യുഎഇയിലെ സർക്കാർ, സ്വകാര്യ മേഖലകളിൽ ജോലി ചെയ്യുന്ന ജീവനക്കാർക്കിടയിൽ അനൗദ്യോഗികമായി നടത്തിവരുന്ന ചിട്ടി, നിക്ഷേപ പദ്ധതികൾക്ക് അധികൃതർ കർശന വിലക്കേർപ്പെടുത്തി. ജോലിസമയങ്ങളിൽ പണം സ്വരൂപിക്കുന്നതും നിക്ഷേപങ്ങൾക്കായി ഗ്രൂപ്പുകൾ ഉണ്ടാക്കുന്നതും തൊഴിലിടങ്ങളിലെ അച്ചടക്കത്തെയും പ്രവർത്തനക്ഷമതയെയും ദോഷകരമായി ബാധിക്കുന്നു എന്ന കണ്ടെത്തലിനെത്തുടർന്നാണ് ഈ നടപടി. നിയമപരമായ ലൈസൻസോ മുൻകൂർ അനുമതിയോ ഇല്ലാതെ ഇത്തരം ഫണ്ട് ശേഖരണങ്ങളിൽ ഏർപ്പെടുന്നത് ഗുരുതരമായ നിയമലംഘനമായി കണക്കാക്കുമെന്നും അധികൃതർ മുന്നറിയിപ്പ് നൽകി.
ചിട്ടിയുടെയും നിക്ഷേപങ്ങളുടെയും പേരിൽ പണം ശേഖരിച്ചവർ രാജ്യം വിടുകയും തിരിച്ചടവ് മുടങ്ങുകയും ചെയ്തത് പല സ്ഥാപനങ്ങളിലും വലിയ പ്രതിസന്ധികൾ സൃഷ്ടിച്ചിട്ടുണ്ട്. ഇത്തരം സാമ്പത്തിക ഇടപാടുകൾ സഹപ്രവർത്തകർക്കിടയിൽ തർക്കങ്ങൾക്കും നിയമയുദ്ധങ്ങൾക്കും കാരണമാകുന്നത് തൊഴിൽ സംസ്കാരത്തെ തകർക്കുന്നുവെന്ന് അധികൃതർ ചൂണ്ടിക്കാട്ടുന്നു. സുരക്ഷിതമല്ലാത്ത ഇത്തരം നിക്ഷേപങ്ങളിൽ നിന്ന് ജീവനക്കാർ വിട്ടുനിൽക്കണമെന്നും നിയമപരമായ സാമ്പത്തിക സേവനങ്ങൾ മാത്രം ഉപയോഗിക്കണമെന്നും നിർദ്ദേശമുണ്ട്.
The post തൊഴിലിടങ്ങളിലെ നിക്ഷേപ പദ്ധതികൾക്ക് വിലക്ക്; കർശന നടപടിയുമായി യുഎഇ appeared first on Express Kerala.