ഭോപ്പാലിലെ കമൽ നഗർ പ്രദേശത്തുള്ള ഒഴിഞ്ഞ പറമ്പിലെ സെപ്റ്റിക് ടാങ്കിൽ നിന്നും അജ്ഞാതയായ യുവതിയുടെ മൃതദേഹം കണ്ടെടുത്തു. സെപ്റ്റിക് ടാങ്കിൽ ഉപേക്ഷിക്കപ്പെട്ട നിലയിലുള്ള ഒരു ഇരുമ്പ് പെട്ടിയിൽ കുത്തിനിറച്ച നിലയിലായിരുന്നു മൃതദേഹം കണ്ടെത്തിയത്. പ്രദേശം വിജനമായതിനാൽ കുറ്റകൃത്യം മറച്ചുവെക്കാൻ ബോധപൂർവം ഈ സ്ഥലം തിരഞ്ഞെടുത്തതാണെന്നാണ് പോലീസിന്റെ പ്രാഥമിക നിഗമനം.
മൃതദേഹത്തിന് മൂന്ന് മുതൽ നാല് ദിവസം വരെ പഴക്കമുണ്ടെന്നും യുവതിയെ മറ്റെവിടെയോ വെച്ച് കൊലപ്പെടുത്തിയ ശേഷം ഇവിടെ കൊണ്ടുതള്ളിയതാണെന്നും പോലീസ് സംശയിക്കുന്നു. കൊല്ലപ്പെട്ടയാളെ ഇതുവരെ തിരിച്ചറിഞ്ഞിട്ടില്ലെങ്കിലും, യുവതിയുടെ കൈകളിലുള്ള സവിശേഷമായ ടാറ്റൂകൾ കേന്ദ്രീകരിച്ച് തിരിച്ചറിയാനുള്ള ശ്രമങ്ങൾ ഊർജിതമാക്കിയിട്ടുണ്ട്. പ്രദേശത്ത് നിന്നും ദുർഗന്ധം വമിച്ചതിനെ തുടർന്ന് നാട്ടുകാർ അറിയിച്ചതനുസരിച്ചാണ് പോലീസും ഫോറൻസിക് സംഘവും സ്ഥലത്തെത്തി പരിശോധന നടത്തിയത്.
Also Read: യുവാവിനെ ഇടിവളയും ഇഷ്ടികയും കൊണ്ട് ആക്രമിച്ചു; ഒളിവിൽ കഴിഞ്ഞിരുന്ന പ്രതി പിടിയിൽ
മൃതദേഹം നിലവിൽ പോസ്റ്റ്മോർട്ടത്തിനായി അയച്ചിരിക്കുകയാണ്. ഇതിന്റെ ഫലം ലഭിച്ചാൽ മാത്രമേ മരണകാരണം സംബന്ധിച്ച് കൂടുതൽ വ്യക്തത വരികയുള്ളൂ. സംഭവത്തിൽ കൊലപാതകത്തിന് കേസ് രജിസ്റ്റർ ചെയ്ത പോലീസ്, നഗരത്തിലെ കാണാതായ സ്ത്രീകളെക്കുറിച്ചുള്ള വിവരങ്ങൾ ശേഖരിച്ചുവരികയാണ്. പ്രതികളെ കണ്ടെത്താനായി പ്രദേശത്തെ സിസിടിവി ദൃശ്യങ്ങളും പോലീസ് പരിശോധിക്കുന്നുണ്ട്.
The post ക്രൂരമായ കൊലപാതകം; പെട്ടിയിലാക്കി സെപ്റ്റിക് ടാങ്കിൽ തള്ളിയ നിലയിൽ അജ്ഞാത മൃതദേഹം appeared first on Express Kerala.