ടി20 ലോകകപ്പിൽ നമീബിയക്കെതിരെയും യുഎസ്എക്കെതിരെയും തുടർച്ചയായ വിജയങ്ങൾ സ്വന്തമാക്കിയെങ്കിലും ഇന്ത്യൻ ക്യാമ്പിൽ ആശങ്ക പുകയുന്നു. ലോക ക്രിക്കറ്റിലെ തന്നെ കരുത്തുറ്റ ബാറ്റിങ് നിരയെന്ന് അവകാശപ്പെടുമ്പോഴും, താരതമ്യേന ദുർബലരായ അസോസിയേറ്റ് ടീമുകൾക്ക് മുന്നിൽ ഇന്ത്യൻ മധ്യനിരയും ഫിനിഷർമാരും പതറുന്ന കാഴ്ചയാണ് ഗ്രൂപ്പ് ഘട്ടത്തിൽ കണ്ടത്. സൂര്യകുമാർ യാദവ്, ഇഷാൻ കിഷൻ, ഹാർദിക് പാണ്ഡ്യ എന്നിവരുടെ വ്യക്തിഗത ഇന്നിങ്സുകളാണ് രണ്ട് മത്സരങ്ങളിലും ഇന്ത്യയെ രക്ഷിച്ചത്. എന്നാൽ ഒരു ടീം എന്ന നിലയിൽ ബാറ്റിങ് നിര ഒത്തിണക്കത്തോടെ ഉയരാത്തത് വരാനിരിക്കുന്ന സൂപ്പർ എട്ട് പോരാട്ടങ്ങളിൽ തിരിച്ചടിയാകുമോ എന്ന ഭീതിയിലാണ് ആരാധകർ.
നമീബിയക്കെതിരായ മത്സരത്തിൽ ഇന്ത്യൻ ഇന്നിങ്സിന്റെ ഗതി പരിശോധിച്ചാൽ ഈ പോരായ്മ വ്യക്തമാകും. ഏഴ് ഓവർ പിന്നിടുമ്പോൾ ഒന്നിന് 104 എന്ന വമ്പൻ സ്കോറിലായിരുന്ന ഇന്ത്യ, അടുത്ത ഏഴ് ഓവറിൽ നേടിയത് വെറും 40 റൺസ് മാത്രമാണ്. മൂന്ന് വിക്കറ്റുകൾ ഈ ഘട്ടത്തിൽ നഷ്ടമാവുകയും ചെയ്തു. നമീബിയൻ നായകൻ ജെറാർഡ് ഇറാസ്മസിന്റെയും സ്കോൾസിന്റെയും സ്പിൻ തന്ത്രങ്ങൾക്ക് മുന്നിൽ ഇന്ത്യൻ മധ്യനിര അക്ഷരാർത്ഥത്തിൽ മുട്ടുമടക്കി. 240-ന് മുകളിൽ എത്തുമെന്ന് കരുതിയ സ്കോർ 209-ൽ ഒതുങ്ങിയത് മധ്യ ഓവറുകളിലെ ഈ മെല്ലപ്പോക്ക് കാരണമാണ്. അവസാന അഞ്ച് ഓവറിൽ വെറും 41 റൺസ് മാത്രമാണ് നേടാനായത് എന്നത് ഫിനിഷിംഗിലെ പാളിച്ചകൾ അടിവരയിടുന്നു.
Also Read: ജഡേജയെയും ജയ്സ്വാളിനെയും മറികടന്ന് റിയാൻ പരാഗ്; രാജസ്ഥാൻ റോയൽസിന്റെ അമരത്ത് അപ്രതീക്ഷിത മാറ്റം
മധ്യനിരയിൽ സൂര്യകുമാർ യാദവും തിലക് വർമ്മയും ഹാർദിക്കും ഉൾപ്പെടുന്ന സഖ്യത്തിന് സ്ഥിരത കണ്ടെത്താനായിട്ടില്ല. പരിക്കിന് ശേഷം മടങ്ങിയെത്തിയ തിലക് വർമ്മയ്ക്ക് ലഭിച്ച തുടക്കങ്ങൾ വലിയ സ്കോറുകളിലേക്ക് മാറ്റാൻ സാധിക്കുന്നില്ല. കഴിഞ്ഞ രണ്ട് മത്സരങ്ങളിലും 25 റൺസ് വീതം എടുക്കാനേ താരത്തിന് കഴിഞ്ഞുള്ളൂ. സൂര്യകുമാർ യുഎസ്എക്കെതിരെ തിളങ്ങിയെങ്കിലും നമീബിയക്കെതിരെ നിരാശപ്പെടുത്തി. ഹാർദിക് പാണ്ഡ്യയുടെ ബാറ്റിങ് മാത്രമാണ് മധ്യനിരയിൽ ആശ്വാസം നൽകുന്ന ഘടകം. എന്നാൽ ഫിനിഷിങ് ചുമതലയുള്ള താരങ്ങളുടെ പ്രകടനമാണ് ടീം മാനേജ്മെന്റിനെ ഏറ്റവും കൂടുതൽ തലവേദനയാക്കുന്നത്.
