പ്രമുഖ ബാങ്കിംഗ് ഇതര ധനകാര്യ സ്ഥാപനമായ മണപ്പുറം ഫിനാൻസിന്റെ 41.66% ഓഹരികൾ ഏറ്റെടുക്കാൻ ആഗോള സ്വകാര്യ ഇക്വിറ്റി സ്ഥാപനമായ ബെയിൻ ക്യാപിറ്റലിന് റിസർവ് ബാങ്ക് ഓഫ് ഇന്ത്യ അനുമതി നൽകി. 2025 മാർച്ചിൽ ഒപ്പുവെച്ച കരാറിന്റെ അടിസ്ഥാനത്തിലാണ് ഈ വൻ നിക്ഷേപത്തിന് വഴിതെളിഞ്ഞത്. ബെയിൻ ക്യാപിറ്റലിന്റെ അനുബന്ധ സ്ഥാപനങ്ങളായ ബിസി ഏഷ്യ ഇൻവെസ്റ്റ്മെന്റ് വഴിയാണ് ഈ ഏറ്റെടുക്കൽ നടക്കുക.
ചില നിബന്ധനകളോടെയാണ് ആർബിഐ ഈ അനുമതി നൽകിയിരിക്കുന്നത്. ഇടപാട് നടന്ന് ഒരു വർഷത്തിന് ശേഷം ഓഹരി പങ്കാളിത്തം 26 ശതമാനത്തിന് മുകളിലേക്ക് ഉയർത്തണമെങ്കിൽ ആർബിഐയുടെ പ്രത്യേക മുൻകൂർ അനുമതി വീണ്ടും തേടേണ്ടതുണ്ട്. കൂടാതെ, മറ്റ് എൻബിഎഫ്സികളിലോ ഭവന ധനകാര്യ കമ്പനികളിലോ ഭൂരിപക്ഷ നിയന്ത്രണം വരാതിരിക്കാൻ ആർബിഐയുടെ മാർഗ്ഗനിർദ്ദേശങ്ങൾക്കനുസരിച്ചുള്ള കൃത്യമായ കർമ്മപദ്ധതി നിക്ഷേപകർ സമർപ്പിക്കണമെന്നും വ്യവസ്ഥയുണ്ട്.
Also Read; കടബാധ്യതയിൽ നിന്ന് വേഗത്തിൽ മുക്തി നേടാം; പേഴ്സണൽ ലോൺ ക്ലോസ് ചെയ്യാൻ ഈ കാര്യങ്ങൾ ശ്രദ്ധിക്കൂ
മണപ്പുറത്തിന്റെ അനുബന്ധ സ്ഥാപനങ്ങളായ ആശീർവാദ് മൈക്രോ ഫിനാൻസ്, മണപ്പുറം ഹോം ഫിനാൻസ് എന്നിവയിലെ നിക്ഷേപങ്ങൾക്കുള്ള റെഗുലേറ്ററി അനുമതികൾക്കായി നിലവിൽ കാത്തിരിക്കുകയാണ്. ഈ അംഗീകാരങ്ങൾ കൂടി ലഭിക്കുന്നതോടെ ഇടപാട് പൂർത്തിയാകും. ഇന്ത്യയിലെ ബാങ്കിംഗ് ഇതര വായ്പാ മേഖലയിൽ അടുത്ത കാലത്തുണ്ടായ ഏറ്റവും വലിയ സ്വകാര്യ ഇക്വിറ്റി നിക്ഷേപങ്ങളിലൊന്നായി ഇത് മാറും. ഇതോടെ മണപ്പുറം ഫിനാൻസിന്റെ മൂലധന അടിത്തറയും വളർച്ചാ പദ്ധതികളും കൂടുതൽ ശക്തമാകുമെന്നാണ് വിലയിരുത്തപ്പെടുന്നത്.
The post മണപ്പുറം ഓഹരി ഏറ്റെടുക്കലിന് പച്ചക്കൊടി കാട്ടി ആർബിഐ; നിക്ഷേപത്തിന് കർശന നിബന്ധനകൾ appeared first on Express Kerala.