കൊച്ചി: കെഎസ്ആർടിസിയിലെ വനിതാ കണ്ടക്ടർമാർക്ക് ശമ്പളത്തോടുകൂടിയ ആർത്തവ അവധി അനുവദിക്കണമെന്ന ആവശ്യം ഗൗരവപരമായി പരിഗണിക്കേണ്ട വിഷയമാണെന്ന് ഹൈക്കോടതി. ഇക്കാര്യത്തിൽ നയപരമായ തീരുമാനം കൈക്കൊള്ളാനാകുമോ എന്ന് വ്യക്തമാക്കാൻ ജസ്റ്റിസ് എൻ. നഗരേഷ് സംസ്ഥാന സർക്കാരിന് നിർദേശം നൽകി.
കെഎസ്ആർടിസിയിൽ വനിതാ കണ്ടക്ടർമാർക്ക് നിലവിൽ ഡബിൾ ഡ്യൂട്ടി സംവിധാനമാണുള്ളതെന്നും പ്രതിദിനം 14 മുതൽ 16 മണിക്കൂർ വരെ നീളുന്ന കഠിനമായ ജോലി ചെയ്യേണ്ടി വരുന്നുണ്ടെന്നും ഹർജിക്കാർ കോടതിയെ ബോധിപ്പിച്ചു. കർണാടക, ഒഡിഷ, ബിഹാർ തുടങ്ങിയ സംസ്ഥാനങ്ങളിലെ ട്രാൻസ്പോർട്ട് കോർപ്പറേഷനുകളിൽ ഇത്തരം അവധി നിലവിലുണ്ടെന്ന കാര്യവും അവർ ചൂണ്ടിക്കാട്ടി. കേരള സർവീസ് ചട്ടങ്ങളിൽ ഇത്തരമൊരു അവധിക്ക് നിലവിൽ വ്യവസ്ഥയില്ലെന്ന് സർക്കാർ കോടതിയെ അറിയിച്ചു. കോർപ്പറേഷന്റെ കടുത്ത സാമ്പത്തിക പ്രതിസന്ധിയാണ് കെഎസ്ആർടിസി അധികൃതർ പ്രധാനമായും ഉന്നയിച്ചത്. ശമ്പളത്തോടുകൂടിയ അവധി നൽകുന്നത് സാമ്പത്തിക ബാധ്യത വർദ്ധിപ്പിക്കുമെന്ന് അവർ വാദിച്ചു.
Also Read: ഏത് കേസാണ് സിബിഐ നന്നായി അന്വേഷിച്ചത്? രാജീവ് ചന്ദ്രശേഖറിന്റെ ഹർജിയിൽ ഹൈക്കോടതിയുടെ ചോദ്യശരം
സ്ഥാപനത്തിന്റെ സാമ്പത്തിക അവസ്ഥയും പരിഗണിക്കേണ്ടതല്ലേ എന്ന് വാക്കാൽ ചോദിച്ച കോടതി, എങ്കിലും വിഷയം ഗൗരവകരമാണെന്ന് നിരീക്ഷിക്കുകയായിരുന്നു. ഹർജി രണ്ടാഴ്ചയ്ക്ക് ശേഷം വീണ്ടും പരിഗണിക്കാൻ മാറ്റിവെച്ചു. അപ്പോഴേക്കും സർക്കാരിന്റെ കൃത്യമായ നിലപാട് അറിയിക്കാനാണ് നിർദേശം.
The post കെഎസ്ആർടിസി വനിതാ കണ്ടക്ടർമാർക്ക് ആർത്തവ അവധി; സർക്കാരിനോട് വിശദീകരണം തേടി ഹൈക്കോടതി appeared first on Express Kerala.