ശിവം ദുബെ, റിങ്കു സിങ്, അക്സർ പട്ടേൽ എന്നീ ഫിനിഷർമാരിൽ നിന്ന് ഇതുവരെ ഒരു മികച്ച ഇന്നിങ്സ് പോലും ഉണ്ടായിട്ടില്ല. യുഎസ്എക്കെതിരെ പൂജ്യത്തിന് പുറത്തായ ദുബെ നമീബിയക്കെതിരെ റണ്ണൗട്ടായി. അക്സർ പട്ടേലാകട്ടെ അവസാന മത്സരത്തിൽ ഗോൾഡൻ ഡക്കായാണ് മടങ്ങിയത്. ഏറ്റവും വലിയ നിരാശ ‘ഡെസിഗ്നേറ്റഡ് ഫിനിഷർ’ എന്ന് വിശേഷിപ്പിക്കപ്പെടുന്ന റിങ്കു സിങ്ങിന്റെ പ്രകടനമാണ്. രണ്ട് മത്സരങ്ങളിൽ നിന്ന് ആകെ ഏഴ് റൺസ് മാത്രമാണ് റിങ്കുവിന്റെ സമ്പാദ്യം. 35 എന്ന പരിതാപകരമായ സ്ട്രൈക്ക് റേറ്റിൽ ബാറ്റ് ചെയ്യുന്ന റിങ്കുവിന്, സ്ലോ ഡെലിവറികളെയും ഫുള്ളർ ലെങ്ത് പന്തുകളെയും നേരിടുന്നതിൽ വലിയ പ്രയാസം നേരിടുന്നുണ്ട്.
ഗ്രൂപ്പ് ഘട്ടത്തിൽ ഇന്ത്യക്ക് കാര്യമായ വെല്ലുവിളികൾ ഉണ്ടാകില്ലെങ്കിലും സൂപ്പർ എട്ടിലെ സാഹചര്യം വ്യത്യസ്തമാണ്. ഓസ്ട്രേലിയ, ദക്ഷിണാഫ്രിക്ക, വെസ്റ്റ് ഇൻഡീസ് തുടങ്ങിയ കരുത്തരായ ടീമുകളാകും അവിടെ ഇന്ത്യയെ കാത്തിരിക്കുന്നത്. മികച്ച പേസ്-സ്പിൻ നിരകളുള്ള ഈ ടീമുകൾക്കെതിരെ മധ്യ ഓവറുകളിലെ മെല്ലപ്പോക്കും ഫിനിഷിംഗിലെ പരാജയവും ആവർത്തിച്ചാൽ ഇന്ത്യയുടെ ലോകകപ്പ് മോഹങ്ങൾ പാതിവഴിയിൽ അവസാനിച്ചേക്കാം. അതുകൊണ്ട് തന്നെ വലിയ പോരാട്ടങ്ങൾക്ക് മുൻപ് ഫിനിഷർമാർ തങ്ങളുടെ സ്വാഭാവിക ഫോമിലേക്ക് ഉയരേണ്ടത് ഇന്ത്യക്ക് അനിവാര്യമാണ്.
The post സഞ്ജുവല്ല യഥാർത്ഥ പ്രശ്നം! ഇന്ത്യയെ വലയ്ക്കുന്നത് മധ്യനിരയിലെ മെല്ലപ്പോക്കും ഫിനിഷർമാരുടെ ‘നിഴൽ’ പ്രകടനവും appeared first on Express Kerala.