ഐതിഹാസികമായ തൊഴിലാളി പണിമുടക്കിനെ പരിഹസിച്ച പ്രതിപക്ഷ നേതാവ് വി.ഡി. സതീശനെതിരെ രൂക്ഷമായ വിമർശനവുമായി സി.പി.ഐ.എം സംസ്ഥാന സെക്രട്ടറി എം.വി. ഗോവിന്ദൻ രംഗത്തെത്തി. ലോകം കണ്ട ഏറ്റവും വലിയ തൊഴിലാളി വർഗ്ഗ പോരാട്ടത്തെ താഴ്ത്തിക്കെട്ടാൻ ശ്രമിക്കുന്ന സതീശൻ, താനാണ് യഥാർത്ഥ ഇടതുപക്ഷമെന്ന് അവകാശപ്പെടുന്നത് പരിഹാസ്യമാണെന്ന് അദ്ദേഹം പറഞ്ഞു. രാഹുൽ ഗാന്ധി ഉൾപ്പെടെയുള്ള ദേശീയ നേതാക്കൾ പണിമുടക്കിന് ഐക്യദാർഢ്യം പ്രഖ്യാപിച്ചപ്പോൾ, കേരളത്തിൽ മാത്രം സതീശൻ സമര ദിനത്തിൽ ജാഥ നടത്തിയത് ഏത് നയത്തിന്റെ ഭാഗമാണെന്ന് അദ്ദേഹം ചോദിച്ചു.
നെഹ്രുവിസത്തെക്കുറിച്ച് പ്രാഥമിക ധാരണ പോലുമില്ലാത്ത സതീശൻ വെറും വാചകക്കസർത്ത് കൊണ്ടാണ് ഇടതുപക്ഷമാകാൻ ശ്രമിക്കുന്നതെന്ന് ഗോവിന്ദൻ മാസ്റ്റർ കുറ്റപ്പെടുത്തി. തൊഴിലാളി വർഗ്ഗ സമരങ്ങൾ ലോകത്ത് ഒരിക്കലും കാലഹരണപ്പെടില്ലെന്നും സാമൂഹിക പരിവർത്തനം നിലനിൽക്കുന്നിടത്തോളം കാലം പോരാട്ടങ്ങൾ തുടരുമെന്നും അദ്ദേഹം വ്യക്തമാക്കി. തൊഴിലാളികളുടെ അവകാശമായ ഡി.എ കുടിശ്ശിക സർക്കാർ കൊടുത്തുതീർക്കണമെന്നതാണ് പാർട്ടിയുടെയും സർക്കാരിന്റെയും നയമെന്ന് വ്യക്തമാക്കിയ അദ്ദേഹം, തൊഴിലാളി വിരുദ്ധ നിലപാടുകൾ സ്വീകരിക്കുന്ന പ്രതിപക്ഷത്തിന്റെ കാപട്യം ജനങ്ങൾ തിരിച്ചറിയുമെന്നും കൂട്ടിച്ചേർത്തു.
The post പണിമുടക്കിനെ പരിഹസിച്ചു! വി.ഡി. സതീശനെതിരെ ആഞ്ഞടിച്ച് എം.വി. ഗോവിന്ദൻ appeared first on Express Kerala.