കൊളംബോ: ട്വന്റി-20 ലോകകപ്പിൽ ഇന്ന് ക്രിക്കറ്റ് പ്രേമികൾ കാത്തിരിക്കുന്ന ആവേശപ്പോരാട്ടം. മുൻ ചാമ്പ്യന്മാരായ പാകിസ്ഥാൻ ഇന്ന് അമേരിക്കയെ നേരിടും. രണ്ട് വർഷം മുമ്പ് ഡാളസിൽ നടന്ന ലോകകപ്പിൽ അമേരിക്കയോട് ഏറ്റ അപ്രതീക്ഷിത തോൽവിയുടെ ഓർമ്മകൾ പാകിസ്ഥാനെ വേട്ടയാടുമ്പോൾ, മുംബൈയിൽ ഇന്ത്യയെ വിറപ്പിച്ചതിന്റെ ആത്മവിശ്വാസത്തിലാണ് അമേരിക്കൻ പട പാകിസ്ഥാനെ നേരിടാനൊരുങ്ങുന്നത്. ആദ്യ മത്സരത്തിൽ കരുത്തരായ ഇന്ത്യയെ 77/6 എന്ന നിലയിലേക്ക് തകർത്ത് വിറപ്പിച്ച അമേരിക്ക, നായകൻ സൂര്യകുമാർ യാദവിന്റെ ഒറ്റയാൾ പോരാട്ടത്തിലാണ് 29 റൺസിന് പരാജയപ്പെട്ടത്. ആ പ്രകടനം നൽകുന്ന കരുത്തിൽ പാകിസ്ഥാനെതിരെ മറ്റൊരു അട്ടിമറി ആവർത്തിക്കാനാണ് അമേരിക്കൻ ടീമിന്റെ പദ്ധതി.
Also Read: ഇവൻ അത്ഭുത ബാലൻ! 14-കാരൻ വൈഭവ് സൂര്യവംശിയെ സച്ചിനോട് ഉപമിച്ച് ജോസ് ബട്ലർ
കഴിഞ്ഞ തവണത്തെ തോൽവി പാക് താരങ്ങളുടെ മനസ്സിൽ വലിയ സമ്മർദ്ദമുണ്ടാക്കുമെന്ന് അമേരിക്കൻ ലെഗ് സ്പിന്നർ മുഹമ്മദ് മുഹ്സിൻ മുന്നറിയിപ്പ് നൽകി. പാകിസ്ഥാനിൽ ക്രിക്കറ്റ് വളർന്നു വന്ന മുഹ്സിന് അവിടുത്തെ മിക്ക താരങ്ങളുടെയും ശക്തിയും ബലഹീനതയും വ്യക്തമായി അറിയാം. ഈ രഹസ്യങ്ങൾ ടീമുമായി പങ്കുവെച്ചിട്ടുണ്ടെന്നും അദ്ദേഹം പറഞ്ഞു. അതേസമയം, പഴയ തോൽവിയെക്കുറിച്ച് തങ്ങൾ ചിന്തിക്കുന്നില്ലെന്നും ഈ ഫോർമാറ്റിൽ ഒരു ടീമും ചെറുതല്ലെന്ന് ബോധ്യമുണ്ടെന്നും പാക് പേസർ സൽമാൻ മിർസ പ്രതികരിച്ചു. ജയവും തോൽവിയും കളിയുടെ ഭാഗമാണെന്നും അദ്ദേഹം കൂട്ടിച്ചേർത്തു.
സൂപ്പർ എട്ട് പ്രതീക്ഷകൾ നിലനിർത്താൻ പാകിസ്ഥാന് ഇന്നത്തെ വിജയം അനിവാര്യമാണ്. ആദ്യ മത്സരത്തിൽ നെതർലൻഡ്സിനെതിരെ കഷ്ടിച്ച് രക്ഷപ്പെട്ട പാക് ടീം ഇന്ന് വലിയ മാറ്റങ്ങളോടെയാകും ഇറങ്ങുക. തുടർച്ചയായി ഫോം കണ്ടെത്താൻ പ്രയാസപ്പെടുന്ന മുൻ നായകൻ ബാബർ അസമിനെ പ്ലേയിംഗ് ഇലവനിൽ നിന്ന് പുറത്തിരുത്തിയേക്കുമെന്നാണ് സൂചനകൾ. പകരം പരിചയസമ്പന്നനായ ഫഖർ സമനെ ടീമിൽ ഉൾപ്പെടുത്തിയേക്കും. ബാബർ അസമിനെപ്പോലൊരു താരത്തെ മാറ്റിനിർത്തുന്നത് ടീമിനുള്ളിൽ വലിയ ചർച്ചകൾക്ക് വഴിമാറ്റിയേക്കാം.
The post ലോകകപ്പിൽ വീണ്ടും അട്ടിമറി ലക്ഷ്യമിട്ട് അമേരിക്ക; പാകിസ്ഥാന് ഇന്ന് ജീവന്മരണ പോരാട്ടം, ബാബർ അസം പുറത്തേക്ക്? appeared first on Express Kerala.
