമെന്നും ആവശ്യപ്പെടുകയായിരുന്നുവെന്ന് അദ്ദേഹം പറഞ്ഞു. ഷാൻ റഹ്‌മാൻ ഗാനങ്ങൾക്ക് ഈണം പകർത്തിയ ചിത്രത്തിൽ അവസാന നിമിഷമാണ് ഗോപി സുന്ദർ പശ്ചാത്തല സംഗീതത്തിനായി എത്തിയത്.

ഡിസംബർ 18-ന് നിശ്ചയിച്ച റിലീസ് തീയതി മാറ്റാൻ കഴിയാത്ത സാഹചര്യത്തിലാണ് ചിത്രം തന്റെ അടുത്തേക്ക് എത്തിയതെന്ന് ഗോപി സുന്ദർ ഓർത്തെടുത്തു. തന്റെ കഴിവോ സ്നേഹമോ നോക്കിയല്ല, മറിച്ച് നിശ്ചിത സമയത്തിനുള്ളിൽ ജോലി പൂർത്തിയാക്കാൻ തനിക്ക് മാത്രമേ സാധിക്കൂ എന്ന വിശ്വാസത്തിലാവാം അവർ തന്നെ സമീപിച്ചതെന്ന് അദ്ദേഹം കരുതുന്നു. പ്രേക്ഷകർ തിയേറ്ററിൽ കണ്ണുംപൂട്ടി ആസ്വദിക്കാനും തലച്ചോറ് ഓഫ് ചെയ്തുവെച്ച് ആസ്വദിക്കാനും കഴിയുന്ന രീതിയിലുള്ള സിനിമയാകണം ഇതെന്ന് ദിലീപ് ആവശ്യപ്പെട്ടതായും അദ്ദേഹം വെളിപ്പെടുത്തി. നായകന്റെ നിർദ്ദേശപ്രകാരം ആവേശം പകരുന്ന എല്ലാ ഘടകങ്ങളും പശ്ചാത്തല സംഗീതത്തിൽ ഉൾപ്പെടുത്തിയിട്ടുണ്ടെന്നും അദ്ദേഹം കൂട്ടിച്ചേർത്തു.

Also Read: മാസ് അവതാരത്തിൽ നാനി വീണ്ടും; ‘ദ പാരഡൈസി’ലെ ആവേശമായി അനിരുദ്ധിന്റെ ഇൻട്രോ ഗാനം!

ഏറ്റവും കുറഞ്ഞ സമയം കൊണ്ട് സിനിമകൾക്ക് പശ്ചാത്തല സംഗീതം ഒരുക്കിയ അനുഭവങ്ങളും അദ്ദേഹം അഭിമുഖത്തിൽ പങ്കുവെച്ചു. പത്തുവർഷം മുൻപ് ‘നി.കൊ.ഞ.ച’ എന്ന സിനിമയുടെ സംഗീതം വെറും അഞ്ചുദിവസം കൊണ്ടാണ് പൂർത്തിയാക്കിയത്. സാധാരണയായി 15 മുതൽ 20 ദിവസം വരെയാണ് ഒരു സിനിമയ്ക്കായി താൻ എടുക്കാറുള്ളതെന്നും, എന്നാൽ ഇത്തരം അടിയന്തര സാഹചര്യങ്ങൾ തന്നെ തേടി എത്താറുണ്ടെന്നും അദ്ദേഹം പറഞ്ഞു. പകൽ സമയം മാത്രം ജോലി ചെയ്യാൻ താല്പര്യപ്പെടുന്ന ആളാണെങ്കിലും ഇത്തരം വെല്ലുവിളികൾ ഏറ്റെടുക്കാൻ തനിക്ക് സാധിക്കാറുണ്ട്.

മറ്റൊരു സിനിമയുടെ അനുഭവവും അദ്ദേഹം ഇതിനൊപ്പം പരാമർശിച്ചു. മറ്റൊരു സംഗീതസംവിധായകൻ ചെയ്ത വർക്ക് നിർമ്മാതാവിന് ഇഷ്ടപ്പെടാത്തതിനെ തുടർന്ന് മിക്‌സിങ് ഘട്ടത്തിൽ തനിക്ക് ലഭിച്ച ഒരു ചിത്രത്തിന്റെ പശ്ചാത്തല സംഗീതം ഒന്നരയാഴ്ച കൊണ്ടാണ് ഗോപി സുന്ദർ പൂർത്തിയാക്കിയത്. പകുതി വഴിയിൽ ഉപേക്ഷിക്കാതെ മുഴുവനായി തന്നെ ആ ചിത്രം പൂർത്തിയാക്കി നൽകിയെന്നും അത് സംഭവിക്കേണ്ടതായിരുന്നുവെന്നും അദ്ദേഹം പറഞ്ഞു. സാങ്കേതിക വിദ്യയുടെ വളർച്ച ഇത്തരം വേഗത്തിലുള്ള ജോലികൾക്ക് സഹായകരമാകുന്നുണ്ടെന്നും താരം നിരീക്ഷിച്ചു.

The post “ഈ പടമൊന്ന് രക്ഷപ്പെടുത്തണം”; ‘ഭ.ഭ.ബ്ബ’യിലേക്ക് ദിലീപ് വിളിച്ചതിനെക്കുറിച്ച് മനസ്സ് തുറന്ന് ഗോപി സുന്ദർ appeared first on Express Kerala.